Read wanga ISAYA 16 Bible Online

ISAYA 16 - wanga bible

ISAYA 16

¹Muyile ebimeeme biamakondi, shinga eshihaanwa, khumuruchi wa Yerusalemu, okhurula mwitookho lia Sela, okhubirira mushitsiimi okhuula khushikulu shia Zayuni.

²Abakhasi ba Moabu, abali khunyambukho ya Arinoni, bali butswa shinga amanyonyi akabeyabeya, akebitsu biako bisasiibwe.

³Muboolele abandu ba Yuda muri, “Khuchetsiyiekhwo, khukhalachilekhwo eshiina habwene, khufunishekhwo eshiinikha shienywe, shinga eshilo olwa shifunikhanga eshiteere, mukhufise ifwe abelusiibwe, mulakhoba abo abelusibwe tawe.

⁴Leshe abelusibwa ba Moabu, bamenyekhwo mwinywe, mube obwilushilo bwabwe okhurula khu wokhubamulula.” Olwa oubasandinjia alaba narusibweho, nabwo obusasishi nibwakaame, nabo abokhuseera nibarulile mushialo,

⁵nolwa oburuchi bwa habwene buliralisibwa mubuheeli, muboluyia lwa Daudi. Omuruchi waheela okhukhola ka habwene, khandi omwangu wokhukhalaka habwene, aliruka muboluyia olwo mubwisikwa.

⁶Aboluyia lwa Yuda baboola bari, “Khwahuliile akokhwichinjimisia khwa Maobu, khu akokhwilolakhwe. Khwahuliile khu kokhwichinjimisiakhwe, nende injiniaye kata oburaasibwe. Nebutswa okhwilolakhwe okhwo nokhwabutswa.”

⁷Bulano abandu ba Moabu bakhupa tsimbungu, boosi bekhuula khulwa eshialo shiabwe shia Moabu. Mwikhuule nimulila obululu, olwa mwitsulila amabumbe ketsinzabibu ka Kiri-Haresetsi.

⁸Emikunda chili Heshiboni chifululuushe, kata chiemitsabibu chili Sibuma chisasiibwe, Idivai yemitsabibu echio yameesinjia abaruchi bamahanga. Emitsabibu echio chiali nichialanda kata okhuula Yazeri, nende okhuula mushitsiimi. Amasaka kachio kali nikalanda okhuula injelekha weinyanza.

⁹Khulweshio ndikhuula halala nende Yazeri, khulwa okhusasibwa khwemitsabibu chia Sibuma. Amasika kanje karoonya khulwa Heshiboni nende Elieala, shichila okhwikhoya khulwa lichesa lienywe liebiamo, nende lieimele khwakaame.

¹⁰Okhwikhoya nende okhusaangaala khurusiibweho, okhurula mumikunda echiamanga lichesa lilayi. Khandi okhwimba mumikunda chiemitsabibu, nende okhukhupa tsingalakala shikhulabaho tawe. Omundu yesi shialatiinyakhwo idivai mushitiinyilo tawe. Ndakamiye tsingalakala tsielichesa.

¹¹Khulweshio embeelela khulwa Moabu, omwoyo kwanje kubeelela muno khulwa Kiri-Haresetsi.

¹²Abandu ba Moabu bechoonyia butswa khulwa okhutikulukha khushikulu shiabwe, okhutsia khwabwe muhekalu khulwa okhusaaya nokhweshikhaya butswa.

¹³Ako niko aka OMWAMI Nyasaye yarumbula khu Moabu khale.

¹⁴Ne bulaano OMWAMI Nyasaye aboola ari, “Olunyuma lwemiyika chitaru, shinga lwomukholi womurungo abalanga tsinyangatsie, oluyali lwa Moabu nalube niluhwele. Ne kata abandu ba Moabu nibali abanji, batiiti muno nibo abalihonokokha, khandi baliba abateshele.”