Read wanga ISAYA 40 Bible Online

ISAYA 40 - wanga bible

ISAYA 40

¹Nyasaye wefwe aboola ari, “Lemie abandu omwoyo, lemie abandu banje omwoyo!

²Boole nende abandu ba Yerusalemu kahala, mubaboolele mbu, obuhambe bwabwe bwakaame yaho, mbu bulano balesheelwe obwonooni bwabwe, mbu OMWAMI Nyasaye abahelesiye eshinyasio akhandi khabili khulwa obumayanu bwabwe bwosi.”

³ Omwoyo kulachilisinjia kuri, “Mukaasie injila ya OMWAMI Nyasaye mushitsiimi, lunjisie omuhanda omukhongo mushitsiimi khulwa Nyasaye wefwe.

⁴Buli libanda lilabukwa nilikwalasibwa, buli olukulu nende eshikulu bileeshibwa hasi; buli habundu hachinguukhu halaleng'asibwa, naho habundu aha hobokha halareresibwa.

⁵Mana oluyali lwa OMWAMI Nyasaye lulabisulwa, ne abandu boosi halala balalulola, Okhuba OMWAMI Nyasaye omwene niye ouboolile.”

⁶Omwoyo nikulanjilisia nikuboola kuri, “Barumbulile!” Nasi ningalusia endi, “Nerumbule shiina?” Ne naboola ari, “Abandu boosi bali butswa shinga obunyasi, khandi ing'oono yabwe yosi yili butswa shinga eshimuli eshiomubulimo.

⁷Olwa omuyeka kwa OMWAMI Nyasaye kuhutsa, obunyasi bufululukha, ebimuli biniala. Toto mwene abandu nobunyasi butswa.

⁸Obunyasi bufululukha, ebimuli biniala, nebutswa likhuwa lia Nyasaye wefwe libetsangaho inziayo.”

⁹Bukha otsie khulukulu olurambi, iwe Zayuni, barumbulile amakhuwa amalayi; lanjilisia obutinyu nomwoyo omukhongo, iwe Yerusalemu, barumbulile amakhuwa amalayi, olaria tawe, lanjilisia nomwoyo omukhongo; boolela amatookho ka Yuda ori, “Rangaale Nyasaye wenywe!”

¹⁰Rangaale, OMWAMI ouli Nyasaye yetsanga nende obunyali obukhoongo, alamuruka nende obunyalibwe; yetsanga nende eshihanwashie, khandi nende omurungokwe.

¹¹Alaliisia ebiayobie shinga omwayi, alabifumbelela ebimeme mumbambatsie, alabichinga khushilifushie, niyemilila kahala ako akashinuninjia.

¹²Niwiina owachelakhwo amaatsi keinyanza mushikalaboshie, noho okhuchela likulu namakhonoke? Niwiina owakhafunikha olufu lwe liloba lieshialo mushichelo, noho okhuchela tsingulu khuratili, kata okhuchela obusiro bwebikulu mubitenjeresio?

¹³Niwiina owakhanyala okhwibaalila Roho wa OMWAMI Nyasaye akakhoyile okhukhola? Niwiina ounyala okhwechesia OMWAMI Nyasaye noho kata okhumwibaalila?

¹⁴Niwiina wa OMWAMI yasabakhwo amachesi? Ne niwiina owamwechesia injila yomulunjishi? Niwiina owamwechesia obuchesi, mana namwibaalila injila yobumanyilisi?

¹⁵Kata amahanga kali butswa shinga akharonyelesi kha amaatsi akaronya okhurula musiongo, khandi kafwana butswa shinga olufu khuratili; lolekhwo, ebikhalachinga biehale nebiangu shinga olufu olunyushe.

¹⁶Tsikhwi tsiosi etsia Lebanoni, kata tsisolo tsia Lebanoni tsiosi, shitsihela okhukholela Nyasaye wefwe omusango tawe.

¹⁷Amahanga koosi, neshikhaya butswa khuye, akabalanga shinga akalahela eshindu ta, khandi akabutswa.

¹⁸Kho wakhachelaasia Nyasaye nende wina? Noho wakhamuchelaasia khulishi?

¹⁹Ye shiali eshifwanani ta! Omubatsi niye oushibaatsanga, omwiranyi naye ashibakhangakhwo itsahabu, nende okhushikasilia eminyololo chieifeetsa.

²⁰Omundu oulanyala okhuhaana ifeetsa noho itsahabu, yahulanga okhuhaana eshihaanwa shiomusaala okulanyala okhubola tawe. Akhabanga omubaatsi omusitsa owokhumukaasilia eshifwanani eshiralilu.

²¹Inywe mushili okhumanyakhwo ta? Mushili okhuhulilakhwo ta? Shimwaboolelwakhwo okhurula mukhuchaaka tawe? Shimwakamanyilisiakhwo okhurula khukhukhupwa khwomuse kweshialo ta?

²²Shialongwa nende owikhalanga khushifumbushie shioburuchi, hekulu weshialo nende ikulu wamaleesi; abandu abali hasi balolekhanga nibali abatiiti muno shinga amache. Yabambula likulu shinga ishuka, khandi shinga liheema liokhumenyamwo.

²³Aholesinjia abaruchi bamaani, khandi abakholanga abaruchi beshialo shino okhuba aba butswa.

²⁴Bali shinga emisaala emitoro, echiromboshile butswa, ne chishili okhuyila emisi mwiloba hasi, olwa OMWAMI Nyasaye ahuutsa omuyeka, chinialanga nichitumuulwa shinga omukhuutsi.

²⁵Kho Nyasaye omutakatifu anyala okhuchelaasibwa nende wina? Alikhwoho oundi shinga ye?

²⁶Chinguule tsimoni tsienywe muhenje mwikulu: Owalonga tsing'ining'ini tsiamulolanga etsio niwiina? Oyo outsimililanga shinga omukanda kwabelihe, amanyanga obunji bwatsio, khandi yatsikulikha ameera buli ndala! Obunyalibwe nobukhongo muno yibulaho eyilaliho kata ndala tawe!

²⁷Iwe Isiraeli, eshichilanga niwiyiniakana, mbu OMWAMI Nyasaye shiamanyile amatinyuko, noho mbu shiakhuhenderanga lwoba nokhupibwa khushibi khulwa butswa ta, nishiina?

²⁸Mushili okhumanyakhwo ta? Shimwahulilakhwo ta? OMWAMI Nyasaye niye Nyasaye weinziayo, khandi omulonji weshialo shiosi. Shiachonyanga noho okhwotoshelela ta, obumanyilisibwe shibunyala okhunonelesibwa tawe.

²⁹Ahelesinjia amaani abeenabo abachoonyile, ne khandi abameetanga amaani abo ababula obunyali.

³⁰Kata abaraaka balachoonya, nibootoshelela, khandi balachoonya nibakwa hasi.

³¹Nebutswa abo abeeleetanga khu OMWAMI Nyasaye khulwa obuhabini, balameetwa amaani. Balapulukha khutsimbaha shinga tsindutsu; baleelukha, ne shibalatora ta, balachenda, ne shibalachoonya tawe.