Read wanga ISAYA 21 Bible Online

ISAYA 21 - wanga bible

ISAYA 21

¹Kano niko amakhuwa amasiro karumbulwa khu Babuloni, shinga butswa eshimbalukusi shihutsanga okhurula mushitsiimi shiemulambo, nolwa amatinyu kalitsa okhurula mushialo shiamariisia.

²Emanyiibwe lilolelo litinyu, eliobukhobani nende obumululwi. Inywe abelihe ba Elamu, seere! Inywe abelihe ba Media, botokhane amatookho. Ndalakamia amanyakhano koosi kelihanga lia Babuloni liareera.

³Khulweshio lilolelo elo linzitsusiyemwo oburi, nende obutsunwi obunji, shinga bwomukhasi oulumwa inzibula. Obutsunwi obwo nobululu muno, shienyala okhuhulila, kata okhulola eshindu shiosi tawe.

⁴Omwoyo kwanje kuhenda mushilifu, nayo indenga nende oburi bindiilile. Obwile bwa ndikombilenje, bundeeriire okhutechela.

⁵Mwilolelo elo enduutsi ebiokhulia nibireenjeekhwe khumeesa, emikeka nichialilwe, nabo abacheni nibaliitsanga nende okhunywa. Ne mubwangu obwo abakhongo belihe nibalakwa bari, “Buushe bwangu, recheshe tsingabo tsienywe!”

⁶Mana OMWAMI Nyasaye niyamboolela ari, “Tsia orecheshe omulindi, mana omuboolele aboolele abandu ka yetsa okhulola.

⁷Naba nalola abandu bokhuchendela khutsifarasi nibetsanga babili babili, nabo abandi nibali khutsisishili nende khutsingamia, omuboolele abahenjelesie obulayi.”

⁸Mana omulindi oyo nalanjilisia nomwoyo omukhongo naboola ari, “Omwami ndakhasinjila neninda habundu aha ndareebwa okhulinda eshilo neshiteere!

⁹Lole, abokhuchendela khutsifarasi mbabo, betsanga babili babili.” Omulindi oyo naboolela abandu ari, “Litookho lia Babuloni lisasibwe! Ebifwanani biabanyasaye ba benamilanga bikwile hasi.”

¹⁰Inywe abandu banje ba Isiraeli, inywe abaahulwa nende okhuseleetswa shinga ingano, bulaano emalile okhumuboolela amakhuwa amalayi kembuliile okhurula khu OMWAMI Nyasaye omwene mahe, Nyasaye wa Isiraeli.

¹¹Kano niko amakhuwa amasiro karumbulwa khu Edomu. Embulilanga omundu niyananjilisia okhurula Edomu naboola ari, “Omulindi, nishiina eshiliho eshicheni eshilo shino? Shiina eshiliho eshicheni eshilo shino?”

¹²Nasi omulindi emukalusia endi, “Mukamba kwitsanga, nebutswa eshilo shiletsa khandi. Niwenya okhureeba khandi, tsia mana okalushe oreebe.”

¹³Kano niko amakhuwa amasiro akarumbulwa khushialo shia Arabia, Inywe abandu ba Dedani, mukhupe tsikambi mushitsiimi shia Arabia,

¹⁴Inywe abeshialo shia Tema, bahelesie abobuloho bulia amaatsi, nabo abelukha okhurula mushialo shiabwe mubahelesie shiokhulia.

¹⁵Okhuba belukha okhwihonokosia khutsinganga etsirecheekhwe okhubafumira, khubuyingo oburecheekhwe okhubalasa, belukha okhurula khubulwani.

¹⁶Okhuba OMWAMI Nyasaye yamboolela ari, “Omuyika nikushili okhuhwa, oluyali lwosi lweshialo shia Kedari lulahwa.

¹⁷Abalatong'a mubelihe ba Kedari abasitsa bokhulasana nobuyingo balaba batiiti muno. Nolwa isie OMWAMI Nyasaye wa Isiraeli emboola.”