Read wanga ISAYA 13 Bible Online

ISAYA 13 - wanga bible

ISAYA 13

¹Kano niko amakhuwa kobulakusi ka Isaya omusiani wa Amozi yalola mumalolelo.

²Nyasaye aboola ari, “Sinjisie eshilolelo shielihe khubutenje bweshikulu eshikhaya. Lanje abelihe abo nomwoyo omukhongo, bakhomole nomukhono mbu baseere ebilibwa bielitookho liabaruchi.

³Isie OMWAMI Nyasaye emalile okhulachilisia abelihe banje abaahule, emalile okhulanga abalulu banje, abokhuhana eshinyasio shieliruma lianje.”

⁴Hulile obuyoka obuli mubikulu, shinga bwomukanda omukhongo kwabandu. Hulile olukhu lwamahanga, olukhu lwamahanga akakhung'ananga halala. OMWAMI Nyasaye omwene mahe alarechekhanga abelihebe khulwa lihe.

⁵Betsanga okhurula mubialo biehale, okhurula mutsimbeka tsieshialo tsiosi. OMWAMI Nyasaye yetsanga mwirumalie, nali nebimanulwabie khulwa okhumulula eshialo shiosi.

⁶Khupe tsimbungu, okhuba inyanga ya OMWAMI Nyasaye yili ahambi, yileetsa shinga obusasishi oburula khu OMWAMI Nyasaye.

⁷Khulweshio amakhono ka buli mundu kalahwamwo amaani, khandi buli mundu alafwa omwoyo.

⁸Abandu balatiilwa noburi, balahenda nende okhutsunwa, shinga omukhasi oulumwa inzibula. Balahengana muburi, khandi mubweni bwabwe mulaba neshifimbwa murwe.

⁹Lola, inyanga ya OMWAMI Nyasaye yitsanga, inyanga yibula tsimbabasi, khandi yeliruma lilulu, yitsanga okhukwisia eshialo likunda nende okhusasia abonooni balimwo boosi.

¹⁰Okhuba tsing'ining'ini tsiomwikulu nende omukhululo kwatsio, shibilalolesiakhwo obulafu bwabio tawe. Mumabwibwi eliuba lilarula nilili limali ti, nakwo omwesi shikulakhosiakhwo obulafu bwakwo tawe.

¹¹OMWAMI Nyasaye aboola ari, “Ndalahana eshinyaasio khushialo khulwa obwonooni bwashio, nende eshinyaasio khubandu abamayanu khulwa obumayanu bwabwe. Ndalaakamia obwichinjimisi bwa abo abekhulumamia, nende okhumala oburaasi bwa bamahababa.

¹²Ndalakhola abandu okhuba abatinyu okhunyoolekha, okhushila itsahabu inzeleleshe, khandi abaana babandu okhuba abatinyu okhunyoolekha okhushila itsahabu ya Ofiri.

¹³Khulwako ndalakhola likulu okhutechela, nashio eshialo shilarenga okhurula khumuse kwashio, khunyanga eyo, isie OMWAMI Nyasaye omwene mahe ndalamanyia liruma lianje lilulu.

¹⁴Shinga eshitsusu eshiyimwa, noho amakondi akabula omwayi buli mundu yakhakalushe khubandu babwe, nende okhwilushila mushialo shiabwe abeene.

¹⁵Yesi yesi oulitiilwa yakhafumirwe, yesi yesi oulihambwa yakherwe nolukanga.

¹⁶Abaana babwe abatoro bakhatubulwemwo ebitonye nibareerekhwo tsimoni, tsinzu tsiabwe tsiakhayaaywe, nabo abakhasi babwe nibakwibwakhwo nibonoonibwa.

¹⁷Lola, enzuubanga Abamedi okhubaseera, Abamedi abo shibateebanga ifeetsa ta, khandi shibachamisibungwa neitsahabu tawe.

¹⁸Obuyingo bwabwe bulafumira abaraaka babwe, shibalabelelelakhwo abolwibulo olwo, kata okhulolelakhwo abaana abatiiti tsimbabasi tawe.

¹⁹Nalio Babuloni, lihanga lioluyali okhushila akandi koosi, liabandu balio baliikhoyelanga, lilakwa shinga Sodomu nende Gomora, amatookho komwene ndakwisia.

²⁰Omundu shialimenyakhwomwo, kata okhwikhalakhwomwo ebisoni nebisoni tawe. Abarabu shibalikhomakhwomwo amaheema kabwe ta, kata abaayi shibaliayakhwomwo emiruko chiabwe tawe.

²¹Habula tsisolo nabulimo nitsio etsilimenyamwo, tsinzu tsiabwe tsiakhetsulemwo tsiifisi. Amahuto kakhamenyemwo, nabio ebitsusu nibisolasolamwo.

²²Amabwe kalisema mutsingoba tsiabwe, nabio ebisuutse nibisema mumatookho kabwe amalayi. Inyanga yokhumululwa khwa Babuloni yimalile okhuula, tsinyanga tsialio shitsilameetwakhwo tawe.”