Read wanga ISAYA 25 Bible Online

ISAYA 25 - wanga bible

ISAYA 25

¹Iwe OMWAMI Nyasaye, niwe Nyasaye wanje, ndalakhuhelesia oluyali nende okhwitsoomia eliiralio, okhuba wakholile akamakana. Iwe, woosiye mubwisiikwa koosi aka wali niwaloosia khale okhukhola.

²Okhuba wakholile litookho okhukwa eshibunjikho, litookho liolukoba okhukwa likunda. Itookho eyombakhwa nabarende shiyishiiliho khandi ta, shiyakhombakhwekhwo khandi tawe.

³Khulweshio abandu bamahanga kobunyali bakhakhwitsoomie iwe, nako amatookho kamahanga kamariisia kakhakhuhelesie oluyali iwe.

⁴Okhuba iwe oli olukoba lwabamanani, khandi olukoba lwabatakha munyanga tsiabwe tsiamatinyu. Oli obwilushilo bwabwe munyanga tsieimbumbuyeka, eshiinikha shiabwe munyanga tsiomubasu omululu, okhuba okhuhutsa khwabamariisia khuli shinga imbumbuyeka yihutsanga khwisiisi,

⁵khandi bali shinga omubasu mushialo eshihangalafu. Nebutswa iwe OMWAMI Nyasaye, wakaminjia amahababa kabasuku befwe, khandi oholelesinjia obuyoka bwabandu abalulu, shinga olwa lileesi lireeranga eshiinikha, khunyanga yomubasu omululu muno.

⁶Khushikulu shia Zayuni shino, OMWAMI Nyasaye omwene mahe alarechekha lisabo liebiokhulia ebilayi, khulwa abandu boosi khushialo. Lisabo lieidivai indayi, nende ebiokhulia ebinulu.

⁷Khushikulu shino OMWAMI Nyasaye alarusiaho eshibeela shili khubandu boosi, nende khumahanga keshialo koosi.

⁸OMWAMI Nyasaye alarusiaho lifwa inziayo. Aleya amasika mumoni mwabandu boosi, nende okhurusiaho mushialo shiosi eshifimbwa murwe shiabandu banyoola. Nolwa OMWAMI Nyasaye aboola.

⁹Khunyanga eyo, abandu boosi baliboola bari, “Lole! Uno niye Nyasaye wefwe. Khwamuliindililenje mbu akhuhonie. Ne bulaano leshe khusangaale nende okhwikhoya, okhuba akhuhoniye.”

¹⁰OMWAMI Nyasaye alaliinda eshikulu shia Zayuni, nebutswa abandu ba Moabu balasenachilwa hasi shinga lwobunyasi busenachilwa hasi mwitikho liamasingo.

¹¹Balibambula amakhono kabwe shinga olwa abeelema babambulanga amakhono kabwe nibeelema khumaatsi. Nebutswa Nyasaye alibafwimbia omurwe halala nobusitsa bwa amakhono kabwe.

¹²Nyasaye alisasia tsingoba tsia Moabu halala namasiisi katsio amarambi. Alikakwisia hasi mulufu.