Read wanga ISAYA 26 Bible Online

ISAYA 26 - wanga bible

ISAYA 26

¹Khunyanga eyo, abandu balimba olwimbo mushialo shia Yuda nibaboola bari: Litookho liefwe neliamaani! Nyasaye omwene alindanga olukoba lwalio.

²Mwikule ebiliibwa bielitookho, muleshe lihanga liobulunjishi, khandi liabandu balio bakholanga kahabwene benjilemwo.

³Iwe OMWMI Nyasaye ohananga omulembe kwatoto, khu owamakanike kali khwiwe, khandi oukhwisikanga iwe.

⁴Mwisichenje OMWAMI Nyasaye obushia nobushia, okhuba OMWAMI Nyasaye niye olwanda lwefwe lweinziayo.

⁵Okhuba atuutuyiyie abokhwichinjimisia khandi asasiye litookho liabwe liamaani. Afunache amasiisi kalio nende okhukatubula nikakwa olufu.

⁶Abatakha balisenachila hasi, abamanani balitubanjila hasi nebilenje biabwe.

⁷Injila yomulunjishi neingololofu, OMWAMI Nyasaye akwalasia omuhanda kwomulunjishi.

⁸Munjila yobukhalachibwo iwe OMWAMI Nyasaye, khukhuliindililanga. Okhwitsulila eliiralio nikhwo okhwemioyo chiefwe chikomba.

⁹Omwoyo kwanje kukhwikomba mushilo, omwoyo kwanje kwomukari kukhukhaaba neshinani. Okhuba lwobukhalabanibwo bubetsangaho mushialo, nilwo olwa abamenyangamwo beekanga obulunjishi.

¹⁰Kata nokholela abandu ababi amakhuwa amalayi, shibanyala okhweka okhukhola akobulunjishi tawe. Kata mushialo shiabandu abalunjishi shino, bashikholanga butswa obumayanu. Baloba okhufuchilila obukhongobwo.

¹¹OMWAMI Nyasaye omukhonokwo kuchinguushile ikulu khulwa okhubahelesia eshinyasio, nebutswa shibakulolanga tawe. Lekha balole obuheelibwo khubandubo mana bafimbwe omurwe. Lekha omulilo kusambe abasukubo.

¹²OMWAMI Nyasaye iwe olakhureerela omulembe, shichila koosi akakhwakhola, niwe owakhukholela.

¹³Iwe OMWAMI Nyasaye wefwe, ifwe khwarukungwa nende abami bandi, nebutswa iwe wenyene niwe OMWAMI Nyasaye wefwe.

¹⁴Abo bamala okhufwa, ne shibalimenya khandi tawe. Abo abamala okhufwa shibalibuukha khandi tawe, shichila iwe wamala okhubahelesia eshinyasio nende okhubasasia. Mana abulaho oubetsulilanga tawe.

¹⁵OMWAMI Nyasaye iwe wakhongoyiye lihanga liefwe, nomeeta okhulibambula tsimbeka tsiosi, ne kano kakhureereere iwe oluyali olukhongo.

¹⁶OMWAMI Nyasaye iwe wahaana eshinyasio khubandubo, ne nibali mukhutsunwa bakhuhabile iwe.

¹⁷Iwe OMWAMI Nyasaye wakhukholile ifwe okhuhaba shinga lwomukhasi ahabanga nalumwa inzibula.

¹⁸Khwalumwa inzibula khandi nikhutsunwa muno, nebutswa shikhwayebulakhwo eshindu shiosi shiosi tawe. Khushili okhureererakhwo eshialo shiefwe obuhuli bwosi bwosi, kata khubulakhwo akakhwahesiiye ta.

¹⁹Nebutswa abandubo abafwa balalamukha! Emilambo chiabwe chilabuukha. Abo boosi abakonanga mubilindwa biabwe balabuukha nibeemba khulwa okhwikhoya. Shichila liimelio lili shinga liime liobulafu, nashio eshialo shilalamusia abo abamala okhufwa khale!

²⁰Inywe abandu banje, injile mutsinzu tsienywe mana mwiyikalilemwo. Mwifisemwo khulwa oluhoono lutiti okhuula olwa liruma lia Nyasaye lilaba nilihwele.

²¹Lole, OMWAMI yetsanga okhurula mushimenyoshie mwikulu. Yetsanga okhuhelesia abandu bokhushialo eshinyasio khulwa obwonooni bwabwe. Eshitsayi shiaratsibwa mushialo masilisi shilamanyikha. Eshialo shishilatsiililila okhufisa abo abeerwa tawe.