Read wanga ISAYA 48 Bible Online

ISAYA 48 - wanga bible

ISAYA 48

¹Hulile kano, inywe abandu ba Isiraeli, inywe abolwibulo lwa Yuda, mwitsubanga muliira lia OMWAMI Nyasaye mana mwikaatia mbu mwinamilanga Nyasaye wa Isiraeli, nebutswa shimukholanga shinga muboolanga tawe.

²Mwichinjimisinjia nimuboola mbu muli abebule belitookho litakatifu, khandi mbu mwileetanga khu Nyasaye wa Isiraeli, oweliiralie lili mbu OMWAMI Nyasaye omwene mahe.

³OMWAMI Nyasaye naboolela Isiraeli ari, Ndalakula khale akatsia okhwikholekha mana nekakhola okhwikholekha matetekhana.

⁴Shichila ndamanya mbu muli abatinyu muno, abamakosi amoomu shinga eshibia, khandi abobweni obuumu shinga omukasa.

⁵Niko akachila ndalakula khale akakhekholeshe khwinywe, ndarumbula aketsa okhwikholekha nikashili okhwikhola, kho mulapaara mbu, abanyasaye benywe nende ebifwanani bienywe nibo abakakholile tawe.

⁶Amakhuwa koosi aka ndalakula, bulano kamalile okhwikhola. Okhuula bulano mufuchilile mbu obulakusi bwanje nobwahabwene. Bulano ndalamuboolela amakhuwa amacheni aketsa okhwikholekha, amakhuwa akebisa aka inywe mulamanyilekhwo tawe.

⁷Leelo luno lwonyene nililwo olwa ekakholanga okhwikholekha; Kabulaho akafwana shinga kano akekholekhakhwo khale tawe. Nikakhabeele kali nikekholekhakhwo khale, khane mwakhaboolile mbu mwali nimwakamanya koosi.

⁸Ndamanya mbu shimwakhabeele abasuubilwa ta, mbu mwamanyikha buli lwosi mbu muli abandu abeinduli niko akachila nimulahulilakhwo amakhuwa kano ta, ne niko eshichila kata likhuwa elala nililahulilikha mumarwi kenywe tawe.

⁹“Khulwa okhukhola abandu banzitsoomie, ndalarusiaho liruma lianje, khandi shiemumulula tawe.

¹⁰Emuteemile inywe mumulilo kwamanyakhano, shinga olwa ifeetsa yisaaluluungwa mushisambilo. Nebutswa enyoolile mbu mubula inganga.

¹¹Shiosi eshia ekhola, eshikhola khulwa isie omwene. Shindalafuchilila eliira lianje okhufwolwa, noho oundi yesi okhunyoolakhwo oluyali olukhoyeele isie sienyene tawe.”

¹²OMWAMI aboola ari, “Murecheresie inywe abolwibulo lwa Yakobo, inywe Abaisiraeli aba ndalanga! Nisie sienyene Nyasaye, owambeli khandi owokhumalilikha!

¹³Amakhono kanje niko akalonga omuse kweshialo, nikabambula likulu. Olwa enanga eshialo nende likulu, bitsanga biosi bwangu mana bisinjila imbeli wanje.

¹⁴“Inywe mwesi yitse hano mana murecheresie! Abulaho omunyasaye wenywe owakhalakuule mbu, omundu wenzahule yakhaseere Babuloni; omundu oyo alakhola aka enzenya akhole.

¹⁵Nisie owalachilisia khandi nimulanga mbu yetse, ndamwimilila okhutsia okhuseera khandi nemunyalila okhuhula.

¹⁶Bulano site ahambi ninasi mana muhulile akemboola. Emboolanga butswa habulafu, okhurula mukhuchaaka ne buli lwosi amakhuwa kanje kabetsanga akahabwene.” (Bulano OMWAMI Nyasaye omwene mahe yambelesiye obunyalibwe mana niyaruma.)

¹⁷OMWAMI Nyasaye, Omununuli khandi Omutakatifu wa Isiraeli aboola ari, “Nisie OMWAMI Nyasaye, Nyasaye wenywe oumwechesinjia akamukhoyeele inywe, khandi oumwimililanga inywe injila yamukhoyile okhuchendakhwo.

¹⁸Nimwakhalondilekhwo butswa amalako kanje! Tsikhabi tsiakhamukholomosheele inywe shinga amaatsi akomuchela okulakhamanga ta! Obuhuli bwakhamwitsiile shinga amarunda keinyanza.

¹⁹Abolwibulo lwenywe bakhenjiihe shinga omuyeshe; nasi ndakhateemila muno okhulola mbu shibamululwa tawe.”

²⁰Rule mu Babuloni, mutsie muli abalekhuule! Lanjilisie obutinyu nimwikhoya, mukasalasie kamanyishe buli habundu muri, “OMWAMI ahoniye omukhalabaniwe Isiraeli!”

²¹Olwa OMWAMI Nyasaye yemilila abandube okhubira mushitsiimi eshiumu khandi eshiomubasu omululu, abandube shibahalakhakhwo tawe. Yakhola amaatsi okhurula mulwanda, yaraka olwanda mana amaatsi nikafututukha okhurulamwo.

²²OMWAMI aboola ari, “Omulembe shikulikhwoho khubandu abamayaanu tawe.”