Read wanga ISAYA 43 Bible Online

ISAYA 43 - wanga bible

ISAYA 43

¹Ne bulano OMWAMI Nyasaye, owalonga inywe aboluyia lwa Yakobo, owamulonga inywe Abaisiraeli aboola ari: “Shimularia ta, okhuba emalile okhumununula. Emulanjile neliira, inywe muli abanje.

²Olwa mubira mumiyembo chiamaatsi, ndalaba ninenywe; kata olwa mubira mumialo shimulayilwa nemikhula chiachio tawe. Olwa muchenda nimubira mumulilo, shimulayia ta, ne olumemu lwomulilo shilulamumulula tawe.

³Okhuba isie nisie OMWAMI Nyasaye wenywe, Omutakatifu wa Isiraeli khandi omuhonia wabwe. Ndalahaana Misiri okhuba obununuli bwenywe, khandi ndalahaana Etsopia nende Seba okhukalukha mushilenje shienywe.

⁴Ndalahaana amahanga koosi khulwa okhuhonia obulamu bwenywe, shichila inywe muli abolukoosi muno khwisie, ndamuheela khandi emuhelesinjia oluyali.

⁵Shimularia ta, okhuba endi ninenywe, ndalachelesia abolwibulo lwenywe ingo okhurula ebukwe, khandi ndalamukhung'asia nimuchelesia okhurula mumbo.

⁶Ndalalachilisia abelubeka lwemasaba endi ‘Balekhuule batsie,’ nende abolubeka lwemulambo endi, ‘Shimulabahandekhwo tawe.’ Chelesie abandu banje okhurula mumahanga kehale.

⁷Bo nabandu banje, abalangwa eliira lianje; Ndabalonga khulwa okhumbelesia oluyali.”

⁸OMWAMI Nyasaye aboola ari, “Reere hano abandu abo abali netsimoni nebutswa shibalolanga ta, bali namarwi nebutswa shibahulilanga ta!”

⁹Leshe amahanga koosi kakhung'ane halala, abandu boosi betse halala. Niwiina wa khubanyasaye babwe owalakulakhwo khukaliho bulano, khandi naranjilila okhuboolakhwo khu kabira khale? Leshe abanyasaye bano bareere hano abaloli babwe, abokhumanyia mbu bo bali habwene. Leshe abeene baboole mbu, “Nolwa kali kario.”

¹⁰“Nebutswa inywe abandu ba Isiraeli muli abaloli banje, ndamwahula okhuba abakhalabani banje, kho mbu mumanye, khandi musuubile nende okhumanyilisia mbu, isie nisie OMWAMI Nyasaye sienyene. Abulaho omunyasaye undi yesi owaranjilila okhubaho, kata oulibaho olunyuma lwanje isie tawe.

¹¹Isie sienyene nisie OMWAMI Nyasaye, ne omuhonia undi shialiho ta, habula isie sienyene.

¹²Ndarumbula khale aketsa okhwikhola, mana ninditsa nebahabina. Inywe muli abaloli banje mbu, omunyasaye undi shialikhwoho owakhola kano mwinywe tawe.

¹³Isie nisie Nyasaye, ne ndalabetsangaho inziayo. Abulaho ounyala okhwihonokosia okhurula mubunyali bwanje, abulaho ounyala okhunzikalila okhukhola akenzenya okhukhola.”

¹⁴OMWAMI Nyasaye, omununuli, khandi Omutakatifu wa Isiraeli aboola ari, “Khulwa okhumuhonokosia inywe, ndalaruma abelihe okhuseera Babuloni, okhufunaka emishingachi chiemiliango chiabwe, ne okhwikhoya khwabwe khulakwisibwa tsinzikhuulo.

¹⁵Isie nisie OMWAMI Nyasaye, omutakatifu wenywe, omulonji wa Isiraeli, khandi omuruchi wenywe.”

¹⁶Nisie owakaasia injila munyanza, omuhanda mumarunda amasiro kamaatsi.

¹⁷Nisie owabukula amakaari nende tsifarasi, abelihe nende abalwani, nebenikha mumaatsi, kata shibanyala okhwiyinulula okhurulamwo ta; owabasimia nibasimila elala shinga olutambi lwe itaha.

¹⁸“Mwibilile amakhuwa akabira, kata mulapaarekhwo khandi khumakhuwa kakhale tawe.

¹⁹Lole, bulano ekholanga eshindu eshiyia, bulano shikholekhanga, shimushilolanga ta? Ndalakaasia omuhanda mushitsiimi, nende emichela mushialo eshiumu.

²⁰Tsisolo nabulimo tsilambelesia oluyali, kata amabwe nende amahuto kalambelesia oluyali; okhuba ndalareera amaatsi mushitsiimi, nende emichela mushialo eshiumu, okhubahelesia abalobole banje amaatsi kokhunywa,

²¹abandu aba omwene ndeyahulila, kho mbu banzitsoomie.”

²²OMWAMI Nyasaye aboola ari, “Nebutswa inywe Abaisiraeli, shimwakhaaba obuhabinwi bwanje ta, nebutswa mwachoonya khulwa isie!

²³Shimwayandeererakhwo amakondi kenywe okhuba omusango omusambe, kata okhumbelesiakhwo oluyali nemisango chienywe tawe. Nasi shindamusitohelakhwo khulwa okhumureeba emisango, noho okhumuchoonyia khulwa okhumusaba obubaane tawe.

²⁴Inywe shimwayangulilakhwo amasinya akeshiuya eshilayi, noho okhunzikusia namasinya akemisango chienywe tawe. Habula inywe mwasitohela nobwonooni bwenywe, nende okhunjoonyia nobumayaanu bwenywe.

²⁵Nebutswa isie, nisie Nyasaye owababeela obwonooni bwenywe khulwa oluyali lwanje, ne shindilitsulilakhwo obwonooni bwenywe khandi tawe.

²⁶Nimuba nimuli neshika ninasi, mwitse khukhalache amakhuwa mushiina, muboolekhwo ebifune ebimanyia mbu toto muli habwene.

²⁷Kuuka wenywe wambeli yonoona, khandi abemilisi benywe bokhumusasania banzonoonela isie.

²⁸Kata abesaaliisi bafwabia eshimalilo shianje shiemisango. Kho nindekha abandu ba Isiraeli okhusasilibwa elala, nende abandu banje beene okhunyekwa nibafwimbwa omurwe.”