Read wanga ISAYA 28 Bible Online

ISAYA 28 - wanga bible

ISAYA 28

¹Muli mushilaamo shiobubi inywe abechinjimisi khandi abameesi belihanga lia Efuraimu, oluyali lwenywe luhwelelela shinga eshimuli eshiniala, oluyali lwali nilwamanyikha muno mwibanda linulu lia abameesi beidivai!

²OMWAMI Nyasaye yeyahuliile omundu wobunyali khandi wamaani; ouli shinga ifula yamachina nende yeimbumbuyeka, khandi shinga omuyembo kweifula omukhongo okusasinjia, alabakhuyunga hasi khushialo nomukhonokwe.

³Obwichinjimisi nende obumeesi bwabandu ba Efuraimu, bulasenachilwa hasi nebilenje.

⁴Oluyali lwabwe luhwelelela shinga eshimuli eshiniala, oluyali olwarukanga mwibanda linulu, lulaba shinga amakhuyu amengu karanjililanga lichesa nilishili okhuula; olwomundu akalolanga, akanokolanga nakalia bwangu.

⁵Khunyanga eyo, OMWAMI Nyasaye omwene mahe yakhabe shinga olusimbi lwoluyali, khandi shinga eshilemba shiobukhongo, khubandube abakhahonokoshe.

⁶Alikhola abakhalachi beshiina okhukhalaka eshiina habwene, nabo abalindi bokhubiliibwa bielitookho alibameeta amaani.

⁷Kata abalakusi nende abesaaliisi boosi bameelile idivai, bachenda nibakoyana khulwa okhumeela idivai; toto abesaaliisi nende abalakusi bameela amalwa amalulu, bakoyasiibwe nende idivai, bachenda nibakoyana khulwa okhunywa amalwa amalulu; Amalolelo kabwe shikali akahabwene ta, khandi besichirala mubukhalachi bwabwe.

⁸Tsimeesa tsiosi tsiitabaliile amasale, buli habundu nihamayanu.

⁹Bandechelesinjia nibareeba bari, “Kho uno nayechesie wiina akobumanyilisi? Niyenoosie wiina oburume? Efwe khuli abaana, abarusiibwe khulubeele noho?

¹⁰Akhwechesinjia shinga abaana, lilako buli lilako, olunyaali buli olunyaali, hano shiahatiiti, halia shiahatiiti.”

¹¹Nebutswa bulano, OMWAMI Nyasaye alaboola nabandu bano, okhubirira mubandu ababoolanga olulimi lundi, khandi okhubirira mululimi olucheni.

¹²Kata kario omwene yali niyabasuubisia naboola ari, “Ndalamuhelesia obuhuluushi; ndalahuluusia abo abachoonyile; hano niho habundu hokhuhuluushila.” Nebutswa shibamuhulila ta.

¹³Kho niko akachila OMWAMI Nyasaye alabeechesia, lilako buli lilako, olunyaali buli olunyaali, hano shiahatiti, halia shiahatiti. Balateema okhutsia imbeli, nebutswa balakwila omukongo, balafunakwa, nibatiilwa nende okhuyilwa mubuhambe.

¹⁴Khulweshio murecheresie likhuwa lia OMWAMI Nyasaye inywe abandu beinjinia, abarukanga abandu ba Yerusalemu.

¹⁵Inywe mwiyitsialanga nimuboola muri, “Khwakhola indakano nende lifwa, khwafuchilisania nende emakombe; olwa eshinyasio shiobusasishi shiitsa, shinashiitse khwifwe ta. Shichila obubeeyi nishio obwilishilo bwefwe, nabwo obukaati nibwo eshiinikha shiefwe.”

¹⁶Khulweshio, OMWAMI Nyasaye aboola ari, “Lole, erenjekha mu Zayuni lichina lieisiilo, lichina eliaralila obulayi, lichina liobukusi, elili omuse kwatoto. Lichina tsana liahandikwakhwo liri, ‘Ousuubila, shialaria shiosi shiosi ta.’

¹⁷Khandi ndalekhoonyela obukhalachi bwahabwene okhuba eshichelo shianje, ndalachela nindikhoonyela obulunjishi.” Ifula yamachina yilarusiaho obubeeyi bwamwilushilanga, nachio emikhula chiamaatsi chilakholomosia tsinzu tsiamwiyikamangamwo.

¹⁸Nilwo olwa indakano ya mwakhola nende lifwa yakhakalukhasibwe, khandi okhufuchilisania khwenywe nende emakombe khwakharusibweho, olwa eshinyasio eshikhongo shiobusasishi shiakheetse, shiakhamuusie hasi.

¹⁹Buli olwa eshinyasio eshio shiitsa, shiakhamwitsekhwo; nashio shiakheetse buli mumabwibwi, mushiteere nende mushilo; okhuhulila butswa oburume buno kakhabe amariisia.

²⁰Kakhabe khwinywe shinga omundu outeema okhulaambisia ebilenje mushitali shimbichiti muno, noho shinga outeema okhwifuunikha neshitonye eshimbichiti shiomurungeti.

²¹OMWAMI Nyasaye alalwana lihe shinga olwa yalwana khushikulu shia Perazimu, alatiilwa noburuma shinga obwa yali ninabwo mwibanda lia Gibeoni. Alakhola eshikholeshie shiokhuchenya, alakhola emilimochie chiamakana!

²²Khulweshio mulalechelesia obuchetsiyi bwanje tawe. Nimubulechelesia, bulaba obutinyu muno khwinywe okhwihonokokha. Okhuba emalile okhuhulila lilako elia OMWAMI Nyasaye ounyala biosi, lilako liokhumulula eshialo shiosi pe.

²³Reche amarwi, mumbulilisie; recheresie, mana muhulile akemuboolela.

²⁴Mana omulimi oulima omukunda, atsiilililanga butswa okhukulima noho? Naye oubuusa, atsiilililanga butswa noho?

²⁵Tawe, olwa amalanga okhukubuusa, amitsangamwo tsinuuni noho tsing'ooli, noho arakamwo ingano, nende ishayiri mumikhoosi, ne khutsinzakho araakakhwo imwo yindi.

²⁶Omulimi oyo yamanya okhukhola emilimochie obulayi, shichila Nyasayewe amwibaalilanga.

²⁷Tsinuuni shitsihuluungwa nende eshihulilo eshimemu ta, kata omukurutumu kwelikaari shikuserenjesibungwa khutsing'ooli tawe, habula tsinuuni tsihuluungwa nende olusaala, natsio tsing'ooli tsuhuluungwa nende omuhulilo.

²⁸Imele yobusuma yihuluungwa; nebutswa shiyihuluungwa yitubushila elala tawe, omukurutumu kwelikaari nende tsifarasi kuserenjesibungwakhwo, nebutswa shikuchitubulilanga elala tawe.

²⁹Obuchesi obwo burula khu OMWAMI Nyasaye omwene mahe; Obuloosiebwe nobwamakana, khandi obuchesibwe nobulamba.