Read wanga ISAYA 23 Bible Online

ISAYA 23 - wanga bible

ISAYA 23

¹OMWAMI Nyasaye yarumbulila litookho lia Tiro naboola mbu khupe tsimbungu nimwikhuula inywe abakholi bomutsimeeli, okhuba olukoba lwenywe lumalile okhusasibwa. Olwa tsimeeli tsienywe tsichelela okhurula Kupuro namuboolelwe amakhuwa ako.

²Mwihotselesie inywe abamenyanga khulukongo lwokhunyanza, inywe abakholi bobukhala ba Sidoni. Abarume benywe bambukha inyaanza,

³nibelema khumaatsi amanji. Inganga yenywe yali imele okhurula Shihori, ebichese biomwalo kwa Nile, mwali abakholi bobukhala baamahanga kandi.

⁴Ofimbwe omurwe iwe Sidoni, okhuba inyanza nende olusiba lwayo biboola biri, “Isie shindalumwakhwo inzibula kata okhwibulakhwo omwana yesi ta. Eshili okhukhusiakhwo abaana abasiani kata abakhaana tawe.”

⁵Kata olwa abandu ba Misiri bahulila, balahenda emioyo muno mbu Tiro limalile okhusasibwa.

⁶Mwambushe mutsie Tarishishi, khupe tsimbungu inywe abamenya khulukhalachinga lweinyanza.

⁷Toto lino nilio litookho lisangafu lia Tiro, eliombakhwa tsinyanga tsiakhale, eliarumanga abandu okhutsia okhumenya injelekha weinyanza?

⁸Niwiina owali nelichoomo liokhukhola kano koosi khu Tiro, litookho lioburuchi khandi liabakholi bobukhala balio balinji abandu boluyali khushialo?

⁹OMWAMI Nyasaye omwene mahe niye owali nelichoomo liokhukhola ako. Yali nelichoomo liokhukhola ako, kho mbu arusieho obwichinjimisi bwalio bwosi, nende khulwa okhufimbia abandu balio aboluyali omurwe.

¹⁰Tsie mulime emikunda chienywe inywe abamenya Tarishishi, okhuba tsimeeli tsienywe shitsilasinjila hano khandi tawe.

¹¹OMWAMI Nyasaye anyiilile omukhonokwe khunyanza, khandi atechesiye amahanga koosi. Alachilisiye mbu tsingoba tsiabandu ba Kanani tsisasibwe.

¹²Iwe Sidoni okhwikhoyakhwo khuhwele, abandubo basandibwa. Kata nibelushila Kitimu, shibalabakhwo nomulembe tawe.

¹³Lole, eshialo shia Babuloni, abandu bashio shibashiliho khandi ta, Abandu ba Asiria bashikhola okhuba eshimenyo shietsisolo nabulimo. Basinjisiamwo eminaara chiabwe, ne nibakwisia tsingoba tsiabandu ba Babuloni, nende okhusasia eshialo eshio.

¹⁴Khupe tsimbungu nimwikhuula inywe abakholi bomutsimeeli, shichila litookho lienywe limalile okhusasibwa.

¹⁵Inyanga yitsanga olwa litookho lia Tiro liakhebililwe khulwemiyika amakhumi musafu, shinga emiyika chiobulamu bwomuruchi. Nebutswa olwa emiyika echio chiakhahwe, Tiro liakhabe shinga olwa kaboolungwa mulwimbo lwomukhasi omutamba mbu,

¹⁶“bukula litungulio, ochende mwitookho iwe omutamba owibiliilwe! Khupa obukhana niwimba tsinyimbo tsindayi, kho mbu abasaatsa bakhwitsile khandi.”

¹⁷Emiyika amakhumi musafu echio nichiakhahwa, OMWAMI Nyasaye yalifuchiliile Tiro okhukalukha khubukhala bwalio bwakhale, nalio liakhakhole obutamba namahanga kokhushialo shiosi.

¹⁸Amapesa akaliakhanyoole okhurula mubukhala obwo kakhahanwe khu OMWAMI Nyasaye. Shiliakhebiishilekhwo inganga ta, nebutswa abo abenamilanga OMWAMI Nyasaye, balikekhoonyela khulwa okhukula ebiokhulia nende tsingubo tsindayi.