Read wanga ISAYA 2 Bible Online

ISAYA 2 - wanga bible

ISAYA 2

¹Kano niko aka Isaya omusiani wa Amozi, yalola khu Yuda nende Yerusalemu.

²Mutsinyanga tsitsanga, khushikulu shia Ihekalu yombakhwakhwo, shiakhabe eshirambi muno okhushila biosi, shiakhabe eshirambi okhushila ebikulu bindi biosi. Amahanga koosi kakhetse khushio.

³Abandu abanji bakhetse nibaboola bari, “Yitse khutsie khushikulu eshia OMWAMI Nyasaye, khutsie muhekalu ya Nyasaye wa Isiraeli. Alakhwechesia aka yenyanga khukhole, nefu khulachenda munjilatsie. Okhuba amechesio aka OMWAMI Nyasaye karula Yerusalemu, nali Zayuni, aboolanga nabandube.”

⁴Yakhareere omulembe hakari wamahanga, abandube balituya tsinganga tsiabwe nitsikwa tsimbako tsiokhulima, khandi amafumo kabwe kalituywa nikekhola tsinjeso. Amahanga shikalilwana lihe khandi ta, kata okhwirechekha khulwa lihe khandi tawe.

⁵Inywe abolwibulo lwa Yakobo, yitse khuchende mubulafu obwa OMWAMI Nyasaye akhuhelesinjia.

⁶Iwe Nyasaye, walekha abandubo, abolwibulo lwa Yakobo. Eshialo shiabwe shietsulamwo obufumu okhurula ebukwe, nende obulakusi shinga obwa Abafilisiti. Abandu baloondanga emiima chia abamahanga.

⁷Eshialo shiabwe shietsulamwo ifetsa nende itsahabu, ne amabiikho kabwe shikahwetsanga tawe. Eshialo shiabwe shietsulamwo tsifarasi, ne amakaari kabwe kelihe shikahwetsanga tawe.

⁸Eshialo shiabwe shietsulamwo ebifwanani benamilanga ebindu ebiakasibwa namakhono kabwe abeene.

⁹Buli mundu alatutuyibwa nende okhufimbibwa omurwe. Iwe OMWAMI Nyasaye shiolababeela obwonooni bwabwe tawe.

¹⁰Balebisa mutsimbinga tsiomutsinyanda tsiomubikulu, nende okhuyaba obwina hasi nibateema okhwilukha okhurula khubunyali obwa OMWAMI Nyasaye, nende khuluyalilwe.

¹¹Inyanga yitsanga olwa okhwichinjimisia khwabandu khwakhakamibwe, khandi injinia yabwe yakhasasibwe. Ne OMWAMI Nyasaye yenyene niye owakhahebwe oluyali.

¹²Khunyanga eyo, OMWAMI Nyasaye, omwene mahe alitutuyia abandu bobunyali boosi, boosi abokhwichinjimisia nende abeinjinia.

¹³OMWAMI Nyasaye alirema nakwisia emisaala chiemisiita echia Lebanoni chiosi, nende emiruba chieshialo shia Bashani chiosi.

¹⁴Alikwisia nakwalaasia ebikulu ebirambi nende ebimbichiti,

¹⁵halala nende eminaara emirambi chiosi nende amasiisi akasirwa koosi.

¹⁶Aliinikha munyaanza tsimeeli tsikhongo tsia Tarishishi, etsiakasibwa obulayi muno.

¹⁷Okhwichinjimisia khwabandu khwakhahwe ne injinia yabwe niyisasibwa. OMWAMI yenyene niye oulihebwa oluyali khunyanga eyo.

¹⁸Ebifwanani biakharusibweho biosi pe.

¹⁹Abandu baliilukha nibebisa mutsimbinga tsiomutsinyanda, nende mubwina hasi. Baliteema okhwilukha okhurula khubunyali nende oluyali lwa OMWAMI Nyasaye, olwa alitsa okhutechesia eshialo.

²⁰Olwa inyanga eyo yakhoole, balisukuna ebifwanani biabwe bieifetsa nende bieitsahabu, ebia bali nibekaasilia khulwa okhubinamila, balibileshela tsifukho nende amanyinya.

²¹Olwa OMWAMI Nyasaye alitsa okhutechesia eshialo, abandu baliilukha nibebisa mutsimbinga nende mutsinyanda, nibateema okhwilukha okhurula khwirumalie, nende okhwifisa okhurula khubunyalibwe nende oluyalilwe.

²²Shimulesika omundu namundu ta, okhuba ye noweinganga shiina khwinywe?