Read wanga ISAYA 30 Bible Online

ISAYA 30 - wanga bible

ISAYA 30

¹OMWAMI Nyasaye aboola ari, “Muli mushilaamo shiobubi inywe abaana bobukhayi, inywe abakholanga kokhwenya khwenywe abeene, ne nimulakhola akokhwenya khwanje ta, abakholanga indakano ya isie ndalafuchiliile ta! Kho mumeetanga obwonooni khubundi.

²Inywe abatsitsanga Misiri, ne nimulareebile obuchetsiyi okhurula khwisie ta. Inywe abelushilanga obulindwi okhurula khumuruchi wa Misiri, inywe abakhabanga okhwishinga mushiinikha shia Misiri!

³Khulweshio obulindwi bwenywe okhurula khumuruchi wa Misiri bulaba eshifimbwa murwe khwinywe, nakhwo okhwileeta khwenywe khu Misiri khulaba okhwetsisoni khwinywe.

⁴Okhuba kata abemilisi babwe nibaba nibali mwitookho lia Zoani, nabo abarume babwe nibali mwitookho lia Hanesi,

⁵abandu ba Yuda boosi balafwimbibwa omurwe, okhubirira khubandu babula inganga khubo, abalanyala okhubahelesia obukhoonyi kata inganga yosi yosi ta, habula tsisoni nende eshifwimbwa murwe.

⁶“Oburume khushialo shiamatinyu khandi eshiamasila shia Negebu, eshialo eshilimwo tsitalanyi etsihoola, eshilimwo ebiilikoma nende tsinzokha tsiobufwisi obululu. Abamenyi bashio bachinga obuyinda bwabwe khumikongo chietsisishili, ne emiandu chiabwe baachikha khumarumba ketsingamia, bayilila abandu babula obukhoonyi khubo.

⁷Okhuba obukhoonyi bweshialo shia Misiri nobwa butswa, khandi obukhaya. Khulweshio enguliishe eshialo shia Misiri eliira mbu, ‘Okusolo okulanyala eshindu shiosi shosi tawe.’ ”

⁸OMWAMI Nyasaye yamboolela mbu ehandiche khukhabao, nende mushitabu akobukhayi bwabwe, mana kabe obuloli khubo inziayo.

⁹Okhuba nabandu abakhayi, abaana ababeeyi, abalanyala okhuhulila amechesio ka OMWAMI Nyasaye tawe.

¹⁰Baboolelanga abalakusi bari, “Shimulalole amalolelo ta,” khandi bari, “Shimulakhulakulilekhwo akahabwene ta; habula mukhuboolele butswa kokhuchamisia, mukhulakulile butswa amakhuwa kobubeeyi.

¹¹Rule khumuhanda, shiukhane murule khunjila, mulakhuboolelakhwo khandi khu ka Nyasaye Omutakatifu wa Isiraeli tawe.”

¹²Khulweshio Nyasaye, Omutakatifu wa Isiraeli, aboola ari; “Okhuba mulobile okhuhulila amakhuwa kanje, ne nimwisika obusandibwi nende obubeeyi, mana khandi nimwileeta khubio,

¹³kho, obumayanu buno buli khwinywe, shinga lisiisi lirambi, elibokoome khandi elili nolwaafwa okhurula hekulu okhuula hasi walio, elili ahambi okhulibulukha nilikwa, elia okhukwa khwalio khulaba khwameetsukhana;

¹⁴khandi okhubungulukha khwalio khulaba shinga okhubungulukha khweisiongo yomulonji, eyitubulwa obubi muno, mbu kata eshikonjio shishilanyoolekhakhwo khubitonye biayo, eshinyala okhuchinjilwakhwo omulilo okhurula mumayika, noho kata okhutayilakhwo amaatsi okhurula mwiyabo tawe.”

¹⁵Khulweshio OMWAMI Nyasaye, Omutakatifu wa Isiraeli, aboola ari, “Nimuba nimungalushila khandi nimwihotselesia mulahonibwa; nimwihotselesia nende okhwisika isie, mulanyoola amaani.” Nebutswa inywe mwaloba ako,

¹⁶nimuboola muri, “Tawe! Ifwe khulelushila khutsifarasi,” kho yilushe mutsie. Khandi mwaboola muri, “Khulelushila khutsifarasi etsia tsimbilo muno,” nebutswa abasuku benywe abamuloondachilanga baleyuula bwangu kata okhutsishila.

¹⁷Abandu benywe eshikhumila shilala balelukha khulwa okhuriisibwa nomusikaari mulala wokhubasuku benywe, ne abelihe barano bonyene babasuku benywe, balamutafia inywe mwesi, okhuula olwa mulatong'a nimuli butswa shinga omulingoti kweipendera khubutenje bweshikulu, khandi shinga eshilolelo eshili khubutenje bweshikulu.

¹⁸OMWAMI Nyasaye alindanga mbu mumukalushile, kho mbu alolesie obukoosiabwe khwinywe. Khulweshio alalolesia tsimbabasitsie khwinywe. Okhuba OMWAMI Nyasaye, niye Nyasaye wobukhalachi bwa habwene; Bali neikhabi abamwisikanga OMWAMI Nyasaye.

¹⁹Toto mwene abandu abali Zayuni, inywe abamenya Yerusalemu, shimulekhuulakhwo khandi tawe. OMWAMI Nyasaye alamukoosia obukoosia olwa ahulila okhuhaba khwenywe. Olwa ahulila okhulila khwenywe alamuhabina.

²⁰Kata OMWAMI Nyasaye naba namuhelesia amanyakhano nende amasila, ye omwene niye omwechesia wenywe, ne shialebisa okhurula khwinywe khandi ta, habula mulamulola netsimoni tsienywe abeene.

²¹Ne olwa mukotola khumukhono musaatsa, noho khumukhono mukhasi, mulahulila omwoyo munyuma mwenywe nikumuboolela kuri, “Injila njieyino, loondekhwo.”

²²Mana mulasasia abanyasaye benywe bebifwanani, abareresibwa neifeetsa, nende abareresibwa neitsahabu. Ne mulabafuuba ehale shinga amakokha; nimuboola nomwoyo omukhongo muri, “rule imbeli wefwe!”

²³Olwa muraaka imwo yenywe, OMWAMI Nyasaye alamukwisilia ifula, kho mbu imwo eyo yaame ebiamo ebinji khandi lichesa lienywe lilaba lilayi. Khunyanga eyo tsing'ombe tsienywe tsiakhaaye mulwayilo olukhongo.

²⁴Ne tsiheyi nende tsisishili tsienywe tsia mulimilanga emikunda chienywe tsilaaya obunyasi obwanera khandi obusamilwekhwo omunyu khandi obwiluulilwe obulayi.

²⁵Khunyanga eyo olwa tsingoba tsiaabasuku benywe tsiakhakwisibwe nabo abeene nibeerwa mubunji, emialo emitiiti chiakhakholomoshe okhurula mu buli olukulu nende eshikulu.

²⁶Khandi omwesi kuliakha shinga eliuba, nabwo obulafu bweliuba bwakhameeteshe akhandi musafu okhushila obulafu bwalio bwa buli lwosi; bwakhabe shinga obulafu bwetsinyanga musafu nibwakha khunyanga ndala! Kano koosi kakhekholeshe khunyanga ya OMWAMI Nyasaye aboha amafimire nende okhuhonia amakonzo akomwene yareera khubandube.

²⁷Lole, OMWAMI Nyasaye, omwene yetsa okhurula ehale, yetsa mwiruma nende mukhutuumuukha khwomwosi omukhongo; Omunwakwe kwitsuulemwo oburuma, nalwo olulimilwe luli shinga omulilo okumululanga.

²⁸Emiuyachie chili shinga omwalo okuyembilemwo amaatsi; okwamaatsi kakwo koola mwikosi. Yetsanga okhuseleetsa amahanga nolutelu lwobusasishi, nende okhura eshitiili khubandu, eshiokhubashiamia okhurula khunjila.

²⁹Nebutswa inywe abandu ba Nyasaye mulakhupa tsingalakala nimwimba tsinyimbo shinga olwa mukholanga eshilo shielisabo litakatifu. Mulekhoya nimutsaatsahala shinga abo abekhoya nibachenda nibalonda amayoosi kelilele nibatikulukha okhutsia muhekalu ya OMWAMI Nyasaye, ouli olwanda lwa Isiraeli.

³⁰OMWAMI Nyasaye alakhola abandube okhuhulila omwoyokwe kwoluyali nende okhulola omukhonokwe nikwikha muburumabwe obululu, nende obumemu bwomulilo kwokhusamba nikumulula, nende okhukukuma khwelikulu, nende imbumbuyeka namachina.

³¹Abandu ba Asiria balatiilwa neindenga olwa bahulila omwoyo kwa OMWAMI Nyasaye, olwa abakhupa nende indabushiye.

³²Ne buli likhupache lieindabushi yeshinyasio elia OMWAMI Nyasaye abakhupaka, lilalondana namayosi kebikhuli nende litungu. Ye omwene alalwana nende abandu ba Asiria.

³³Okhuba habundu homuruchi wa Asiria okhusambilwa hamala okhukaasibwa khale. Obwina bwaho noburambi khandi obubambalifu, bureerwemwo omulilo nende tsikhwi tsinyinji. OMWAMI Nyasaye omwene alarubula omulilo okwo nemiuyachie shinga olwa eshichienga shirubulanga omulilo.