Read wanga ISAYA 45 Bible Online

ISAYA 45 - wanga bible

ISAYA 45

¹OMWAMI Nyasaye aloboole Koreshi okhuba omuruchi! Amwaahule okhuhula amahanga. Amurumanga okhunuula abaruchi obunyali bwabwe; Alamwikulila ebilibwa biamatookho. OMWAMI Nyasaye aboolela Koreshi ari,

²“Isie omwene ndalakhukasilia injilayo, ndalakwalaasia ebikulu nende tsingulu. Ndalakwisia hasi ebilibwa biemikasa nende okhutubula ebiyinjilo biebibia.

³Ndalakhuhelesia emiandu chiosi echiabiswa mushilima, nende kata echiabunjikhwa habundu hamabiswi. Ne olamanya mbu nisie OMWAMI Nyasaye, khandi Nyasaye wa Isiraeli oukhulanjile eliiralio.

⁴Ekhwahula mbu okhoonye omukhalabani wanje Isiraeli, abandu banje ba ndaahula. Ekhuhelesiye oluyali olukhongo, kata nolaamanyile isie ta.

⁵Nisie OMWAMI Nyasaye, abulaho Nyasaye undi tawe. Ndalakhuhelesia amaani, kata nolaamanyile isie tawe.

⁶Ndalakhola endio kho buli mundu okhurula khundulo weshialo okhuula khundulo undi amanye mbu, nisie OMWAMI Nyasaye, ne oundi shialiho tawe.

⁷Nisie owaraho obulafu khandi owalonga eshilima, ehaananga obuyinda khandi endeeranga amatinyu, isie OMWAMI Nyasaye nisie oukholanga ako koosi.

⁸Ndalaruma obuhuli okhurula mwikulu shinga ifula. Nashio eshialo shilekukha okhububukula nabwo bularabaala nibureera obulekhuule nende akahabwene. Isie OMWAMI Nyasaye ndalakhola ako koosi.”

⁹Inyungu yelitoyi yakheteya okhuyingana nomulonji wayo? Inyungu eyalongwa butswa shinga etsindi tsiosi! Litoyi lireebangakhwo omulonji eshia aba nalonganga khulio? Litoyi liyiniakanangakhwo mbu omulonji walio abula obusitsa bwokhulonga noho?

¹⁰Omwana yakheteya okhureeba samwana ari, “Kho wibulanga shiina?” Noho okhureeba nyinamwana ari, “Kho olumungwa okhwibula shiina?”

¹¹Kho OMWAMI Nyasaye, Omutakatifu wa Isiraeli aboola ari, “Mubulakhwo obunyali bwokhureeba khumakhuwa kabaana banje tawe, kata okhumboolela akekhoyile okhukhola tawe!

¹²Nisie owalonga eshialo khandi ninonga abandu okhumenyamwo. Amakhono kanje omwene niko akabambula likulu, khandi niraho omwesi, eliuba nende tsing'ining'ini.

¹³Isie mwene ndabuusiye Koreshi akhole eshikhole okhuusia lichomo lianje, nende okhukololosia amakhuwa. Ndalalunjisia buli omuhanda okwa abirirakhwo. Alombakha obuyia litookho lianje lia Yerusalemu, khandi alakhola abandu banje ababohwa okhulekhuulwa. Abulaho owitsa okhumurunga noho okhumuhelesia eshiomufusi khulwa okhukhola ako tawe.” OMWAMI Nyasaye mwene mahe aboola ario.

¹⁴OMWAMI aboolela Isiraeli ari, “Obuyinda bweshialo shia Misiri nende Etsopia bulaba obwenywe. Nabo abasaatsa abarambi beshialo shia Sheba balaba abakhalabani benywe, balamwitsila nibaboyilwe eminyololo. Balamwinamila inywe nibeyama nibaboola bari, ‘Nyasaye ali ninenywe, ye yenyene niye Nyasaye.’ ”

¹⁵Toto mwene nisie Nyasaye owamabiswi, Nyasaye wa Isiraeli khandi omuhonia wabwe.

¹⁶Abakasinjia ebifwanani boosi balafwimbwa omurwe khandi balahafibwa tsisoni boosi balamalilishila mushifimbwa murwe.

¹⁷Nebutswa OMWAMI Nyasaye alahonokosia Isiraeli, nobuhonia bweinziayo. Shimulifimbibwakhwo omurwe noho okhuhafibwa tsisoni inziayo tawe.

¹⁸Okhuba OMWAMI Nyasaye walonga likulu, niye yenyene Nyasaye. Niye owalonga eshialo, yashiralisia nashikhola okhubaho inziayo. Shiyashilonga mbu shibe likunda ta, nebutswa yashilonga mbu abandu bamenyemwo. Niye ouboola ari, “Nisie OMWAMI Nyasaye, abulaho oundi tawe.

¹⁹Shimboolile mumasilisi kata okhubisa lichoomo liamapaaro kanje tawe. Shinzenya mbu abandu ba Isiraeli bakhaabe habundu hakhaya nibanyakhana tawe. Nisie OMWAMI Nyasaye, ne emboolanga akobwatoto, emanyisinjia habulafu akobulunjishi.”

²⁰Inywe abamahanga abatong'a, mwikhung'asie halala mwitse. Mwireere nimwihaana abeene okhureebwa mushina! Abandu abachinganga ebifwanani biabwe biemisaala nende okhwinamila abanyasaye balanyala okhubahonia ta, abandu abo shibamanyilekhwo eshindu shiosi shiosi tawe!

²¹Yitse muboole amakhuwa kenywe mushiina, leshe abekaananga bareebane abeene. Niwiina owalakulakhwo khale akanyala okhwikholekha? Shiendi isie, OMWAMI Nyasaye? Abulaho omunyasaye undi yesi yesi tawe.

²²Yitse khwisie mana mulahonibwa, inywe abokhushialo boosi! Isie nisie sienyene Nyasaye ouliho.

²³Obusuubisie bwanje nobwa habwene, ne shibulikalukhasibwakhwo tawe. Ndaletsuba nisuubisia mbu, buli mundu yakhetse nasikama imbeli wanje, niyetsuba okhuba omuholo khwisie.

²⁴Baliboola khwisie mbu, “Obuhuli nende obulunjishi binyoolekhanga khwisie sienyene. Nabo boosi abaasila isie bakhafwimbibwe omurwe.”

²⁵Isie OMWAMI Nyasaye ndakhahonokosie abolwibulo lwosi lwa Isiraeli, nabo bakhanzitsoomie.