Read wanga ISAYA 24 Bible Online

ISAYA 24 - wanga bible

ISAYA 24

¹Lole, OMWAMI Nyasaye alakhola eshialo okhuba eshikhaya, khandi alashikwisia likunda. Alashifumamia nende okhusasia abamenyangamwo boosi.

²Abandu boosi balakholelwa butswa nashilala, akalakwila abandu niko khandi akalakwila abesaaliisi, akalakwila ababohe niko khandi akalakwila abaami babwe, akalakwila abakholi bomunzu niko khandi akalakwila abakhaye beene tsinzu, akalakwila oukula niko khandi akalakwila oukusia, akalakwila owihosia niko khandi akalakwila owihola, akalakwila oubanza niko khandi akalakwila oubanzwa.

³Eshialo shilasasilibwa elala, nende okhukwisibwa likunda. OMWAMI Nyasaye amalile okhuboola, okhuula kalekholekha.

⁴Eshialo shiuma nishifululukha, nashio eshibala shihwelelela nishiuma. Likulu nende eshialo biosi bihwelelela.

⁵Eshialo nende abamenyamwo beyonooniye, okhuba bafunache amalako ka Nyasaye, balobile amalachilisioke, nende okhufunaka indakanoye yeinziayo.

⁶Khulweshio eshilaamo shiobubi shimulula eshialo, nabo abamenyamwo banyakhana khulwa eshikha shiobumayanu bwabwe. Khulweshio abamenyanga khushialo batitiiye, basikaale butswa abandu batuutu.

⁷Emitsabibu chiuma, nayo idivai shiyinyoolekha ta. Abalinji abasangafu, leelo babeelela.

⁸Amayoosi kelilele shikaliho ta, nabwo obuyoka bwetsisukuti bwakaame, okhutselela khwabo abekhoya khwakaame. Amayoosi kelitungu kakaame.

⁹Shibashinywetsanga idivai nibemba khandi ta, nako amalwa kalaraanya muno khwabo abakanywa.

¹⁰Litookho lieinduli lisasiibwe, buli inzu yikaalwe, mbu omundu yesi yesi aleshe okhwinjilamwo.

¹¹Abandu baayula nibalila khumihanda shichila babula idivai, okhwikhoya khwosi khwakaame, khandi obusaangaafu bweshialo buhweleho.

¹²Litookho likwiile likunda, nabio ebilibwa bialio bifunakasibwe.

¹³Shinga olwa emiseituni chitong'anga butswa mituutu khumusaala, noho tsinzabibu tsinduutu butswa khumutsabibu olunyuma lwelichesa, nolwa kalaba kario khushialo shiosi, mbu abandu batuutu butswa nibo abalatong'aho abalamu.

¹⁴Abo abalasikala balachinguula emioyo chiabwe, balemba nibekhoya. Okhurula mumbo balarumbula shinga olwa OMWAMI Nyasaye ali omukhongo.

¹⁵Nabo abali ebukwe baletsoomia OMWAMI Nyasaye, abandu bamenyanga khundulo weinyanza baletsoomia OMWAMI Nyasaye, Nyasaye wa Isiraeli.

¹⁶Okhurula ehale khundulo weshialo khuhulilanga tsinyimbo tsiokhwitsoomia, tsinyimbo tsiokhwitsoomia Nyasaye ouli Omulunjishi. Nebutswa isie emboola endi, “Embula obunaayi! Endi mushilaamo shiobubi, Okhuba abakhobi batsiilililanga nobukhobani bwabwe, nabwo obukhobani bwabwe butsiililila okhwimeeta.”

¹⁷Amariisia, obuko nende emibero, bimulindiliile inywe abamenyanga khushialo.

¹⁸Yesi yesi outeema okhwilukha okhurula khumariisia ako, alakwa mubuko, naye outeema okhutikulukha okhurula mubuko obwo alatiilwa nomubero okwo. Okhuba ifula yemikhula yilakwa okhurula mwikulu, nachio emise chieshialo nichirenga.

¹⁹Eshialo shiatiishemwo, khandi shikabukkhanemwo nishisikukha.

²⁰Eshialo shihutumana shinga omundu oumeelile idivai, khandi shireesibwa eyi nende eyi shinga akhatsu akhahutswa neimbumbuyeka. Shisitohelwe nobusiro bwobumayanu bwashio, shikwitsanga ne shishilabuukha khandi tawe.

²¹Khunyanga eyo, OMWAMI Nyasaye yakhahane eshinyasio khubelihe liomwikulu, halala nende khubaruchi beshialo.

²²Bakhabunjelesibwe boosi halala shinga ababohe mubuko, bakhekalilwe mumbohe khulwa tsinyanga tsinyinji, ne olunyuma lwetsinyanga etsio bakhahelesibwe eshinyasio.

²³Omwesi kwakhelime ti, nalio eliuba liakhakwe eshilima, okhuba OMWAMI Nyasaye omwene mahe yakharuche mu Yerusalemu khushikulu shia Zayuni, alimanyisia oluyalilwe khubemilisi babandu.