Read wanga ISAYA 14 Bible Online

ISAYA 14 - wanga bible

ISAYA 14

¹OMWAMI Nyasaye alabeelelela aboluyia lwa Yakobo, nabaahula okhuba abeebe khandi. Alabalekha okhumenya mushialo shiabwe abeene. Abarende baletsa okhumenyamwo halala ninabo.

²Abandu bamahanga balabakhoonya okhukalukha mushialo shia OMWAMI Nyasaye yabahelesia. Ne abamahanga abo balabakhalabanila shinga abasumba. Abo abali nibayilwa mubuhambe, balaba abasumba ba Isiraeli, khandi baliruka abo ababasandia.

³Iwe Isiraeli, olwa OMWAMI Nyasaye alaba nakhuhulusiye okhurula khubutsunwi nomubusalili nende khumilimo emitinyu chia walunyibwa okhukhola,

⁴olimba notseshelela omuruchi wa Babuloni noboola ori; “Lolekhwo shinga owakhusandia akwile hasi! Lolekhwo shinga oburasibwe bwakamiibwe!

⁵OMWAMI Nyasaye afunache indabushi yabamayanu, nende omutunga kwabaruchi,

⁶indabushi yabekhoonyela okhukhupa abandu mwiruma obulakama ta, yabekhoonyela okhuruka amahanga muburuma, nende okhubasandia obulakama ta.

⁷Ne bulano eshialo shiosi shisangalila obuhuluushi nende omulembe, abandu boosi bemba nibekhoya.

⁸Emisaala emitarakwe chikhoyela okhukwakhwo, nachio emisiita chia Lebanoni chiikhoya nichiboola chiri, ‘Khulwa okhubeela okwisibwe, abulaho bulano owitsanga okhukhurema nakhukwisia hasi ta.’

⁹Emakombe yirecheeshe okhukhwinjisia iwe omuruchi wa Babuloni. Ebishieno bia abafwa bibuusiibwe okhukhushesia, nende boosi abalinji abaruchi khushialo, emakombe yibabuusiye okhurula khubifumbi biabwe bioburuchi, abo boosi abalinji abaruchi ba amahanga.

¹⁰Biosi bilalanjilisia nibiboola biri, ‘Wesi khandi okwile omuteshele shiafwe noho? Oli butswa shiafwe noho?

¹¹Oluyalilwo lwishibwe mushialo shiemakombe, halala nende amayosi ka amatunguko; eshitalishio shiokhwiyalisiakhwo ni tsinyende, khandi omurungetikwo kwokhwifimba ni tsinyende.’

¹²Lolakhwo shinga waakuushe okhurula mwikulu, iwe owali eyasulwe eyomumabwibwi. Lolakhwo shinga okwisibwe hasi, iwe owaseeranga nohula amahanga.

¹³Omwene weboolelanga mumwoyo ori, ‘ndakhatikulushe mwikulu, ndakhachinguule eshifumbi shianje shioburuchi, ikulu ewa tsing'ining'ini tsia Nyasaye. Ndakhekhale shinga omuruchi khushikulu elubeka lwemasaba, olwa bakhung'ana.

¹⁴Ndakhatikulushe khubutenje bwamaleesi, nindichelaasia khu Nyasaye Omukhongo Muno.’

¹⁵Nebutswa bulaano okwisibwe hasi emakombe, okhuula mubwina hasi bwene.

¹⁶Abo abakhulola balang'ang'aala nibareebana bari; ‘Toto uno niye omusaatsa owatechesia eshialo, owakhola amahanga okhurenga?

¹⁷Uno niye omusaatsa owakhola eshialo okhukwa eshitsiimi, owasasia amatookho? Uno niye omusaatsa oulafuchililakhwo okhulekhuula abahambe okhukalukha ingo wabwe ta?’

¹⁸Abaruchi boosi abamahanga bahuluukha muluyali, buli mulala mung'aniye omwene.

¹⁹Nebutswa iwe ofubilwe elwanyi, ehale nende ing'aniyo, oli butswa shinga eshindu eshieshisinyo. Omubilikwo kufuniikhwe nemilambo, chia abo abeerwa nolukanga, mana nibafubwa mubuko bwa amachina, ewa kusenachilungwayo.

²⁰Shiolayabilwa shinga abaruchi bashio ta, shichila wasasia eshialoshio, khandi weera abandubo.

²¹Mwirecheshe okhwira abaanabe abasiani, baleerwa khulwa okhubela obwonooni bwa samwana. Shibalabukhakhwo okhuruka eshialo, noho okhumbakha amatookho tawe.”

²²OMWAMI Nyasaye omwene mahe aboola ari, “Ndalaseera Babuloni nende okhulimulula liosi, shindalalekhakhwomwo eshindu shiosi ta, shindalalekhakhwomwo kata abaana kata abehonokosia tawe, nolwa isie OMWAMI Nyasaye emboola.

²³Ndalakhola Babuloni okhuba eshimenyo shia namulobi, shilakwa amatiba kamaatsi, khandi ndalashieya nende ameeyo kokhumulula. Isie OMWAMI Nyasaye omwene mahe emalile okhurumbula.”

²⁴OMWAMI Nyasaye omwene mahe amalile okhuwitsuba naboola ari, “Toto mwene shinga olwa ndaloosiye, nolwa kalaba kario, khandi shinga olwa ndarecheshe, nolwa kalekholekha.

²⁵Ndafunaka obunyali bwa Abasiria mushialo shianje shia Isiraeli, khandi khushikulu shianje ndalabasenachilakhwo. Ndalarusia likokolo liabwe khumabeka ka abandu banje, nende okhuruula hasi emisiiko chiabwe echiabasitohela.”

²⁶Kano niko akamalile okhuloosibwa khulwa eshialo shiosi, nakwo omukhono kwanje kukololooshe khulwa okhuhaana eshinyasio khumahanga.

²⁷OMWAMI Nyasaye omwene mahe achoomile okhukhola ako, kho ounyala okhumwikalila niwiina? Omukhonokwe kumalile okhukololokha khulwa okhuhaana eshinyasio, kho ounyala okhukukalusia niwiina?

²⁸Khumuyika kwomuruchi Ahazi yafwilakhwo, Nyasaye yarumbula amakhuwa kano ari;

²⁹“Inywe Abafilisiti shimulasangaala shichila mbu indabushi yamukhupanga yifunaakwe tawe, okhuba inzokha yilali yobufisi ta, yilebula eshiyilikoma, nashio eshiyilikoma shilebula okuyokha okupulukhanga.

³⁰Abaana abekulanda ba abamanani balekura, nabo abatakha balekhala mumulembe; Nebutswa abaana benywe ndalabeera neinzala, abehonokokha khwinywe ndalabeera.

³¹Khupe tsimbungu inywe abali mubilibwa, mwikhuule inywe abali mumatookho! Mutilwe neindenga inywe Abafilisiti mwesi! Okhuba, omwosi kwabelihe kwitsanga okhurula Emasaba, ne omuri shialikhwo mubemilisi bakwo tawe.”

³²Kho abarume belihanga elo nibahebwe likalusio shiina? Balaboolelwa mbu, “OMWAMI Nyasaye aralisiye Zayuni, ne abatakha abokhubandube balanyoola obwilushilo mulio.”