Read wanga ISAYA 36 Bible Online

ISAYA 36 - wanga bible

ISAYA 36

¹Mumuyika kwekhumi nende khane, Hezekia nali omuruchi wa Yuda, omuruchi Senakeribu wa Asiria yaseera amatookho koosi ketsingoba akomushialo shia Yuda mana nakatiila.

²Mana omuruchi wa Asiria naruma omusikariwe omukhongo nende omukanda omukhongo kwabelihe, okhurula mwitookho lia Lakishi, mbu batsie khumuruchi Hezekia mu Yerusalemu. Yabaruma mbu baboolele omuruchi oyo afuchilile aleshe okhuseera lihe. Omusikari omukhongo oyo yasinjila hanjila wabandu abalushi bebifwalo balushilanga, ahambi neliyabo libisinjia amaatsi okhurula khwitiba liemukulu.

³Abasaatsa bataru bomushialo shia Yuda barula nibetsa okhumwakaanila. Abasaatsa abo bali Eliakimu, owasinjililanga litookho, omusiani wa Hilikia, nende Shebuna, omuhandichi womushiina, nende omusinjilili wamahandiko, oulangwa mbu Yoashi, omusiani wa Asafu.

⁴Mana omusikari omukhongo mulala khubakhongo ba Asiria abo nababoolela ari, “Omuruchi wa Asiria yenyanga okhumanya eshichila Hezekia naba nomwoyo kweitswoni muno.

⁵Areeba ari, ‘Opaaranga mbu amakhuwa butswa kanyala okhuhelaana nobusitsa bwabelihe nende amaani kabwe noho? Niwiina woleleetakhwo bulano olwa okhayile okhuhulila amakhuwa kanje?

⁶Lola, bulano wileetanga khu Misiri, indabushi yelikata eliafunikha elo, elinyala okhufumira nende okhusaalisia omukhono kwomundu yesi yesi ousiililakhwo. Omuruchi wa Misiri ali butswa shinga likata elo, khumundu yesi yesi owileeta khuye.’ ”

⁷Omukhongo wa Asiria oyo nameeta okhuboola ari, “Noho mwitsa okhumboolela mbu, mwileetanga khu OMWAMI Nyasaye wenywe? Shiali OMWAMI Nyasaye tsana oyo owomuruchi Hezekia yasasia ebimalilo biemisangobie, naboolela abandu ba Yuda nende ba Yerusalemu ari, ‘Mukhoyile okhumwinamilanga OMWAMI Nyasaye oyo khushimalilo shiemisango shino?’

⁸Yitse bulano, mufuchilisanie nende omwami wanje ouli omuruchi wa Asiria, ndalamuhelesia inywe tsifarasi ebikhumila bibili (2,000), nimuba nimunyala okhunyoola abandu bokhutsichendelakhwo.

⁹Inywe shimunyala okhwichelaasia kata khumukhongo mulala yenyene khu abatiiti ba abakhalabani bomwami wanje ta, ne nimwenya okhwileeta khubandu ba Misiri khulwa obukhoonyi bwamakari nende abelushilanga khu tsifarasi.

¹⁰Kata kario, bulabula okhuba obunyali bwa OMWAMI Nyasaye ta, shindakhanyalile okhuseera lihanga lienywe nende okhulisasia tawe. OMWAMI Nyasaye omwene yamboolela ari, ‘Tsia oseere lihanga elo, mana olisasie.’ ”

¹¹Mana Eliakimu, Shebuna nende Yoa nibaboolela omukhongo wa Asiria oyo bari, “Nochama boola ninefwe mululimi lwa Aramu, okhuba khuluhulilanga; olasungana ninefwe mululimi lwabandu ba Yuda ta, shichila abandu abali khumasiisi bakhahulila.”

¹²Omukhongo oyo nabakalusiamwo mululimi lwa Abayahudi ari, “Mupaaranga mbu ninywe nende omuruchi wenywe mwenywene abomwami wanje yarumile okhuboolela amakhuwa kano koosi? Tawe, yarumile okhuboolela kata abandu abekhaale khwisiisi, aba mushise shituutu, bo halala ninenywe mwitsa okhulia ebibi bienywe nende okhunywa emenyaali kenywe abeene”.

¹³Mana natsiililila okhulanjilisia nomwoyo omukhongo mululimi lwa Abayahudi ari, “Recheresie amakhuwa komuruchi omukhongo wa Asiria aboola:

¹⁴‘Mulafuchilile omuruchi Hezekia okhumukaatia ta, okhuba shianyala okhumuhonokosia tawe.’

¹⁵Khandi mulafuchililekhwo Hezekia okhumukaatia mbu musuubilile OMWAMI Nyasaye, naboola ari, ‘Toto mwene OMWAMI Nyasaye alakhuhonokosia, nalio litookho lino shililaba hasi wobunyali bwomuruchi wa Asiria tawe.’

¹⁶Shimulahulilekhwo aka Hezekia amuboolelanga tawe, shichila omuruchi wa Asiria aboola ari, ‘Kasie omulembe ninasi mana murule mwitse khwisie, mana inywe mwesi mulalia tsinzabibu etsia khumitsabibu chienywe, nende okhulia amakhuyu kokhumikhuyu chienywe nende okhunywa amaatsi komumayabo kenywe,

¹⁷okhuula olwa nditsa okhumuyila mushialo eshili shinga eshialo shienywe shiene. Eshialo eshilimwo imele nende idivai, eshilimwo ebiokhulia nende emikunda chiemitsabibu.’

¹⁸Mulafuchililekhwo Hezekia okhumukaatia naboola mbu, OMWAMI Nyasaye alamuhonia tawe. Alikhwoho omunyasaye welihanga liosi liosi owahonia eshialoshie okhurula khubunyali bwomuruchi wa Asiria?

¹⁹Abanyasaye ba Hamatsi nende Arafadi bali hena? Ne abanyasaye ba Sefariwaimu bali hena? Bahonokosiakhwo litookho lia Samaria okhurula mumakhono kanje?

²⁰Nomunyasaye shiina khubanyasaye bano boosi owahoniakhwo amahanga kabwe okhurula mumakhono kanje? Kho OMWAMI Nyasaye yakhahonokosia arie Yerusalemu okhurula mumakhono kanje?”

²¹Nebutswa abandu baholeela butswa tsi, nibalamukalusiamwo likhuwa liosi liosi ta, shichila omuruchi Hezekia yali nalachilisiye ari, “Mulamukalusiemwo likhuwa liosi liosi tawe.”

²²Mana Eliakimu, Shebuna nende Yoa nibarandula ebifwalo biabwe mushibeela, nibatsia nibaboolela omuruchi Hezekia akomukhongo wa Asiria oyo yali naboolile.