Read wanga ISAYA 29 Bible Online

ISAYA 29 - wanga bible

ISAYA 29

¹OMWAMI Nyasaye aboola ari, “Iwe Yerusalemu, oli mushilaamo shiobubi, iwe litookho lia Daudi yakhupamwo ikambiye. Emiyikachio chileetsa nichibira; nawe tsiililila butswa okhukhola amasabo.

²Nebutswa isie OMWAMI Nyasaye ndalakhukhupia khushibi iwe Yerusalemu, khandi ndalakhureerera okhulila nende okhwikhuula, Yerusalemu lilaba shinga eshimalilo shiemisango eshitabaliile amalasile kabandu abeerirwe.

³Nasi ndalakhupa tsikambi tsia abelihe niikhubotokhana, ndalakhubuushilakhwo nikhuseera.

⁴Olakwisibwa hasi mwiloba mukari, olakhupa omwoyo noli mukari omwo, amakhuwako kalahulilishila hasi mulufu; Omwoyokwo kulahulilishila mwiloba shinga kweshishieno.

⁵Nebutswa abasukubo abanji balatubulwa nibakwa shinga olufu olunyushe. Abo abakhusandia balakwa shinga amakokha akatuumuukha butswa; Kano kalekholekha butswa bwangu metsukhana,

⁶Isie OMWAMI Nyasaye omwene mahe ndalakhwitsila nikhukhoonya, ndaleetsela mukhwatulukha khwelikulu, mukhurenga khweshialo, nende muluyoka olukhongo; khandi ndaleetsela mushimbalakusi, mumbumbuyeka, nende mulumemu lwomulilo kumamulanga.

⁷Mana amahanga koosi akaseeranga Yerusalemu, koosi akaliseeranga halala nolukoba lwalio nende okhulihendia omwoyo, kalakwa shinga lilooro, shinga amalolelo komushilo butswa.”

⁸Amahanga koosi akekhung'asinjia okhuseera Yerusalemu, kalaba shinga omundu weinzala yiluma, ouloora mbu alitsanga, nebutswa abuukha mundoolo inzala niyishimulumanga. Kata shinga wobuloho bulia, ouloora mbu anywetsanga amaatsi, nebutswa abuukha mundoolo nashihalaashe butswa.

⁹Tsiililile butswa okhwisiluhasia nimuba abasilu, mwibofusie tsimoni nimuba ababofu! Tsiililile butswa okhumeela, kata nikhulali okhweidivai ta; chende butswa nimukoyana, kata nimulanywele idivai ta!

¹⁰OMWAMI Nyasaye amureereere tsindoolo tsisiro, abofusiye tsimoni tsienywe, inywe abalakusi, khandi afuuniishe emirwe chienywe, inywe abaroobi.

¹¹Kho eshisina shiamalolelo kano koosi shiibisile khwinywe shinga amakhuwa kali mushitabu eshikanye, eshiabohwa obutinyu. Olwa bashihaana khumundu wamanya okhusooma nibamuboolela bari, “Khusoomelekhwo eshitabu shino,” naye akalusiamwo naboola ari, “Shienyala okhushisooma ta, okhuba shiabohwa obutinyu.”

¹²Ne olwa bashihaana khumundu yesi owakorwa okhusooma, bamuboolele bari, “Khusoomelekhwo eshitabu shino,” naye abakalusiamwo nababoolela ari, “Isie shiemanyile okhusooma tawe.”

¹³OMWAMI Nyasaye aboola ari: “Abandu bano banzinamilanga mumakhuwa butswa, banzinamilanga khulwa okhwirobootsa butswa amakhuwa, nebutswa emioyo chiabwe chili ehale ninasi, okhunzinamila khwabwe nokhwokhuloonda butswa amalako, aka beeka okhutiila mumurwe.

¹⁴Khulweshio, ndalakholela abandu bano amakhuwa kokhuchenya, amakhuwa kokhuhuchisia khandi akokhuchenya. Obuchesi bwabachesi babwe bulakhamiukha, nabwo obumanyilisi bwabandu babwe bulabiswa.”

¹⁵Muli mushilaamo shiobubi inywe abamubisanga OMWAMI Nyasaye aka mwenya okhukhola, abakholanga amakhuwa kenywe mushiilima, inywe ababoolanga muri, “Shialiho oukhulolanga ta, niwiina oumanyile akakhukholanga?”

¹⁶Inywe mufumaminjia amakhuwa. Mana omulonji welitoyi yakhekhola okhuba litoyi? Ne eshilonje shiakhaboolela owashilonga mbu, “Shiniwe owanonga ta?” Kata eshindu shiakaasibwa, shiakhaboolela owashikaasia mbu, “Shiomanyile eshindu ta?”

¹⁷Shishili butswa eshise shituutu, ne omutsuru kwa Lebanoni kwikhola omukunda kweliloba linulu, nakwo omukunda kweliloba linulu nikwikhola omutsuru.

¹⁸Khunyanga eyo, abekala amarwi balihulila amakhuwa kahandikwa mushitabu eshikanye nikasoomwa, nabo ababofu abali mushiilima, balitimbusibwa tsimoni nibachaaka okhulola.

¹⁹Abaholo balinyoola omwikhoyo okhurula khu OMWAMI Nyasaye, nabo abatakha balikhoya nibatsaatsahala mu Nyasaye, Omutakatifu wa Isiraeli.

²⁰Okhuba abasandinjia abashiabwe balaakama, abalechelesinjia Nyasaye balarusibwaho, nabo abakholanga obwonooni baleerwa.

²¹Nyasaye alamulula abachikhanga abashiabwe mushiina, nende abarekanga emibero okhutiila abakhalachi beshiina, nibaboola obubeeyi khulwa okhwikalila abalunjishi okhukholelwa akahabwene.

²²Khulweshio, OMWAMI Nyasaye, wanunula Aburahamu, aboolela aboluyia lwa Yakobo ari; “Aboluyia lwa Yakobo shibakhafwimbibwekhwo omurwe khandi ta, shibakhabekhwo netsisoni khandi tawe.

²³Olwa balilola abaana babwe, aba isie omwene ndilibahelesia, nolwa balitsoomia eliira lianje, isie omutakatifu wa Yakobo, khandi nibanzinamila nibambelesia oluyali isie Nyasaye wa Isiraeli.

²⁴Abo abashiamu mumioyo chiabwe bakhanyoole obumanyilisi, nabo ababuuluulanga balifuchilila okhwibaalilwa.”