Read wanga ISAYA 35 Bible Online

ISAYA 35 - wanga bible

ISAYA 35

¹Eshitsiimi nende eshialo eshiangalamwe shiakhekhoye, eshitsiimi shiakhekhoye nishimulikha ebimuli shinga amayililiitsa.

²Shiakhamulishe mubunji, nishikhoya nobusaangaafu nende okhwimba. Shiakhahebwe oluyali lwa Lebanoni, obukhulundu bwa Karimeli nende Sharoni. Bakhalole OMWAMI Nyasaye muluyalilwe, bakhalole obukhongo obwa Nyasaye wefwe.

³Mutinyie amakhono akateshelaane, mana muralisie amasikamo kayiengushile.

⁴Boolele boosi abemioyo chiabwe chili noburi mbu, “Mume ikholo, mularie tawe! Nyasaye wenywe yakhetse okhurunga eshikwoli, yakhetse okhurunga eshikwolishie, nende okhumuhonia.”

⁵Ababofu bakhalole khandi, abekala amarwi bakhahulile khandi.

⁶Habwene yaho omundu wetsindieku yakhasiilesiile shinga eshitsusu, nabo abandu betsinimi tsiabwe tsiahanda bakhembe khulwa obusaangaafu. Okhuba emialo chiakhakholomoshe mushitsiimi, nachio emichela mushiangalamwe;

⁷omuyeshe okwayia pia, kwakhekhole litiba liamaatsi, nashio eshialo shiahangalala shiakhafutushemwo tsisebele tsiamaatsi. Eshimenyo shiamabwe shiakhekhole olutende, obunyasi bwakhekhole amakata keshisari nende amakale.

⁸Ne omuhanda omukhongo omulayi kwakhabeyo, nakwo kwakhalangwe mbu, “Omuhanda kwobulunjishi.” Abamayanu shibakhakuburekhwo ta, habula kwakhabe okwabandu ba Nyasaye, kata abayingwa shibakhateemekhwo okhuchendakhwo tawe.

⁹Italanyi yosi yosi shiyakhabekhokhwo tawe, kata isolo imbalaba okhuchendakhwo, noho okhunyoolekhayo tawe. Habula abandu abanunulwa nibo abakhachendeyo bonyene.

¹⁰Abanunulwa nende OMWAMI Nyasaye bakhachelele, bakhetse mu Zayuni nibembanga; bakhabe nende omwikhoyo kweinziayo; bakhanyoole omwikhoyo nende obusaangaafu, eshibeela nende okhwihunamila biakhabarulekhwo.