Read wanga ISAYA 17 Bible Online

ISAYA 17 - wanga bible

ISAYA 17

¹OMWAMI Nyasaye aboola ari, “Damasiko shililaba litookho khandi ta, habula lilaba butswa eshibunjikho shiamayindi akalikulukha.

²Amatookho ka Siria kalasikala butswa amakunda khulwa inziayo. Kalaba obwayilo bwa amakondi, ewa kalahuluushila, ne abulaho oulakariisia.

³Amatookho ketsingoba shikalabaho khandi mu Efuraimu ta, nabwo oburuchi shibulabaho mu Damasiko tawe. Abandu ba Siria abasikalaho abalamu, balaba neshifimbwa murwe shinga eshia Abaisiraeli. Nolwa isie OMWAMI Nyasaye omwene mahe emboola.

⁴Khunyanga eyo oluyali lwa Isiraeli lwakheshibwe hasi, ne okhunerakhwe shikhwakhabeho khandi tawe.

⁵Isiraeli shiakhabe shinga omukunda kufunilwemwo imele, shiakhakholelwe shinga olwa abachesi bachesanga imele. Shiakhabe shinga omukunda kwabafunilemwo imele mwibanda lia Abarefahimu.

⁶Bakhasikale butswa mu Isiraeli abandu batiiti, shinga lwomutseituni kutong'anga nikunochilwekhwo emitseituni chiosi, kutong'akhwo butswa emitseituni chibili noho chitaru khubutenje bwakwo, kata chine noho chirano echileshilwe khumasaka ka hasi. Nolwa Isie OMWAMI Nyasaye wa Isiraeli emboola”.

⁷Khunyanga eyo, abandu baliitsulila omulonji wabwe, balihenga khu Nyasaye, Omutakatifu wa Isiraeli.

⁸Shibalitsiililila khandi okhwileeta khubimalilo biemisango biabeene bakaasia tawe. Kata okhwisika emilimo chiamakhono kabwe abeene ta, nibio ebifwanani biomunyasaye Ashera nende ebimalilo biemisango biokhusambilakhwo obubane.

⁹Khunyanga eyo amatookho kabwe aketsingoba kalitong'a amakunda shinga aka Abahiwi nende Abamori. Belukha nibahuyamwo olwa belukha okhurula khu Abaisiraeli. Buli shindu shilasasibwa.

¹⁰Khulwokhuba iwe Isiraeli webilila Nyasaye wakhuhonia, khandi shiwitsulilanga olwanda lwobwilushilobwo ta, kata noba noraaka emikunda eminulu, ne nochilekha mbu chibe chiomunyasaye omucheni,

¹¹kata nichiba nichisebukha khunyanga tsana yochirachirakhwo, kata nichiba nichinera mumabwibwi akomunyanga tsana eyo, lichesalio lilatuumuukha butswa, khunyanga yamanyakhano nende obutsunwi bulanyala okhusilikhwa tawe.

¹²Lole, amahanga amanji kakukuma, kakukuma shinga okhukukuma khweinyanza. Lole, okhuhoola khwamahanga, kahoola shinga okhuhoola khwamarunda amakhongo.

¹³Amahanga kahoola shinga okhuhoola khwamarunda amakhongo. Nebutswa Nyasaye alakahalabila, nako nikelukha nikatsia ehale, kalahutswa shinga omukhuutsi okuhutswa nomuyeka khushikulu khandi shinga olufu luhutswa neshimbalakusi.

¹⁴Khubwile amahanga ako kareera indenga, nebutswa eshialo nibushili okhushia kaba kabulaho. Ako niko akaletsela abo abakhuyaayanga, omukabo kwa abo abakhumululanga!