Read wanga ISAYA 10 Bible Online

ISAYA 10 - wanga bible

ISAYA 10

¹Bali mushilaamo shiobubi abo abakasinjia amalako amalulu, abo abahandikanga amalako akokhusandia abandu.

²Amalako kokhwikalila abatakha okhukholelwa kabakhoyile okhukholelwa, kokhwikalila abandu banje okhukholelwa akahabwene. Amalako kokhukhola abakhasi abalekhwa okhuba ebiyaayo biabwe, nabo abaana ababisandu okhuba bioluyiitsi lwabwe.

³Kho mulikhola shiina khunyanga yeshinyasio? Mulikhola shiina khunyanga yamasila kaliitsa okhurula mushialo shiehale? Mulilushila wina okhumuhabina? Mulilekha heena emiandu chienywe echio?

⁴Mulitilwa nimuyilwa halala nende abahambe, mulifwila mwihe. Ne kata kario liruma lia OMWAMI Nyasaye shililahwa ta, omukhonokwe kushikolooshe butswa khulwa okhuhana eshinyasio.

⁵OMWAMI Nyasaye aboola ari, “Oli mushilaamo shiobubi iwe lihanga lia Asiria, iwe ouli indabushi yanje yokhukhupa abo abahafia liruma, iwe ouli olusaala lwanje lwokhunywekha abo abasinyisia.”

⁶Ndaruma Asiria okhuseera lihanga lia abandu ababula obunyasaye, abandu abasinyisinjia. Ndakhuruma okhuyaaya emiandu chiabwe, nende okhubukula bioluyiitsi lwabwe. Ndakhuruma okhubasenachila hasi shinga amatoyi kokhunjila.

⁷Nebutswa lihanga lia Asiria shiliakhola ako ta, khandi ako shikalikhwo mumapaaro kalio tawe. Liali butswa nelichoomo liokhusasia, nende okhumulula amahanga koosi khushialo.

⁸Okhuba lihanga lia Asiria lieyitsiala niliboola liri: “Mbula buli mulala khubakhongo banje abelihe nomuruchi!

⁹Shindasasia litookho lia Kalano shinga olwa ndasasia lia Kakemishi? Nalio elia Hamatsi shinga olwa ndasasia elia Arapadi? Nalio lia Damasiko shinga olwa ndasaia elia Samaria?

¹⁰Nikali mbu ndanyalilwe okhukololosia omukhono kwanje, khulwa okhuhaana eshinyasio khumahanga kenamilanga ebifwanani, amahanga akali nebifwanani ebinji okhushila ebili Yerusalemu nende Samaria,

¹¹kho ndakhakhaywa okhusasia Yerusalemu halala nende ebifwanani bialio, shinga olwa ndasasia Samaria nende ebifwanani bialio.”

¹²Nebutswa OMWAMI Nyasaye aboola ari, “Olwa ndalaba nemalile emilimo chianje chiosi khushikulu shia Zayuni nende mu Yerusalemu, ndalahana eshinyasio khumuruchi wa Asiria khulwa okhwichinjimisiakhwe nende okhwilolakhwe.”

¹³Okhuba omuruchi oyo yeyitsiala naboola ari, “Isie ekholile ako koosi khulwa obunyali bwanje omwene, khandi khulwa amachesi kanje nende amaani kanje omwene. Ndarusiaho tsinzakho tsiamahanga, nende okhumulula ebia bali nibabiikha, ndalasenachila hasi abo abekhalanga khubifumbi bioburuchi.

¹⁴Shinga lwomundu anyiilanga omukhono mushitsu shielinyonyi, nolwa ndalanyiila omukhono okhubunjelesia obuyinda bwamahanga, shinga lwomundu obunjelesinjia amabuyu akaleshilwe, nolwa ndalabunjelesia amahanga koosi. Shilialikhwoho kata elala eliapabasia olubaha khulwa okhuriisia, noho okhwasamia omunwa khulwa okhukhupila oluyoka tawe.”

¹⁵Nebutswa OMWAMI Nyasaye areeba ari, “Mana ihaywa yinyala okhwilayila oyo ouchiikhoonyelanga okhwasiaka, noho omusumeno okhwikhulumamilia oyo oukwikhoonyelanga okhwara tsimbao? Kali shinga olwa indabushi yireesia oyo ouyichinga ikulu, noho olusaala okhuchinga ikulu oyo oulali omusaala ta.”

¹⁶Khulweshio, OMWAMI Nyasaye omwene mahe alaruma olumbe khubelihebe abanera emibili, omulilo kulahafibwa mumibili chiabwe okwakha nikulasima tawe.

¹⁷Nyasaye ouli obulafu bwa Isiraeli alaba omulilo, Omutakatifu wabwe alakwa olumemu lwomulilo. Ne khunyanga ndala, lulasamba nilusasia ebisisiabie nende amarakaluke.

¹⁸Emitsuruchie chioluyali nende emikundachie eminulu chilasasilibwa elala, shinga butswa olwa obulwale buliitsanga omundu nahwelelela.

¹⁹Emisaala echilatong'a mumutsurukwe chilaba emituutu muno, mbu kata omwana omutiiti alanyala okhuchibala.

²⁰Khunyanga eyo, abandu abalisikalakhwo mu Isiraeli, abalihonokokha muboluyia lwa Yakobo, shibaliileeta khwihanga liabasasia ta, nebutswa baliileeta khu OMWAMI Nyasaye Omutakatifu wa Isiraeli.

²¹Abakhasikaleho balichelela, abakhasikaleho batiiti khuboluyia lwa Yakobo, balikalushila OMWAMI Nyasaye.

²²Okhuba kata abandu ba Isiraeli nibali abanji leelo, shinga omuyeshe kwomunyaanza, batiiti butswa khubo nibo abalichelela, Eshihesi shimalile okhurechekhwa, nashio okhuula shiikholeshe mubulunjishi.

²³Toto mwene okhuula OMWAMI Nyasaye omwene mahe alakhola akobusasishi, obwa yamala okhulaka mbu alakhola khushialo shiosi.

²⁴Khulweshio OMWAMI Nyasaye omwene mahe aboola ari, “Inywe abandu banje abamenyile mu Zayuni, mularie Abasiria, abamukhupanga nende indabushi, nende okhumunywekha nolusaala shinga olwa Abamisiri bakhola tawe.

²⁵Okhuba shishili butswa eshise shitiiti ne liruma lianje khwinywe lihwa, mana ndalashiukhasia liruma lianje nelichoomia khu Abasiria.

²⁶Isie OMWAMI Nyasaye omwene mahe ndalabakhupa nolukhoba, shinga olwa ndakhupa abandu ba Midia khulwanda lwa Orebu. Khandi ndalalunjisia indabushi okhubahelesia eshinyasio shinga shia ndahelesia Abamisiri.

²⁷Khunyanga eyo muliruula hasi emisiko chia bamutuukha khumabeka kenywe, khandi mulirusia likokolo lia bamuboha mwikosi lienywe. Likokolo elo lilifunakwa okhurula khumabeka kenywe.” Abasuku batikuluushe okhurula Rimoni

²⁸ne boolile mwitookho lia Ayi, bamalile okhubira Migironi. Baleshile ebimanulwa biabwe Mikimashi.

²⁹Bamalile okhwambukha munyambukho, ne baleyalisia Geba. Abandu bali mwitookho lia Rama batechesiibwe, nabo abali mwitookho lia Gibea eliomuruchi Saulo beluushe.

³⁰Inywe abandu ba Galimu khupe tsimbungu, nenywe ba Laisha reche amarwi, nenywe aba Anatsotsi fuchilile.

³¹Abandu ba Madimena belukha, nabo ba Gebimu belukha khulwa okhwihonokosia.

³²Leelo luno abasuku abo bali mwitookho lia Nobu, nibali ebweneyo, balasiomesia olwaala khushikulu shia Zayuni, balasiomela litookho lia Yerusalemu.

³³OMWAMI Nyasaye omwene mahe, alarema amasakake nende amaani kokhuriisia, emisaala emirambi muno chilaremwa, nachio echianera muno chilakwisibwa hasi.

³⁴OMWAMI alarema emisaala echili mumutsuru neihaywa, Lebanoni lilakwisibwa halala nomutsuru kwalio kwoluyali!