Read wanga ISAYA 18 Bible Online

ISAYA 18 - wanga bible

ISAYA 18

¹Lole, eshialo eshili netsimbaha etsihoola, shili injelekha wemialo chia Etsiopia.

²Shiruma abarume abetsela khumwalo kwa Naili. Betsela khumaaro kakaasibwa okhurula khumaturu. Tsie bwangu inywe abarume abelukhanga bwangu, tsie khwihanga liamaani khandi likhongo, khubandu abariisia abandu boosi, khwihanga lieshialo shialio shiakabulwamwo nemialo.

³Inywe mwesi abamenya khushialo, inywe abamenya khushibala, olwa ipendera yichinguulwa mubikulu, muhenje muchilole, olwa olwika lukhupwa, murecheresie, muhulile!

⁴Okhuba OMWAMI Nyasaye yambooleele ari, “Ndalahenga nendi mushimenyo shianje mwikulu, okhulola akekholekhanga, nindihotselesiye mumasilisi shinga oluuya mutsinyanga tsiomubasu, khandi shinga lileesi lieifula mutsinyanga tsielichesa.

⁵Okhuba lichesa nilishili okhuula, olwa eshimuli shilaba nishibunguluushe, nachio emitsabibu nichienjile, nilwo olwa Nyasaye alatsoola emirombo neinjeso, nende okhurema amasaka akalaanda.

⁶Emilambo chiabwe chilalekhwa habulafu khulwa okhulibwa namanyonyi mutsinyanga tsieshimiyu, nende okhulibwa netsisolo nabulimo munyanga tsiomunyiri.”

⁷Mutsinyanga etsio, OMWAMI Nyasaye alireererwa ebihaanwa okhurula khubandu bamaani khandi abakhongo, okhurula khubandu bariibwa mushialo shiosi, nende okhurula khwihanga liamaani khandi likhongo, eliakabulwamwo nemialo, bakhabireere khushikulu shia Zayuni, habundu hokhwinamila OMWAMI Nyasaye omwene mahe.