Read wanga ISAYA 47 Bible Online

ISAYA 47 - wanga bible

ISAYA 47

¹OMWAMI Nyasaye aboola ari, “Iwe Babuloni yikha hasi okhurula khushifumbishio shioburuchi, ne wikhale hasi mulufu. Walikhwo olundi shinga omukhaana omushisila, litookho elilahulungwa ta, nebutswa bulano shioli omutoro khandi owenya okhutembelesibwa tawe!

²Bukula isio, osie obusie. Rusia olububilwo, fwalula lirindalio. Fwimbula ebilenjebio, wambushe omwalo.

³Olafimbulwa eshihechenyeshio habulafu, abandu balalola eshifimbwa murweshio, omwene ndalamala eshikwoli, ne abulaho oulahonokokha.”

⁴Nyasaye Omutakatifu wa Isiraeli, niye omununuli wefwe. Eliralie niye OMWAMI Nyasaye omwene mahe.

⁵OMWAMI aboolela Babuloni ari, “Yikhala mushiilima noholeelile tsi, shibalakhulangakhwo khandi mbu omukhaye womuruchi wamahanga tawe!

⁶Ndasinyishila abandu banje, nibakhola shinga abalali abandu banje tawe, ndabakhola okhuba hasi wobunyalibwo, nawe nolabakholelakhwo aketsimbabasi ta, kata abakofu abakofula wali omululu khubo.

⁷Wapaara mbu olabetsanga buli lwosi omuruchi, mana nolateebakhwo amakhuwa kano mumwoyokwo ta, noho okhuyililisia obumalilishi bwako ta.

⁸Kho bulano hulila kano iwe owachama omwenya, oupaaranga mumwoyokwo mbu oli obulayi khandi mumulembe. Oupaaranga mbu oli omukhongo shinga Nyasaye, ne abulaho oundi yesi ouli shinga iwe, shiopaarangakhwo mbu onyala okhuba omukhasi omulekhwa noho wanyoola amatinyu kabaanabo okhufwa tawe.

⁹Nebutswa khunyanga ndala, khushise shilala, amakhuwa kano koosi kalakhwikholekhakhwo. Kata noba nokholanga obufumu, omusaatsawo nende abaanabo balafwa.

¹⁰Wali niwasuubilila mubumayaanubwo, ne noboola ori ‘Abulaho oundolanga.’ Obuchesibwo nende obumanyibwo bikhukosinjia olwa wiboolelanga omwene ori, ‘Nisie ouliho, ne abulaho oundi yesi ouli shinga isie.’

¹¹Niko akachila amatinyu kalakhwitsila, ne shiolanyala okhumanya shinga olwa onyala okhukekalila tawe. Amaraba kalakhwitsakhwo aka olanyala okhuyiniaho khulwa okhukhola eshitiso shiosi shiosi tawe. Obusasishi bulakhwitsila metsukhana nolalolanga ta.

¹²Tsiililila okhukhola obufumubwo nende obulosibwo, ebia wachaka noshili omwana, haundi binyala okhukhukhoonya, haundi binyala okhurisiakhwo abasukubo.

¹³Obuchetsiyi bwabwe bukhuchoonyinjia butswa eshikhaya. Lekha abafumu bekhoonyelanga likulu okhufumula betse bakhuhonie, abo abahenganga khutsing'ining'ini, abahenganga shinga olwa likulu lifwana mana bakhuboolela buli khumwesi, akatsia okhwikholekha.

¹⁴Balaba shinga omukhutsi ne omulilo kulabasamba. Shibalanyala okhwiihonia abeene okhurula mulumemu lwomulilo luyiile pia tawe. Shibalekholakhwo amanda akokhwora, kata omulilo kwa abeene okhusitakhwo ahambi okhwora tawe.

¹⁵Ako konyene niko amalayi ka balakhukholela, abo abafumulanga khulwa okhuhenga khutsing'ining'i, abokhabangakhwo obukhoonyi mubulamubwo bwosi. Boosi bakhakhwilushe nibatsia buli mundu khunjilaye, ne abulaho oulitong'aho okhukhuhonia tawe.”