Read wanga ISAYA 27 Bible Online

ISAYA 27 - wanga bible

ISAYA 27

¹Khunyanga eyo, OMWAMI Nyasaye aliikhoonyela olukangalwe olumemu khandi olwamaani khulwa okhuhelesia okusolo Lewiatsani eshinyasio. Okwo nikwo okuyokha okukhongo okumoolanga nikwikuoniola. Khandi aliikhoonyela olukanga olwo okhwira okuyokha okwo okumenyanga munyanza.

²Khunyanga eyo, OMWAMI Nyasaye aliboola khumukundakwe omulayi okwemitsabibu ari,

³Nisie oulindanga omukunda kwanje, khandi oukutsushililanga amaatsi buli lwosi. Ekulindanga eshilo neshiteere kho mbu, omundu yesi alakusasiakhwo tawe.

⁴Isie shieshili neliruma khumukunda okwo tawe. Nebutswa nikwakhabeele mbu kulimwo amarakalu nende ebisisia, nolwa ndakhaharulile okhukulwana nende okhubisamba biosi pe.

⁵Nebutswa abasuku babandu banje nibenya mbu ebalinde, okhuula bakaasie omulembe ninasi. Toto mwene okhuula bakasie omulembe ninasi.

⁶Mutsinyanga tsitsanga, abandu ba Isiraeli balilaanda emisi, abolwibulo lwa Yakobo balisebukha. Eshialo shiosi shilitsulamwo ebiamo biabwe.

⁷OMWAMI shiyahelesiye abandu ba Isiraeli eshinyasio eshilulu shinga eshia yahelesia abasuku babwe tawe, kata abandu babwe abeerwa shibali abanji shinga abasuku babwe tawe.

⁸OMWAMI Nyasaye yahelesia abandube eshinyasio khulwa okhubayila mubuhambe. Yabarusiayo nomuyeka omululu okuhutsanga okhurula ebukwe.

⁹Nebutswa abandu Abaisiraeli balabeelwa obwonooni bwabwe olwa barusiaho nibatubula amachina kebimalilo biemisango biabamahanga. Mana barusieho ebimalilo ebiemisango biokhusambilakhwo obubane nende ebifwanani biomunyasaye Ashera biosi.

¹⁰Okhuba litookho liasirwa likwile likunda. Lileshilwe shinga eshitsiimi eshikhaya. Likwile olwayilo olwa eshimoosi ebweneyo niyo ewa shilayanga nende okhuhuluushila.

¹¹Olwa tsisaka tsialio tsilaba nitsinialile, khandi nitsifunakwe, abakhasi balatsibukula nibatsikhoonyela shinga tsikhwi. Okhuba bano nabandu ababula obumanyilisi, khulweshio Nyasaye wabalonga shialabalolela eshisa tawe Nyasaye owabakhola shialababeela tsimbabasi tawe.

¹²Khunyanga eyo, okhurula khumwalo kwa Yufurate okhuula khulwakho lwa Misiri, OMWAMI alibunjelesia abandube mulala shia mulala shinga butswa omundu yeluulanga ingano okhurula khumukhuutsi.

¹³Khunyanga eyo, olwika olukhongo lulikhupwa khulwa okhulanga Abaisiraeli boosi abali mubuhambe mushialo shia Asiria nende eshia Misiri okhuchelela mushialo shiabwe. Balichelela okhwinamila OMWAMI khushikulushie eshitakatifu eshili Yerusalemu.