Read wanga ISAYA 22 Bible Online

ISAYA 22 - wanga bible

ISAYA 22

¹Kano niko amakhuwa amasiro karumbulwa khwibanda lilangwa mbu, Libanda liamalolelo. Eshiikholekhanga nishiina iwe Yerusalemu? Mbushiina abandu boosi nibaniinile khubilama bietsinzu tsiabwe?

²Mbushiina nibakhupanga tsingalakala tsiokhwikhoya? Mbushiina litookho liosi nilisaangaalile? Abandu benywe shibafwile khulwa olukanga ta, kata nibalwananga mwihe tawe.

³Abemilisi benywe belihe beluushe boosi okhurula mwihe, ne nibatiilwa nibashili okhulasa oluyingo kata lulala. Abandu benywe abatiilwa bakholwa abahambe, kata nibelukha omusuku wabwe nashili ehale.

⁴Khulweshio ndamuboolela endi, “Ndeshe embe, ndeshe ndikhuule obululu, mulateema okhuuhotselesia khulwa okhusasibwa khwa abandu banje tawe.”

⁵Okhuba leelo OMWAMI Nyasaye, okhureerere amanyakhano, obukoyani nende amariisia mwibanda lilangwa mbu, Libanda lia Amalolelo. Amasiisi kelitookho liefwe kakwisiibwe hasi, ne okhuhaaba khwabwe khuhulilikha okhuula mubikulu.

⁶Abelihe okhurula mushialo shia Elamu betsa nibaniinile khutsifarasi nibemanuule. Bali nobuyingo nende tsimbeko. Nabo abelihe okhurula mushialo shia Kiri barechekha ebikhumba biabwe.

⁷Amabanda amanulu ka Yerusalemu ketsuulemwo amakaari kelihe nende abalwani bokhutsifarasi, abarandile imbeli webiliibwa.

⁸Tsingoba tsia Yuda tsiosi tsirusiibweho. Ne khunyanga eyo mwatsia okhukhaaba ebimanulwa biali nibiabiikhwa munzu yomuruchi yili mumutsuru,

⁹ne nimulola ebibanga ebinji bielitookho lia Daudi ebienya okhwikalwa; mwebiishila amaatsi mwitiba liemwalo.

¹⁰Mwahenjelesia tsinzu tsia Yerusalemu, nimulikulula etsindi khulwa okhuralisia olukoba.

¹¹Khandi mwakaasia litiba hakari wetsingoba tsibili khulwa okhwikalila amaatsi okhukholomokha okhurula mwitiba likhulu. Nebutswa shimwayililisiakhwo khu Nyasaye wakakhola amakhuwa ako, kata okhwitsulila wakaloosia khale tawe.

¹²Khunyanga eyo, OMWAMI Nyasaye omwene mahe yali niyenyile mbu mwikhuule nimulila, mubeche liswi lienywe nimwifwala tsingubo tsiamakunia;

¹³nebutswa inywe mwatsekha nimwikhoya. Mwasinza tsing'ombe nende okhwira amakondi, nimulia inyama nende okhunywa idivai. Mwekhoya nimuboola muri, “Chende khulie nikhunywa, shichila mukamba nakhufwe!”

¹⁴OMWAMI Nyasaye, omwene mahe yandoleshela niyamboolela ari, “Toto mwene, shibalaleshelwa obumayanu buno tawe okhuula olwa bakhafwe.” Nolwa OMWAMI Nyasaye omwene mahe aboola.

¹⁵OMWAMI Nyasaye, omwene mahe yamboolela mbu enzie khu Shebuna, omusinjilili wabomunzu yomuruchi emuboolele endi,

¹⁶“Opaaranga mbu niwe wina? Abekhobo hano nibabo wina abachila noyaba eshilindwashio omwene mulwanda luno?

¹⁷Onyala okhwilola mbu oli omukhongo nebutswa OMWAMI Nyasaye alakhubukula nakhufuuba ehale obutinyu.

¹⁸OMWAMI Nyasaye nakhubukule shinga oubukula omupira nakhufwinya nende okhukhusukuna mushialo eshibambalifu. Wakhafwile ebweneyo hambi nende amakaari ka weyitsialilanga. Oli eshifimbwa murwe khubeinzu yomwamiwo.

¹⁹OMWAMI Nyasaye alakhurusia khushifumbishio shioluyali, khandi alakhwishia hasi okhurula khubukhongobwo.”

²⁰OMWAMI Nyasaye naboolela Shebuna ari, “Khunyanga eyo ndakhalanje omukhalabani wanje Eliakimu, omusiani wa Hilikia.

²¹Khandi ndakhamufwale ikanzuyo nemuboha olukhandalwo, nende okhumuhelesia obunyalibwo bwosi. Yakhabe samwana abandu ba Yerusalemu nende ba Yuda.

²²Ndakhamuhelesie obunyali bwosi hasi womuruchi, ouli womulwibulo lwa Daudi. Ndakhamuhelesie obunyali khu tsifungwo tsieinzu ya Yuda, ne shiosi shiosi eshia yekula abulaho oushiikala, nashio shiosi shiosi eshia yekala abulaho oushikula.

²³Khandi ndakhamuralisie obutinyu shinga eshibambo, naye yakhabe eshinoko shioluyali khubeinzuye boosi.

²⁴Nebutswa abandu boosi nende abekhobe, abakhongo khubatiiti, bakhabe omusiiko omusiro khuye. Bakheleete khuye shinga olwa isiongo nende eshikaye bileetanga khushichibi.

²⁵Khunyanga eyo, eshibambo shiali nishiakhomwa obutinyu habundu washio shiakharemakwe nishikwa. Eshio nishio eshiakhabe eshiakamo shiemisiiko chiosi eshiarebwa khushio.” Nolwa OMWAMI Nyasaye omwene mahe aboola.