Read wanga ISAYA 44 Bible Online

ISAYA 44 - wanga bible

ISAYA 44

¹Recheresia iwe Isiraeli omukhalabani wanje, reka eshirwi iwe owolwibulo lwa Yakobo, owa ndaahula.

²Isie OMWAMI Nyasaye wakhulonga, nikhukaasia munda mwa mamawo emboola endi, Shiolaria ta, Isiraeli omukhabani wanje, iwe Yeshuruni omulobole wanje.

³Okhuba ndalatsushiilila amaatsi khushialo eshiangalafu, nende okhukhola emichela okhubira mushialo eshiumu; ndalasundulila abolwibulolwo Roho wanje, nende okhuhelesia abaanabo ikhabi.

⁴Balanera shinga omuboka, khandi shinga amabombola akamela khulukuku lwomwalo.

⁵“Mulala yakheyitsiale naboolela owashie ari, ‘Isie endi owa OMWAMI Nyasaye,’ naye oundi yakhekulishe omwene eliira lia Yakobo, naye oundi yakhahandiiche khumukhonokwe ari, ‘Endi owa OMWAMI Nyasaye,’ nende okhwikulikha eliira lia Isiraeli.”

⁶OMWAMI Nyasaye, Omuruchi wa Isiraeli, khandi omununuliwe, OMWAMI Nyasaye omwene mahe aboola ari, “Nisie obuchaachilo khandi obumalilishi, abulaho omuyasaye undi shinga isie tawe.

⁷Niwiina ouli shinga isie? Lekha yetse aboolekhwo, arumbulekhwo omwene habulafu imbeli wenywe. Niwiina owarumbula khale aka nakekholeshe olunyuma? Leshe mana akhuboolelekhwo akeetsa okhwikholekha.

⁸Abandu banje mulatechela ta, khandi mularie ta! Mumanyile mbu okhurula munyanga tsiakhale okhuula bulano ndalakula koosi aketsa okhwikholekha, nenywe muli abaloli banje. Alikhwoho Nyasaye undi nalali isie ta? Alikhwoho oundi owobunyali noho? Eshili okhuhulilakhwo tawe!”

⁹Boosi ababaatsanga ebifwanani neshikhaya butswa. Nabo abanyasaye babahelesinjia oluyali boosi khandi neshikhaya butswa. Abandu abenamilanga abanyasaye abo boosi nababofu khandi nabayingwa. Ne khandi balafimbwa omurwe.

¹⁰Shibuli obulayi okhukaasia omunyasaye khushibia mana omwinamile nomuhelesia oluyali tawe!

¹¹Buli mundu winamilanga omunyasaye oyo alafwimbibwa omurwe. Abakasinjia ebifwanani ebio nabandu nabandu. Leshe betse bayaalwe mushiina, balatechela nibafwimbwa omurwe.

¹²Omwiraanyi abukulanga eshitonye shieshibia mana ashisamba mumulilo. Omukhonokwe kwamaani kuchinganga inyundo mwikulu nikuswaka nikwiranya eshibia okhukaasia eshindu. Inzala yilumanga omwiraanyi oyo, nahalakha khandi nachoonya muno.

¹³Omubaatsi wetsimbao achelenga eshichelo shia yenya nolutsaha. Aretsangakhwo eshilolelo neikalamu. Ne niyekhoonyela ebibatsilobie, ashibaatsakhwo eshilolelo shiomundu owelikondo lilayi muno, eshiokhura munzu.

¹⁴Anyala okhurema emisaala chiemisiita okhwikhoonyela, noho abukule emisaala chiomuruba noho emisaala chindi echiomumutsuru. Anyala kata okhuraka omutarakwe mana alinde, ifula yikwe niyikukhusia.

¹⁵Omubaatsi oyo yekhoonyelanga eshitonye shiomusaala okwo okhuba tsikwi, eshitonye shindi okhubatsakhwo eshifwanani, eshindi okhubwana omulilo kwokhwora nende okhuteshela, nashio eshindi abatsakhwo omunyasaye namwinamila.

¹⁶Yekhoonyela eshitoonye shindi okhwashia omulilo kwokhusamba inyama nalia niyekura. Yooranga omulilo okwo naboola ari, “Nomulayi khandi nomutundumu! Omulilo kuno nomulayi muno!”

¹⁷Eshitonye shindi shiomusaala kutoonyile abatsangamwo eshifwanani mana yenama hasi nashinamila. Ashinamilanga naboola ari, “Niwe omunyasaye wanje, umbonie!”

¹⁸Abandu shinga abo nabayingwa muno abalanyala okhumanya aka bakholanga tawe. Bafunikhanga tsimoni tsiabwe, kho shibanyala okhulola eshindu ta, khandi amachesi kabwe kasiluhasibwa, kho shibanyala okhumanyilisia eshindu shiosi shiosi tawe.

¹⁹Omubatsi owebifwanani shianyala okhulekha mana ayililisiekhwo tawe.Abulaho khubo ounyala okhumanya kata okhumanyilisia mana aboole mbu, “Inusu yeshirundu eshio, embwanile omulilo, nekhandi endeshile eshiokhulia nomulilo kwashio. Esambile inyama nomulilo kwashio mana nendia. Kho ndakhabatsa eshindu shieshisinyo khushirundu shiakwo eshitoonyile? Kho ndakhenamila eshirundu tsana shiomusaala?”

²⁰Ako kali butswa shinga okhulia likoshe. Amapaaroke kobuyingwa kamukosiye muno okhubira eshichelo. Shianyala omwene okhufuchilila mbu eshifwanani shia ali ninashio mumukhonokwe shiali omunyasaye tawe.

²¹OMWAMI aboola ari, “Iwe Isiraeli yitsulila kano, yitsulila mbu oli omukhalabani wanje. Ndakhulonga mbu obe omukhalabani wanje, ne shindalakhwibilila.

²²Ndasiliisiiye nerusiaho obwonoonibwo shinga lileesi, ndarusiyeho obumayanubwo shinga ling'ong'ong'we. Ungalushile okhuba ndakhununuule.”

²³Imbe nimwikhoya inywe likulu, okhuba OMWAMI niye oukholile kano. Khupe tsingalakala inywe amabanda keshialo; Imbe inywe tsingulu, emitsuru nende emisaala chiosi, okhuba OMWAMI Nyasaye anunuule Isiraeli. Alolosiye oluyalilwe mu Isiraeli.

²⁴OMWAMI Nyasaye, omununuli wenywe, khandi owamulonga mulubeleshelo aboola ari, “Nisie OMWAMI Nyasaye, owalonga buli shindu, nisie sienyene owabambula likulu, khandi owalonga eshialo.

²⁵Oyo owikalilanga ebilolelo biababeeyi. Ekholanga abafumu okhuba ebayingwa, nenyasia obulakusi bwa abebitsohelo. Efukulanga amakhuwa kabachesi, mana emanyisia mbu obuchesi bwabwe nobuyingwa.

²⁶Nebutswa olwa omukhalabani wanje alakula, olwa eruma omurume wanje, okhulolosia akokhwenya khwanje, ekakholanga koosi okhwikhola. Emboolela litookho lia Yerusalemu mbu, abandu balamenyamwo khandi, ne amatookho ka Yuda mbu, kalombakhwa obuyia khandi. Amatookho ako kalasinjisibwa okhurula mumachinjini.

²⁷Ndakhamia inyanza khulwa likhuwa lianje: elia ndalachilisia.

²⁸Emboolela Koreshi mbu, niwe owitsa okhuruchila abandu, olakhola akenzenya mbu okhole, mbu olalachilisia mbu, litookho lia Yerusalemu liumbakhwe obuyia, mbu omuse kwa Ihekalu kuyabwe.”