Read wanga ISAYA 46 Bible Online

ISAYA 46 - wanga bible

ISAYA 46

¹“Buno nibwo obumalilishi bwa Abanyasaye ba Babuloni! Abanyasaye Beli nende Nebo abenamilungwa khale, nebutswa bulano bachinjilwe khumikongo chietsisishili, bakwile emisiko emisiro khumikongo chietsisolo etsichoonyile.

²Ebifwanani shibinyala okhwihonokosia ebiene tawe, bitiililwe nibiyilwa mubuhambe. Abanyasaye ba Babuloni bahwele pe!

³Inywe abolwibulo lwa Isiraeli, mumbulile, inywe mwesi abatong'a khubolwibulo lwa Isiraeli, inywe aba ndachinganga nimushili munda khandi aba enjinganga okhurula nimwibulwa,

⁴okhuula khukhukofula khwenywe, nende okhumela khwenywe tsimbutsi. Nisie oulamuchinga nende okhumulinda. Nisie owamulonga khandi ndalamuhonokosia.”

⁵OMWAMI areeba ari, “Niwiina owakhachelasibwa khwisie? Alikhwoho oundi ouli shinga isie?

⁶Abandu bekule tsiloloti tsiabwe, basundule itsahabu. Bachele ifeetsa mubitenjelesio. Barunje omwiraanyi amapesa khulwa okhwiraanya eshifwanani shiomunyasaye, mana bename hasi nibashinamila!

⁷Bashichinganga khumabeka kabwe, nibashirenjekha habundu washio, nashio nishitong'aho. Shishinyala okhurula habundu yaho ta, kata omundu nashihabila, shishinyala okhumukalusiakhwo likhuwa, kata okhumuhonokosia mumatinyuke tawe.

⁸Inywe abakhayi, yitsulile amakhuwa kano yililisiekhwo khumakhuwa aka ekholile.

⁹Yitsulile amakhuwa kekholekha khale, manyilisie mbu isie sienyene nisie Nyasaye, ne abulaho oundi yesi ouli shinga isie tawe.

¹⁰Okhurula mukhuchaaka ndalakula akakhekholeshe. Okhurula khale ndalakula aketsa okhwikhola. Nindaka mbu, lichoomo lianje okhuula likholeshe, mbu ndalakhola buli shindu shienzenya okhukhola.

¹¹Enanganga omundu okhurula ebukwe, aleyuula hasi shinga indutsu, mana alakhola omulimo kwa ndamurecheshela okhukhola. Emalile okhulaka ne kalekholekha kario.

¹²Recheresie inywe abandu bamakosi amoomu, abapaaranga mbu obuhuli buli ehale.

¹³Esitinjia hambi inyanga yobuhuli shiyilikhwo ehale nahatuutu tawe. Obuhuli bwanje shibulashinda tawe. Ndalahonokosia litookho lia Yerusalemu, ndalareerera Abaisiraeli oluyali lwanje.”