Read wanga ISAYA 39 Bible Online

ISAYA 39 - wanga bible

ISAYA 39

¹Mubise ebio Merodaki Baladani omusiani wa Baladani omuruchi wa Babuloni yahulila mbu omuruchi Hezekia yali niyabeleenje omulwale, ne nahonile, kho namurumila oburume nende ebihaanwa.

²Hezekia nabenjisia, nabamanyia inzu yelibiikho liemianduchie, ifetsa, itsahabu, amafura keshing'ari, amafura kolukoosi, ebimanulwabie biosi ebia lihe, biosi ebianyoolekha mu biachibie. Shibulaho kata shilala eshia mumabishiloke, noho eshiali habundu hosi mwihangalie eshia alabamanyia tawe.

³Mana omulakusi Isaya natsia khumuruchi Hezekia ne namureeba ari, “Abasaatsa bano barulile heena, ne baboolile shiina?” Hezekia nakalusiamwo namuboolela ari, “Barulile mushialo shiehale shia Babuloni.”

⁴Omulakusi Isaya namureeba ari, “Baluutsi shiina munzuyo yoburuchi?” Hezekia namuboolela ari, “Baluutsi buli shindu eshili munzu yanje yoburuchi. Shibulaho eshindu shiosi eshia mubiachi bianje, eshia ndalabamanyiye tawe.”

⁵Mana Isaya naboolela Hezekia ari, “Hulila amakhuwa ka OMWAMI Nyasaye omwene mahe aboola mbu:

⁶Ebise bitsanga olwa ebindu biosi ebili munzuyo yoburuchi nende ebia abakuukabo bakhubishila okhuula olwa leelo, bilayaaywa nibiyilwa Babuloni; shibulaho kata shilala eshilitong'aho ta.

⁷Balala khubaanabo beene bakhatiilwe nibakhurusibwakhwo nibayilwa; khandi bakhabe abalate mana abasumba yitookho womuruchi wa Babuloni.”

⁸Mana Hezekia naboolela Isaya ari, “Likhuwa lia OMWAMI Nyasaye lioboolile, nililayi”. Okhuba yapaara mumwoyokwe mbu, omulembe nende obulindwi biakhabeho mutsinyanga tsiosi tsiobulamubwe.