Read wanga ISAYA 33 Bible Online

ISAYA 33 - wanga bible

ISAYA 33

¹Oli mushilaamo shiobubi, iwe ousasinjia, iwe oulasasibungwa omwene ta; iwe omukhobi, iwe oulaakholelwa akobukhobi nomundu yesi yesi ta! Olwa olekha okhusasia, olasasibwa, khandi olwa olekha okhukhola akobukhobani, olakhobwa.

²OMWAMI Nyasaye, okhulolele tsimbabasi; obunaayi bwefwe buli khwiwe. Okhulindenje buli obushia, obe omuhonia wefwe mubise biamatinyu.

³Khulwa okhukukuma khwomwoyokwo abandu belukha, olwa ochinguukha, amahanga kasalaana;

⁴Ebiyaayo biabwe bikhung'asibwa shinga olwa amasa kakhung'aasinjia, abandu babiruuchilakhwo shinga tsisiche tsiruukanga.

⁵OMWAMI Nyasaye nomukhongo, khandi amenyanga hekulu mwikulu. Alaruka mu Yerusalemu mubukhalachi bwa habwene nende mubulunjishi.

⁶OMWAMI Nyasaye alamuhelesia omulembe mubise bienywe ebikhoyele, khandi alamuhelesia obuhonia, obuchesi nende obumanyi mubunji, okhuba okhumuria OMWAMI Nyasaye nilio libiikho lienywe likhongo.

⁷Abalwani benywe bamaani bakhupanga tsimbungu khumihanda, abarume benywe bokhureera omulembe bekhuula obululu.

⁸Emihanda emikhongo chisikala emikhaya, abulaho ouchendangakhwo. Indakano yifunakwe, abaloli bayo balechelesibwa, abulaho outeebanga omundu tawe.

⁹Eshialo shiikhuula nishihwelelela. Emitsuru chia Lebanoni chiuma nichifululukha. Libanda linulu lia Sharoni likwile eshiangalaamwe, nachio emisaala eminulu echia Bashani nende echia mubikulu bia Karimeli chibungulusia hasi amasafu kachio.

¹⁰OMWAMI Nyasaye aboola ari, “Bulano isie ndalabuukha, bulano isie omwene ndalachinguukha. Bulano ndalachinguulwa muluyali.

¹¹Akamuyililisinjia koosi namakokha amakhaya, murusinjia omukhuutsi omukhaya butswa, emiuya chienywe chilekhola omulilo okumusamba nikumusasia inywe abeene.

¹²Ne abandu abetsimbia tsiosi balasambwa nibakwa likoshe, balaba shinga amahwa akaremilwe mana nikasambwa mumulilo”.

¹³Inywe abamenya ehale, reche amarwi muhulile akandakholile, nenywe abali ahambi, mumanyilisie obunyali bwanje obukhongo.

¹⁴Abonooni abali mu Zayuni batiililwe noburi, abalaritsanga Nyasaye ta, batiililwe neindenga. Baboola bari, “Niwiina khwifwe ounyala okhumenya nomulilo okumululanga? Niwiina khwifwe ounyala okhumenya mutsimemu tsiomulilo inziayo?”

¹⁵Oyo ouchendanga mubulunjishi, naboola amakhuwa kobwatoto, oulobanga obuyinda oburulana mukhusandia abashie, ousakusulanga amakhonoke, mbu kaleshe okhutiila khu shiomufusi, owikalanga amarwike okhulekha okhuhulila akokhuraatsia eshitsayi, khandi outimbanga tsimoonitsie tsileshe okhuhenga khubwonooni.

¹⁶Oyo niye omundu oulamenya khubutenje ikulu, olukobalwe lwokhwishingamwo lulaba tsimbangatsi tsietsinyanda; alaheebwa ebiokhuliabie, amaatsike kokhunywa kalabaho buli lwosi.

¹⁷Tsimoni tsienywe tsilalola omuruchi nali mung'oonoye; tsilalola eshialo eshieyaala okhuula ehale.

¹⁸Mulayililisia obutinyu khukamariisia, nimwireeba muri: “Ali heena owabala obushuru? Ali heena owasolola obusuru? Ali heena owasinjililanga okhubasia eminaara?”

¹⁹Shimulabalolakhwo khandi abandu bamayinje abo tawe; abandu ababoolanga amakhuwa kebikatsie akolanyala okhumanyilisia ta, abatandananga mumakhuwa kolanyala okhutiila khusina shiako tawe.

²⁰Lole Zayuni, litookho liamasabo kefwe amahule! Tsimoni tsienywe tsilalola litookho lia Yerusalemu, eshimenyo eshiholelefu, liheema liralilu, elia ebibambo bialio bilanyala okhusiulwa tawe, kata emikoye chialio okhukhalakwa tawe.

²¹Nebutswa mulio nimwo omwa OMWAMI Nyasaye mubukhongobwe alaba ninefwe, habundu hemialo emikhongo nende oruchela, aha tsimeeli tsiokhuseera lihe tsilanyala okhwinjila, kata okhubiriraho tawe.

²²Okhuba OMWAMI Nyasaye wefwe, niye omukhalachi weshiina, niye ouhaananga amalako khwifwe, OMWAMI Nyasaye niye omuruchi wefwe; niye oulakhuhonia ifwe.

²³Emikoyechio chitendeeye, shichinyala okhuralisia omutunga kwe ipendera ta, kata okhubambula olukhanda tawe. Ebise ebio ebiyaayo biobunuuli ebinji bilakabanwa; kata abalema balabukula omukabo kwabwe.

²⁴Abulaho owamenya mu Zayuni oulaboola mbu, “Isie endwala,” tawe. Abandu abamenyamwo balaleshelwa obumayanu bwabwe.