Read wanga ISAYA 19 Bible Online

ISAYA 19 - wanga bible

ISAYA 19

¹Kano niko amakhuwa keshinyasio shiarumbulwa khu Misiri, Lole, OMWAMI Nyasaye yetsela khwileesi eliilukha bwangu, ne yetsa okhuula khushialo shia Misiri. Ebifwanani bia abanyasaye bia Misiri bilatechela imbeliwe, nabo abandu ba Misiri balatiilwa noburi.

²OMWAMI Nyasaye aboola ari, “Ndalakhola Abamisiri okhulwana abeene khubeene, balaseerana abeene khubeene, khandi omundu alaseera omumenyaniwe. Litookho lilaseera litookho liashie, lihanga lilaseera lihanga liashie.

³Ndalarusia mubandu ba Misiri itswoni yabwe, nende okhukoyasia koosi ka baloosia okhukhola. Balareeba okhurula khubanyasaye nende abafumu, khandi balatsia khu bebitsohelo nende abalosi.

⁴Ndalahaana abandu ba Misiri mumakhono komuruchi oubula tsimbabasi, khandi omuruchi omululu alabaruka, Nolwa Isie OMWAMI Nyasaye omwene mahe emboola.”

⁵Amaatsi komwalo kwa Naili kalakhama, ne omwalo okwo kulakhama nikuuma.

⁶Ne emitaro chia Misiri chiokhurusia amaatsi chilahunya obubolo, emichela chiomwalo kwa Naili chilatitiha nende okhuuma. Olusi nende liswa bilaniala.

⁷Tsinguku tsiomwalo kwa Naili tsilatong'a tsikhaya, ebiraache biosi ebili khutsio bilooma nende okhutuumuulwa nomuyeka.

⁸Abanaabi betsinyeni mumwalo kwa Naili balekhuula, nabo abafuuba tsikhanda mumaatsi balafwa mioyo.

⁹Khandi boosi abanabanga tsingubo tsieikitani balafwa omwoyo, nabo abanabanga tsingubo tsinyushe balakhuunia mumoni mwabwe.

¹⁰Abalushi bobuusi balasinyikha, nabo abakholi bokhurungwa balabeelela mumioyo chiabwe.

¹¹Abemilisi belitookho lia Zoani nabayingwa muno, nabo abachetsiyi bomuruchi wa Misiri bahana amebaalo kobusilu! Toto mwene, wakhaboolela orie omuruchi wa Misiri mbu, “Isie endi mulala khubachetsiyi bakhale, endi womulwibulo lwabaruchi bakhale?”

¹²Kho abachetsiyi benywe bali heena? Lekha bamuboolele bulaano, aka OMWAMI Nyasaye omwene mahe apaaranga okhukholela Misiri.

¹³Abemilisi bamatookho ka Zoani bakwile abayingwa, nabo ba Mefisi bakwile abasilu. Abo abakhoyile okhwimilila lihanga lia Misiri obulayi balikosiye injila.

¹⁴OMWAMI Nyasaye abareeremwo iroho yokhubakoyasia, khulweshio abandu ba Misiri bashiamia buli liabakhola liosi, bali butswa shinga omumeesi ouchenda nakwa mumasaleke omwene.

¹⁵Abulaho omundu yesi, abe omwimilisi noho oulali omwimilisi, omuyinda noho omutakha, oulanyalilwa okhukhoonya lihanga elia Misiri.

¹⁶Khunyanga eyo, abandu ba Misiri balitiilwa noburi shinga abakhasi, balitechela noburi obukhongo olwa balilola OMWAMI Nyasaye omwene mahe nanyiila omukhonokwe okhubahelesia eshinyasio.

¹⁷Eshialo shia Yuda shiakhabe shiokhurisia muno khubandu ba Misiri. Yesi oulihulilakhwo Yuda nishiralwa, alitiilwa noburi khulwa okhubela aka OMWAMI Nyasaye omwene mahe yerechekhanga okhubakholela.

¹⁸Khuyanga eyo, olulimi lwabaheburania lulilomalomwa mumatookho karano ka Misiri. Nabo abandu bomumatookho ako balikhola eshiitsubo shiokhuba abeesikwa muliira lia OMWAMI Nyasaye omwene mahe. Elala khumatookho ako lililaangwa mbu, “Litookho lieliuba.”

¹⁹Khunyanga eyo, shiakhabeho eshimalilo shiemisango hakarikari mushialo shia Misiri nende isiilo yelichina khulwakho lwa Misiri, ebiliumbashilwa OMWAMI Nyasaye khulwa okhuhaana oluyali khuye.

²⁰Eshimalilo shiemisango eshio nende isiilo eyo, biakhabe ebilolelo khandi obuloli mbu, OMWAMI Nyasaye omwene mahe ali mushialo shia Misiri. Olwa abandu abo balihabila OMWAMI khulwa okhubela obusandibwi bwabwe, OMWAMI Nyasaye alibarumila wokhubahonia, naye alibaterera nende okhubahonia.

²¹OMWAMI Nyasaye aliifwimbula omwene khubandu ba Misiri, mana nabo balimumanya khunyanga eyo nibamwinamila nende okhumukholela emisango emisambe. Balikholela OMWAMI Nyasaye ebiitsubo nende okhubiusia.

²²OMWAMI Nyasaye alihaana eshinyasio khubandu ba Misiri nebutswa alibahonia khandi. Balimukalushila naye alihulila okhuhaba khwabwe nende okhubahonia.

²³Khunyanga eyo, kulibaho omuhanda omukhongo okhurula Misiri okhuula Asiria. Abandu ba Asiria baliitsa Misiri nabo aba Misiri nibatsia Asiria, mana aba Asiria nende ba Misiri baliinamila OMWAMI Nyasaye halala.

²⁴Khunyanga eyo, Isiraeli liakhabe lihanga liakhataru khu Misiri nende Asiria, nako kataru kano, kakhabe ketsikhabi mushialo shiosi.

²⁵OMWAMI Nyasaye omwene mahe yakhabalaamile tsikhabi naboola ari, “Emulaamila tsikhabi inywe Misiri abandu banje, nende inywe Asiria abomwene ndalonga nende inywe Isiraeli, abandu banje abaahule.”