Read wanga ISAYA 15 Bible Online

ISAYA 15 - wanga bible

ISAYA 15

¹Kano niko amakhuwa amatinyu ka Nyasaye yarumbula khu Moabu; Litookho lia Ari elili mu Moabu lisasiibwe, limuluulwe mushilo shilala, litookho lia Kiri elili mu Moabu lisasiibwe, limuluulwe mushilo shilala.

²Abandu ba Diboni batikuluushe khu Ihekalu, batikuluushe khushikulu okhwikhuula, nabo aba Moabu bakhupanga tsimbungu, khulwa okhusasibwa khwa amatookho ka Nebo nende Medeba. Boosi babechile emirwe chiabwe, khandi babechile tsindefu tsiabwe.

³Bali khumihanda nibafwalile ebifwalo biamakunia, bali khubutenje bwetsinzu tsiabwe nende mutsinyanyi tsiabwe, boosi balila nibekhuula.

⁴Abandu ba Heshiboni nende Eleala baayula nomwoyo omukhongo, okhwaayula khwabwe khuhulilikha okhuula Yahazi. Kata belihe lia ba Moabu batechela, khandi itswoni yabwe yihwele.

⁵Omwoyo kwanje kubelela khulwa Moabu, abandu babwe belushiile mwitaala lia Zoari, batsia Egelatsi-shelishiya. Abandi batikulukha khushisia shia Luhitsi, batikulukha nibekhuula. Belushila khunjila ya Horonaimu nibekhuula khulwa okhumululwa khwabwe.

⁶Amaatsi komwalo kwa Nimurimu kakhamiibwe, obunyasi obuli halubeka lwakwo bufululuushe, nakwo omuboka kwahwele.

⁷Khulwako omwandu kwa bali nibebishila, nende okwa bali bibenyoolela kulabukulwa, nikuyilwa injelekha womuchela kwa Mierebi.

⁸Tsimbungu tsihulilikha buli habundu mushialo shia Moabu, tsihulilikha okhuula mwitaala lia Egilaimu, nende okhuula mu Beerelimu.

⁹Amaatsi komwalo kwa Diboni ketsuulemwo amatsayi, ne kata kario Nyasaye alameeta okhubareerera amasila kashilakhwo ako. Abo abehonokokha nibelukha okhurula mushialo shia Moabu, balarumilwa italanyi okhubeera.