Read wanga ISAYA 11 Bible Online

ISAYA 11 - wanga bible

ISAYA 11

¹Omurombo kwakhasebushe okhurula khushisina shia Yese, khandi lisaka liakhasebushe okhurula khumisichie.

²Roho owa OMWAMI Nyasaye yakhabe ninaye, Roho wobuchesi nende obumanyilisi, Roho wobwibaali nende amaani, Roho wobumanyi nende okhuria Nyasaye.

³Okhwikhoyakhwe khwakhabe mukhuria OMWAMI Nyasaye. Ye shialikhalachila abandu eshiina okhulondana nende aka alola netsimonitsie, noho okhuhulila namarwike tawe.

⁴Nebutswa alikhalachila abatakha mubulunjishi, nabo abamanani alibakholela akahabwene. Khandi khulwa likhuwalie abandu bakhahebwe eshinyasio, ne khulwa likhuwa liarumbula, abamayanu bakherwe.

⁵Obulunjishi bwakhabe omushipikwe kwomushishienje, nabwo obwisiikwa bwakhabe omukoye kwokhwiboha mushishienje.

⁶Lifunyisi liakhamenye halala nende likondi, nayo ingwe yakhakone halala nende eshimeme shielikondi. Eshimoosi shieing'ombe nende italanyi imbuukha biakhaayile halala, ne omwana omutiiti niye owakhabiimilile.

⁷Ing'ombe yakhaayile halala nende itubu, nabio ebimoosi bietsing'ombe nende bietsitubu etsio biakhakone halala, natsio tsitalanyi tsiakhaaye obunyasi obubisi shinga tsing'ombe.

⁸Omwana oushinuuna yakhabayile ahambi nobwina bweliini, naye ouleshile okhunuuna yakhare omukhonokwe mubwina bweshiyilikoma, ne shiyakhasalisibwekhwo tawe.

⁹Ne khu Zayuni, eshikulu shianje eshitakatifu, shibakhasalisibwekhwo kata okhusasibwakhwo tawe. Okhuba eshialo shiakhabe nishietsulamwo obuchesi bwa OMWAMI Nyasaye, shinga olwa amaatsi ketsula munyanza.

¹⁰Khunyanga eyo, omurombo kwomulwibulo lwa Daudi kwakhabe eshilolelo khumahanga. Amahanga kakhamukhaabe, nashio eshimenyoshie shiakhahebwe oluyali.

¹¹Khunyanga eyo, OMWAMI Nyasaye yakhanyiile omukhonokwe olwakhabili khulwa okhuchelesia abatong'a khubandube okhurula mubialo bia Asiria, Misiri, Patsirosi, Etsiopia, Elamu, Babuloni nende Hamatsi, nende abali mubialo bili khundulo khweinyanza nende abali mubikhalachinga.

¹²OMWAMI Nyasaye alichinguula ikulu ipendera, khulwa okhubunjelesinjia halala amahanga, alakhung'asia abandube ba Isiraeli, nende abandu ba Yuda abali nibasalaana. Alababunjelesinjia okhurula mutsimbeka tsine tsieshialo.

¹³Imbalikha shiyakhabekhwoho hakari welihanga lia Isiraeli nende lia Yuda ta, khandi obusuku shibwakhabekhwoho hakari welihanga lia Yuda nende lia Isiraeli tawe.

¹⁴Nebutswa boosi halala bakhaseere Abafilisiti abali elubeka lwomumbo, boosi bakhayaaye emiandu chiabandu abamenyanga elubeka lwebukwe. Baliseera nende okhuhula abandu bebialo bia Edomu, nende Moabu, nabo abandu ba Amoni bakhafuchilile okhuba hasi woburuchi bwabwe.

¹⁵Naye OMWAMI Nyasaye alikhamia amaatsi akali mumukhono kweinyanza ya Misiri, khandi alireera omuyeka omukhongo okhukhamia amaatsi akomwalo, alikukabulamwo emichela musafu, kho mbu omundu yesi anyalilwe okhuchendamwo niyambukha.

¹⁶Khwakhabeho nomuhanda omukhongo okhurula Asiria, okwa abandube ba Isiraeli abasikala balilondakhwo, omuhanda omukhongo shinga okwaliho mutsinyanga tsiabakuuka babwe bachelela okhurula mushialo shia Misiri.