Read wanga ISAYA 34 Bible Online

ISAYA 34 - wanga bible

ISAYA 34

¹Site hambi, inywe abandu bamahanga koosi, inywe abandu bamahanga, recheresie! Leshe eshialo nende boosi abamenyangamwo bahulile; eshialo nende biosi ebirulangamwo.

²Okhuba OMWAMI Nyasaye yasinyishiile abandu bamahanga koosi, nende abelihe babwe boosi, yabebalile mbu beerwe, nibamululilwa elala.

³Emilambo chiabwe chilasukunwa butswa elwanyi, khandi obubolo bwachio bulatumuukha nibuhunya. Amalasile kemilambo echio kalakholomokha okhurula mubikulu.

⁴Eliuba, omwesi nende tsing'ining'ini bilakhamiukha, khandi likulu lilekanyamwo shinga olwa eshitabu eshikanye shifumbungwa. Ebilonje biomwikulu biosi bilakwa hasi, shinga olwa amasafu komutsabibu kabungulukhanga hasi, shinga amasafu komukhuyu kabungulukhanga hasi.

⁵Okhuba olukanga lwa OMWAMI Nyasaye nilwakhamala okhumulula ebiomwikulu biosi, luleekha hasi khushialo okhumulula abelihanga lia Edomu, khubandu aba yakhalachila eshiina shiokhumululwa.

⁶OMWAMI Nyasaye ali nolukanga lwitabaliilekhwo amalasile, lwitsuulekhwo amasinya, nende amalasile kebimeeme biamakondi nende tsimbusi, nende amasinya okhurula khutsifuko tsiamamiiku. Okhuba OMWAMI Nyasaye alabakhola okhuba omusango mwitookho lia Bozira, okhumululwa khwabandu abanji mushialo shia Edomu.

⁷Tsimbongo tsiosi tsileerwa halala ninabo. Khandi tsihunwa nende tsisurusi tsikhongo tsiosi tsileerwa. Eshialo shiabwe shilayembamwo amalasile, nalio liloba liabwe lilaba linulu khulwa amasinya.

⁸Okhuba inyanga yeshikwoli shia OMWAMI Nyasaye yiliho, omuyika kwokhukalusilia eshikwoli abasuku ba Zayuni khu akabakhola.

⁹Khandi emichela chielihanga lia Edomu chilakwa ihula, nalio liloba lialio lilakwa lichina lieshibiriiti, lihanga liabwe elio lilakwa shinga ihula eyisalulukhanga.

¹⁰Lilatsiililila okhuyia eshilo neshiteere, omulilo okwo shikulasimibwa ta, nakwo omwosi kwalio kulatumuukha inziayo. Lihanga elio lilakwa likunda ebisoni nebisoni. Ne abulaho omundu oulabura mulio inziayo.

¹¹Nebutswa amahungu nende tsisekese nibio ebilimenyamwo, amayichichi nende amakhokho biliumbakhamwo ebitsu biako. OMWAMI Nyasaye alikhola lihanga elio okhukoyana, nende okhukhola abakhulundu balio boosi okhukoyana.

¹²Balilikulikha eliira mbu, “Lihanga elibula omuruchi,” nabo abaruchi balio boosi balarusibwaho.

¹³Amahwa kakhamele mutsingoba tsialio, tsisambakhulu nende amarakalu biakhamele mumataala ketsingoba tsialio. Liakhabe eshibuutso shiamabwe, eshimenyo shiamahuto.

¹⁴Khandi tsisolo nabulimo tsiakhabukanilemwo netsifisi, eshishieno shiakhahabile eshiashie; eshilo khubio shiakhabe shinga eshiteere, khandi biakhanyooleyo aha bihuluushila.

¹⁵Liyichichi liakhombashemwo eshitsu nilireeramwo amabuyu, liakhaalulilemwo nilifumbelela ebiminywi bialio mutsimbaha tsialio. Tsingosia tsiosi khandi tsiakhakhung'aanilemwo, buli ndala nende eyashie.

¹⁶Runilisie nende okhusooma mushitabo shia OMWAMI Nyasaye: shibulaho kata shilala khubilonje ebio eshiakhachweye okhubamwo; khandi shibulaho eshiakhatambe eshiashie tawe. Okhuba OMWAMI Nyasaye mwene alachilisiye ario, khandi Rohowe omwene abikhung'aasiye halala.

¹⁷OMWAMI mwene amalile okhubikhupila ikha, abikabiile eshialo eshio; ne shiakhabe eshiabio inziayo, biakhamenyemwo ebisoni nebisoni.