Read wanga ISAYA 3 Bible Online

ISAYA 3 - wanga bible

ISAYA 3

¹Lole, OMWAMI Nyasaye, OMWAMI Nyasaye omwene mahe, ali ahambi okhurusiaho mu Yerusalemu nende mu Yuda, biosi ebia abandu beleetakhwo mubulamu. Alarusiaho ebiokhulia biabwe nende amaatsi kabwe.

²Alarusiaho abandu babwe boluyali, nende abalwani babwe, abayaasi babwe nende abalakusi babwe, abafumu babwe nende abakhulundu babwe.

³Alarusiaho abasinjilili belihe nende ababandu, abachetsiyi babwe nende abafumu babwe.

⁴OMWAMI Nyasaye alalekha abandu barukwe nende abaana abatiiti.

⁵Abandu balasandia abashiabwe, ababuukha shibalahelesia abakofu oluyali ta, khandi abandu ba hasi muno shibalahelesia abakhongo babwe oluyali tawe.

⁶Ebise nabiule olwa abandu bomushilibwa shilala nabaahule mulala khubo nibamuboolela bari, “Iwe oli neingubo yokhwifwala, kho olaba omwimilisi wefwe mubise biamatinyu bino.”

⁷Nebutswa naye alibakalusia naboola ari, “Isie tawe, shienyala okhumukhoonya ta, okhuba kata siesi embulakhwo eshiokhulia kata ingubo eyokhwifwala tawe, kho mulanzahule okhuba omwimilisi wenywe tawe.”

⁸Abandu ba Yerusalemu bamalile okhusasikha, nabo aba Yuda bakwiile hasi. Buli shindu shiababoolanga nende okhukhola bifukulanga OMWAMI Nyasaye. Banyekanga oluyali lwa Nyasaye habulafu.

⁹Ebiela biabakholanga bibakhalachilanga abeene eshiina. Bakholanga obwonooni habulafu shinga olwa abandu ba Sodomu bakhola, shibabufisangakhwo tawe. Bamalile okhutiba, ne abeene bereerela amatinyu kano.

¹⁰Boolela abandu abalunjishi mbu bali neikhabi, shichila bakhasangalile okhulia ebiamo biemilimo chiabwe.

¹¹Nebutswa abamayanu bali mushilamo shiobubi, akabakholela abandi leelo kalakholelwa khubo.

¹²Abandu banje basandibungwa nabaana, khandi barukungwa nabakhasi. Inywe abandu banje, abemilisi benywe bamukosinjia injila, kho muleshe okhumanya injila yokhuloondakhwo.

¹³OMWAMI Nyasaye umalile okhubukula obwiyangubwe mushiina, asinjiile okhukhalachila abandube eshiina.

¹⁴OMWAMI Nyasaye ayaasia abakhulundu nende abemilisi babandu mushina, abenjilila itookho naboola ari, “Ninywe abasasiye omutsabibu kwanje, tsinzu tsienywe tsitsulemwo ebindu biamwanuula abatakha.

¹⁵Mbushiina nimusenachila abandu banje hasi nende okhunuula abatakha ebindu biabwe? Isie OMWAMI Nyasaye Omwene Mahe emalile okhuboola.”

¹⁶OMWAMI Nyasaye aboola ari, “Lole shinga olwa abakhasi ba Yerusalemu bali neisunga. Bachendanga nibomile amakosi, nibahenga netsimoni tsiobwikombi, shibalikhwo neshifimbwa murwe tawe. Bachenda ebikhuli nibisalakana khubilenje biabwe.

¹⁷Nebutswa ndalabahelesia eshinyasio; ndalababeka emirwe chiabwe, nende okhubafwalula tsingubo tsiabwe nibasikala shichula.”

¹⁸Khunyanga eyo OMWAMI Nyasaye alirusia khubakhasi ba Yerusalemu ebindu biosi ebichilanga nibelola, nibio emikasa chiokhumikhono, ebiuma biokhumirwe, ebiomwikosi,

¹⁹nende biokhumikhono. Alirusiaho ebitambaya biabwe biokhumirwe,

²⁰tsikofia, tsiriisi tsiabwe tsiokhumikhono nende tsiomubishienje.

²¹Khandi alirusiaho tsingaka tsiabafwalanga khubitere biabwe nende mumoolu kabwe,

²²tsingubo tsiabwe tsieikitani nende tsiokhwifuubila nende ebikoyi nende tsiloloti tsiabwe;

²³tsingubo tsiabwe tsiokhulolesia mukari, nende tsieikitani indorotoro nende ebitambaya biomwikosi nende biokhumirwe.

²⁴Mushilenje shieshiuya eshilayi shieshing'ari, balahunya obubolo, mushilenje shiomushipi baleboha omukoye, ne mushilenje shieliswi eliabaswa obulayi balaba nolwaale, mushilenje shietsingubo tsindayi balafwala amatasi, likondo liabwe lilayi lilaba elieshifwimbwa murwe.

²⁵Abasaatsa bomwitookho baleerwa nolukanga, abasaatsa babwe bamaani baleerirwa mwihe.

²⁶Ebiliibwa biomwitookho bileekhuula nende okhulila amasika, nalio litookho tsana lilasikala eshikhaya.