Read wanga ISAYA 32 Bible Online

ISAYA 32 - wanga bible

ISAYA 32

¹Lole, omuruchi yakhabeho owakharuche mubulunjishi, khandi abaami abakharuche nobukhalachi bwahabwene.

²Buli mulala yakhabe shinga habundu hokhwishinga okhurula khumuyeka, khandi shinga hokhwiyikama okhurula khumbumbuyeka. Bakhabe shinga emialo echiamaatsi mushialo eshiangalamwe, khandi shinga eshiinikha shiolwanda olukhongo mushialo eshiumu.

³Tsimoni tsia abo abarangala shitsilatimbibwa ta, nako amarwi ka abo abahulila kalarechelesia.

⁴Amaparo kabandu abayingwa kalabamwo obuchesi obulayi, nabo abeshilimi balaboola shilunji nibahulilikha obulayi.

⁵Abayingwa shibalalangwakhwo mbu abeshiloonyo ta, kata ababatsa okhuralwakhwo mbu naboluyali tawe.

⁶Okhuba abayingwa baboolanga butswa akobuyingwa, nako amapaaro kabwe kayililisinjia butswa khu akobumayanu mbu: okhukhola akalali akobunyasaye, nende okhuboola akashiamile khu OMWAMI Nyasaye. Khandi shibahelesinjia abeinzala yiluma ebiakhulia, kata abobuloho bulia amaatsi kokhunywa ta.

⁷Omundu omubatsa nomumayanu, khandi arechekhanga okhukhola obumayanu, okhusasia abamanani namakhuwa akobubeeyi, kata lwokhwiyiniakana khwomutakha khuba nikhuli okhwa habwene.

⁸Nebutswa oweshilongoole arechekhanga okhukhola akeshilongoole, khandi aralilanga okhuterera aka habwene.

⁹Buushe, inywe abakhasi beshileka, hulile akemboola. Inywe abakhaana beshileka, recheresie amakhuwa kanje.

¹⁰Mutsinyanga tsinduutu butswa, etsihela ahambi omuyika mulala, mulatiilwa neindenga, okhuba shimulachesakhwo tsinzabibu, noho kata ebiamo bienywe tawe.

¹¹Mularenga inywe abakhasi beshileka, mularenga obutinyu, inywe abeshileka. Mwifwalule tsingubo, musikale eshiechenye, mwifwale ebifwalo biamakunia mubishienje bienywe.

¹²Mwikhupe khubilifu nimwikhuula khulwa okhusasibwa khwemikunda chienywe eminulu, khandi khulwa okhusasibwa khwemitsabibu chienywe.

¹³Mwikhuule khulwa liloba liabandu banje, eliyumbilemwo amahwa nende ebisisia. Toto mwene, mwikhuule khulwa okhusasibwa khwetsinzu tsiosi etsiali tsiobusaangaafu, etsialinji mwitookho liobusaangaafu.

¹⁴Okhuba itookho yomuruchi yilalekhwa eshikhaya, nalio litookho lialinjimwo abandu abanji lilakwa likunda; Eshikulu nende omunaara kwobulindi, bilakwa ebimenyo bietsisolo ebisoni nebisoni, bilakwa ebiomwikhoyo kwetsisishili nabulimo, nende olwayilo lwemiruko.

¹⁵Kano kalatsiililila kario okhuula olwa Nyasaye alakhurumila ifwe Rohowe okhurula mwikulu, khandi okhuula olwa eshitsiimi shilakwisibwa omukunda omunulu, nakwo omukunda omunulu okwo nikwamihamwo ebiraache ebinulu.

¹⁶Mana obukhalachi bwahabwene bulabaho mushialo shialinji eshitsiimi, nabwo obulunjishi bulaba mumukunda omunulu.

¹⁷Khulwa obulunjishi obwo, abandu balimenya mumulembe, khandi obulindwi bulibaho inziayo.

¹⁸Abandu banje bakhamenye mumulembe, khandi amataala kabwe nebimenyo biabwe biakhalindwe obulayi.

¹⁹Omutsuru kwabasuku kwakharusilibweho elala,[5] nalio litookho nilisasilibwa elala.

²⁰Muli abeikhabi, inywe abaraaka khulukuku lwa buli omwalo, khandi abetsing'ombe nende tsisishili tsienywe tsiaya hosi aha tsienyile okhwaya.