Read wanga ISAYA 42 Bible Online

ISAYA 42 - wanga bible

ISAYA 42

¹ OMWAMI Nyasaye aboola ari, “Omukhalabani wanje ngwouno, oweralisiinjia, omulobole wanje, ouchamisinjia omwoyo kwanje Endere muye Roho wanje, ne alareerera abamahanga obukhalachi bwa habwene.

²Shialalanjilisia noho okhwayula obutinyu noho kata okhulomaloma obutinyu nahulilikha khumihanda ta.

³Shialafunakakhwo likata liashiama ta, shialasimia olutambi olumwemwenda tawe. Mubwisiikwa alareera obukhalachi bwahabwene.

⁴Shialahwelelela[8] kata okhutoreerera ta,[9] okhuula olwa alaba naralisiye obukhalachi bwahabwene mushialo. Nako amahanga akehale kalindililanga amechesioke.”

⁵OMWAMI Nyasaye owalonga likulu khandi nalibambula, owalonga eshialo nende ebilonje biosi ebilimwo owahelesia abandu boosi obulamu nende omuya bulano aboola ari,

⁶“Isie OMWAMI Nyasaye, ekhulanjile khandi nekhuhelesia obunyali, okhulola mbu akahabwene kakholwa khushialo. Ndalakhola indakano nabandu boosi okhubirira mwiwe. Ndalareera obulafu khumahanga okhubirira mwiwe.

⁷Olatimbusia ababofu tsimoni, nolekhuula ababohe okhurula mumbohe, abekhalanga mushiilima olabaashilia obulafu.

⁸Isie sienyene nisie OMWAMI Nyasaye, Nyasayewo shiehanangakhwo oluyali lwanje khu oundi yesi ta, kata ebifwanani shibisanganga mubwitsoomibwi bwanje tawe.

⁹Lola, amakhuwa ka ndalakula khale kamalile okhwikholekha. Ne bulano emulakulila amakhuwa amayiakha, isie ekaboolakhwo kata nikashili okhwikhola.”

¹⁰Yimbile OMWAMI Nyasaye olwimbo oluyia, eshialo shiosi shiimbe nishimwitsoomia! Leshe inyanza nende ebilimwo biosi bihoole nibimwitsoomia, abamenyanga mulukuku lweinyanza boosi bamwitsoomie OMWAMI Nyasaye.

¹¹Leshe eshitsiimi nende amatookho kashio bitsoomie OMWAMI Nyasaye. Leshe abandu ba Kedari bamwitsoomie, abandu abamenyanga mwitookho lia Sela bamwimbile khulwa okhwikhoya, basinjiile khubutenje bwetsingulu nibakhupa tsingalakala.

¹²Lekha bahelesie OMWAMI Nyasaye oluyali. Lekha abali mubialo biehale bamwitsoomie OMWAMI.

¹³OMWAMI Nyasaye yerusiye shinga omusikari, yeteya nakhaasa shinga omulwani walihe; Alanjilisinjia nomwoyo omukhongo, nakhola obuyoka, amanyia mbu nowamaani okhuyinga abasukube.

¹⁴OMWAMI Nyasaye aboola mbu, “Ndaholeela khulwa oluhoono olurambi, ndeleshesia nindalenya okhubahelesia eshinyasio ta; ne bulano ndalaayula obutinyu, shinga omukhasi oulumwa inzibula, neheseela nende okhukamulila omiuya.

¹⁵Ndalasasia tsingulu nende ebikulu, nende okhufululusia emimela chiabwe chiosi; Ndalakwisia emialo chiabwe okhuba ebialo ebiumu, nende okhumia amatiba kabwe kamaatsi.

¹⁶Ndalemilila ababofu mutsinjila tsia balamanya ta, ndalabemilila khutsinjila tsia bashili okhumanya, ndalakhola eshilima okhuba obulafu khubo, khandi ndalakwalasia habundu hachingukhu, kano niko aka ndalakhola, shindalabalekhakhwo tawe.

¹⁷Nebutswa abo abesikanga ebifwanani ebibatse, balafwimbibwa omurwe okhushila, ababoolelanga ebifwanani bieshibia eshisalule mbu, niwe omunyasaye wanje.”

¹⁸OMWAMI Nyasaye aboola ari, “Hulile, abasilu inywe; henje, mbu munyale okhulola inywe ababofu!

¹⁹Oundi abulaho omubofu habula omukhalabani wanje, kata abulaho owekala amarwi shinga omurumwa wanje owa isie ndaruma ta. Abulaho omubofu shinga owandemekha uno ta, kata abulaho owabofula shinga omukhalabani wa OMWAMI Nyasaye tawe.

²⁰Inywe abandu ba Isiraeli mwalutsi amakhuwa amanji, nebutswa shimwakalindile nende okhukakhola ta; amarwi kenywe kekukha, nebutswa shimuhulilanga tawe.”

²¹OMWAMI Nyasaye khulwa obusubilwabwe, yasangalila okhuchinguula amalakoke nende okhukakhola kabe akoluyali.

²²Nebutswa bano nabandu abamalile okhunuulwa nende okhuyaaywa, boosi bekaliilwe mubuko, nibabiswa mumbohe bakwile eshioluyitsi, nibabula oubahonokosia, bakwile ebiyaayo nibabula oubaterera.

²³Niwiina khwinywe oulareka eshirwi okhuhulila kano? Niwina oularecheresia, okhuhulila aketsa okhwikholekha? Okhuba ebise bimalile okhuula.

²⁴Niwiina owahaana aboluyia lwa Yakobo mumakhono kabasuku? Niwina owahana Isiraeli khu abanuuli? Shiyali OMWAMI Nyasaye mwene owa khwonoonela? Shialiye owabakuuka befwe baloba okuchenda munjilatsie? Khandi niye owa baloba okhuhulila amalakoke?

²⁵Khulweshio, yabasundulakhwo lirumalie lilulu, nende okhubalekha mumatinyu kelihe; lirumalie liaakha shinga omulilo tsimbeka tsia Isiraeli tsiosi, nebutswa shibahulila tawe.