Read wanga ISAYA 31 Bible Online

ISAYA 31 - wanga bible

ISAYA 31

¹Bali mushilaamo shiobubi abelushilanga Misiri nibakhaaba obukhonyi, abo abeleetanga khutsifarasi, mbu shichila nitsinyinji, abesikanga amakaari kabwe kelihe, mbu shichila namanji, nende abelihe babwe abelushilanga khutsifarasi, mbu shichila netsiamaani amanji. Nebutswa shibesikanga Omutakatifu wa Isiraeli, kata okhureeba obumanyi okhurula khu OMWAMI Nyasaye tawe!

²Nebutswa OMWAMI Nyasaye nomuchesi khandi areeranga amasila. Ye shiakalukhanga inyuma mu kamalile okhurumbula tawe. Habula alaseera abakholanga kobumayanu, halala nende ababakhoonyanga okhukhola obwonooni.

³Abandu ba Misiri nabandu nabandu butswa, khandi shibali Nyasaye ta; tsifarasi tsiabwe nitsisolo butswa, ne shitsili roho tawe. Olwa OMWAMI Nyasaye anyiila omukhonokwe, lihanga elikhoonyanga lilesichirala, nalio elikhoonyungwa lilakwa, mana koosi halala kalasikha.

⁴Okhuba OMWAMI Nyasaye yamboolela mbu, shinga olwa italanyi, noho italanyi imbuukha yibuuluulila khu shioluyitsi shiayo, ne kata lwomukanda kwabaayi kulangwa okhuchiseera, shiyiriisibwakhwo nokhwayula khwabwe, kata okhutechesibwakhwo nobuyoka bwabwe tawe. Nolwa OMWAMI Nyasaye omwene mahe yakheshe butswa ario, niyetsa okhulwana khulukulu lwa Zayuni nende khushikulu shialwo.

⁵Shinga olwa amanyonyi kabembanga khubitsu biako, nolwa OMWAMI Nyasaye omwene mahe, alaterera ario litookho lia Yerusalemu; alaliterera nende okhulinunula, alalihonokosia nende okhulilekhaho.

⁶Inywe abandu ba Isiraeli, shiukhane nimumukalushila oyo owa mwakhoba muno.

⁷Okhuba khunyanga eyo, mwesi mulisukuna ebifwanani biabanyasaye bieifeetsa nende bieitsahabu, ebia mwakaasia abeene namakhono kenywe kobwonooni.

⁸OMWAMI Nyasaye womulilokwe kuli mu Zayuni, khandi okwangalale mu Yerusalemu aboola ari, “Abandu ba Asiria baleerwa nolukanga lulali lwa abandu nabandu ta, olukanga lulali lwabandu nabandu lulabamulula; abandu ba Asiria balelukha olukanga, nabo abaana babwe balakhosibwa emilimo chiokhuluunyibwa.

⁹Omuruchi wabwe wamaani aleelukha muburi, nabo abakhongobe bamahe balafwa omwoyo nibalekha obukhongo bwabwe khulwa indenga.” OMWAMI Nyasaye niye owaboola ako, owomulilokwe kuli mwitookho lia Zayuni, khandi owomulilokwe kwelirumbi khuli mwitookho lia Yerusalemu.