Read wanga ISAYA 41 Bible Online

ISAYA 41 - wanga bible

ISAYA 41

¹Nyasaye aboola ari, “Holeele mumbulilisie, inywe amahanga kehale; Leshe amahanga kemeete amaani kabwe. Mwirusie mwitse, muboole amakhuwa. Chende khukhung'aane halala khulwa obukhalachi bweshiina.

²Niwiina owabuusiye omuhuli okhurula ebukwe, ounyoolanga obuhuli buli hosi aha atsia? Oumuhelesinjia obuhuli khubaruchi nende amahanga niwiina? Olukangalwe lumululilanga hasi shinga olufu. Ebiselebie biobuyingo bibasalasinjia shinga omukhutsi kusalasibungwa nomuyeka.

³Abalondachililanga nababurakhwo mumulembe, yelukhanga tsimbilo shinga webilenjebie bilasenanga hasi ta.

⁴Niwiina owakhola akene kano okhwikhola? Niwiina owarechekha ebisoni nebisoni okhurula khukhusimikhwa okhweshialo? Nisie, OMWAMI Nyasaye, owaliho mukhuchaaka, khandi isie, OMWAMI Nyasaye, ndilibaho okhuula khushiheesi shieshialo.

⁵Abandu bamahanga kehale baluutsi mana bariire, eshialo shiosi shitechelanga; bekhung'asiye nibeetsa.

⁶Buli mundu akhonyananga nowashie, khandi amutinyisinjia nasunga ari, ‘Ume ikholo!’

⁷Omubaatsi atinyisinjia omwiranyi weitsahabu naboola ari, ‘Wiranyanga obulayi!’ Naye omundu oureresinjia eshifwanani, atinyisinjia oushikhomanga nashilimasia halala. Nabo baboola bari, ‘Shisambiliilwe obulayi,’ khandi bashilimasia halala nemisumari.

⁸Nebutswa iwe Isiraeli, omukhalabani wanje, ninywe abandu ba ndaahula, olwibulo lwa Aburahamu, omwitsa wanje;

⁹Ndakhurusia iwe khundulo tsieshialo, mana nikhulanga okhurula mutsimbeka tsiashio tsiehale. Nimboola endi, ‘Niwe omukhalabani wanje, isie ndakhwahula, ne shindakhwibala tawe.’

¹⁰Kho olaria ta, okhuba isie endi ninawe halala, olafwa omwoyo ta, okhuba isie nisie Nyasayewo, ndalakhukhulumamia, nikhuhabina, ndalakhuteetsa nomukhono kwanje musaatsa okwobuhuli.

¹¹Boosi abakhusinyishilanga, balafwimbwa omurwe nibahambwa netsisoni, nabo abakhuyinganinjia, balaba eshindu butswa, khandi balasikha.

¹²Olakhaaba mbu ololekhwo abasukubo, nebutswa shiolabanyoola ta; abo abakhulwananga, shibalabakhwo shinga eshindu shiosi kata nahatuutu ta.

¹³Okhuba Isie, OMWAMI Nyasaye, ouli Nyasayewo, ekhutiilile omukhono musaatsa; nisie oukhubooleele mbu, ‘Shiolaria ta, ndalakhuhabina.’ ”

¹⁴OMWAMI Nyasaye aboola ari, “Isiraeli, shinga olwa oli omutiiti mana omuteshele, olaria ta; ndalakhuhabina. Isie, Nyasaye Omutakatifu wa Isiraeli, nisie omuhoniawo.

¹⁵Ndalakhukhola okhuba eshihuulilo, eshili nameeno amayiakha mana amamemu; olahuula tsingulu notsitubula ebikulu bilatubukha nibikwa olufu.

¹⁶Olabibisia, nakwo omuyeka nikubitumuula, nayo imbumbuyeka yilabisalaasia. Nebutswa inywe mulekhoya nimumwitsoomia OMWAMI Nyasaye; mulekhoyela mu Nyasaye Omutakatifu wa Isiraeli.

¹⁷Olwa abamanani nende abatakha bakhaaba amaatsi, ne nikalanyoolekha kata matuutu ta, khandi hamwoyo nihahalakha khulwa obuloho. Isie OMWAMI Nyasaye ndalahulila okhuhaba khwabwe. Isie Nyasaye wa Isiraeli shindalabalekha tawe.

¹⁸Ndalakhola emichela okhuba khubikulu ebisangalafu, nende tsisebele okhufutukha mumabanda; ndalakhola ebialo ebiumu okhuba amatiba kamaatsi, nashio eshialo eshiumu okhufutukhamwo tsisebele tsiamaatsi.

¹⁹Ndalaraaka mushitsiimi emisaala chiemisiita, echia emipeeli, ebisisia nende echiemiseituni; emitsuru chilamela mushialo eshiumu, emitsuru chiemitarakwe, chiemitsaari nende emiteyashuri.

²⁰Abandu balalolakhwo nibamanya mbu, Isie, OMWAMI Nyasaye, nisie oukholile kano. Balamanyilisia mbu, Isie Nyasaye Omutakatifu wa Isiraeli, nisie oukakholile.”

²¹OMWAMI Nyasaye omuruchi wa Isiraeli aboola ari, “Inywe abanyasaye bamahanga, reere amakhuwa kenywe mukhuboolele; reerekhwo obwatoto bwako.

²²Leshe bakareere mana bakhuboolelekhwo akali okhwikholekha, khuboolelekhwo akekholekha khale, shinga olwa kali, kho mbu khukaboolekhwo, mana khumanyekhwo aketsa okhurulilamwo; noho mukhurumbulilekhwo aketsa olunyuma.

²³Mukhuboolelekhwo akalikholekha mutsinyanga tsiolunyuma, kho khumanye toto mbu muli abanyasaye. Khakholekhwo akali amalayi, noho akokhusasia, kho mbu khurie nikhutechela.

²⁴Toto, inywe shimuli eshindu ta, khandi emilimo chienywe nemikhaya; kata oumwahulanga inywe neshisinyo butswa.

²⁵Ndalatsuuba omundu okhurula emasaba, naye umalile okhwitsa, alarulila ebukwe, ne alahabila eliira lianje; alasenachilila abaruchi shinga ousena litoyi, shinga olwa omulonji wetsinyungu anyoobanga litoyi.

²⁶Owakalakulakhwo okhurula mukhuchaaka niwiina khumumanye, kho khuboole mbu, oli habwene?” Shialikhwoho kata mulala khwinywe awalakulakhwo khuko kata okhukarumbulakhwo tawe; kata abulaho owamuhulilakhwo nimuboola eshindu.

²⁷Isie OMWAMI Nyasaye, nisie owaranjilila okhuboolela Zayuni, nende okhurumila Yerusalemu omurumbusi wa amakhuwa amalayi.

²⁸Nebutswa nihenga khubanyasaye abo, omwibaali shialikhwomwo, ounyala okhungalusiamwo olwa emba nireeba likhuwa tawe.

²⁹Abanyasaye abo boosi neshikhaya butswa, shibulaho shiosi eshia banyala okhukhola tawe; ebifwanani biabwe ebilonje ebio nebia butswa.