Read wanga ISAYA 49 Bible Online

ISAYA 49 - wanga bible

ISAYA 49

¹Muurecheresie, inywe amahanga kehale, muhulilisie, inywe abandu bamenyanga ehale! OMWAMI Nyasaye yananga isie neshili okhwibulwa, yangulikha eliira neshili munda mwa mama wanje.

²Yayiakala omunwa kwanje okhuba shinga olukanga olumemu, niyambisa mushinikha shiomukhonokwe; yaakhola okhuba eshisele shioluyingo, niyambisa mumotiaye.

³Niyamboolela ari, “Iwe oli omukhalabani wanje, Isiraeli, owa ndalanyoolelamwo oluyali.”

⁴Nebutswa isie ndaboola endi, “Ndakholilenje emilimo emikhaya, ndamalile butswa amaani kanje khumakhuwa amakhaya. Nebutswa toto mwene OMWAMI Nyasaye niye oulangoboshela, omurungo kwanje kularula khu Nyasaye.”

⁵Nebutswa OMWAMI Nyasaye aboola mbu, yananga nishili munda mwa mama wanje mbu embe omukhalabaniwe, owokhukalusia abandube khuye, nende okhukhung'asia Abaisiraeli bamukalushile. OMWAMI Nyasaye yangoosinjia imbeliwe, khandi niye amaani kanje.

⁶OMWAMI Nyasaye yamboolela ari, “Shindalakhukhola butswa iwe okhuba omukhalabani wanje, owokhubuusia tsimbia tsia Isiraeli, nende okhuchelesia Abaisiraeli abahonokokha ta, habula ndalakhukhola iwe okhuba obulafu khumahanga, kho mbu abandu boosi mushialo bahonibwe.”

⁷OMWAMI Nyasaye, Omununuli khandi Omutakatifu wa Isiraeli aboolela oyo owachaaywa muno, khandi owasilwa namahanga, ouli omusumba wabaruchi ari, “Abaruchi balakhulola nibakhusinjilila khulwa okhuhelesia oluyali, abakhongo babaruchi baleenama imbeliwo, shichila isie OMWAMI endi omwisiikwa, khandi Omutakatifu wa Isiraeli, nisie owakhwahula iwe.”

⁸OMWAMI Nyasaye aboola ari; “Olwa eshise eshiahabwene shiula ndalahulila okhuhabakhwo, olwa eshise shiobuhonia shiula ndalakhuhabina; ndalakhulinda obulayi, ne okhubirira khwiwe ndalakhola indakano nabandu boosi. Ndilimuralisia mushialo shienywe, eshialo eshili bulaano likunda.

⁹Ndiliboolela ababohe endi, ‘Rule, muli abalekhuule,’ ne abali mushiilima endi, ‘Rule, tsie mubulafu.’ Balalia ebiokhulia hosi ahabalatsia, tsingulu tsilaba obwayilo bwabwe.

¹⁰Shibalalumwakhwo inzala kata okhulibwa obuloho tawe, shibalasambwakhwo nomubasu noho okhusalisibwa noluuya lwomushitsiimi tawe. Okhuba balemililwa nende oyo owabaheela, alabemilila nabayila khutsisebele tsiamatsi amalayi.

¹¹Ebikulu bianje biosi ndalabikhola okhuba omuhanda, nachio emihanda chianje emikhongo ndalachikaasia.

¹²Abandu banje balachelela okhurula mubialo biehale, balala balarula elubeka lwemasaba, nabandi lwomumbo, nabo abandi balarula mushialo shia Aswani, olubeka lwemulambo.”

¹³Yimba nomwikhoyo, iwe likulu; khupa tsingalakala, iwe eshialo; Chinguule omwoyo, mwimbe inywe ebikulu! Okhuba OMWAMI Nyasaye alemiye abandube omwoyo, khandi alalolesia tsimbabasi khubandube abanyakhananga.

¹⁴Nebutswa abandu ba Yerusalemu baboola bari, “OMWAMI Nyasaye yakhuleshile, OMWAMI wefwe akhwibilile.”

¹⁵Nebutswa OMWAMI Nyasaye abakalusia nabareeba ari, “Mana omukhasi yakhebilila omwanawe oushinuuna, noho okhubula okhuheela omwanawe womwene yebula? Toto omukhasi anyala okhwibilila omwanawe, nebutswa isie shindakhamwibililekhwo inywe tawe.

¹⁶Lola, ndamusaara khubikalo biamakhono kanje, amasiisi kenywe kali imbeli wanje buli lwosi.

¹⁷Yabo abamumbakha obuyia, banguha okhushila abo abamulikulula, ne abo abamukwisia likunda bamurulakhwo nibenyokha.

¹⁸Chinguule tsimoni tsienywe muhenje tsimbeka tsiosi, abandu benywe boosi bekhung'asinjia nibachelela. Toto mwene isie OMWAMI Nyasaye esuubisia mbu, shinga olwa endiho mwoyo, abandu benywe balaba shinga olusimbi, khandi mulabekhoyela shinga olwa omweha yekhoyela ebisiahobie.

¹⁹Toto mwene eshialo shienywe shilamululwa nishikwisibwa likunda, nebutswa bulano shilaba eshituutu muno eshilahelamwo abandu benywe ta, nabo abali nibamusasia balayilwa ehale ninenywe.”

²⁰Abaana abebulwa mubise bia mwali mubuhambe, balamuboolela bari; “Habundu hano nahatuutu muno, khwenya omukunda omukhongo kwokhumenyamwo.”

²¹Mana mwakhereebe abeene muri, “Owanzibulila abaana bano boosi niwiina? Ndafwilwa abaana banje nekhaywa okhwibula abandi, nehuyibwa neyilwa mubuhambe, kho owakhusilia bano boosi niwiina? Ndalekhwa sienyene, ne bano barulile hena?”

²²OMWAMI Nyasaye aboola ari; “Mubwangu muno ndalachinguula omukhono kwanje okhulanga amahanga, ndalasakula abandu; mana balachelesia abaana benywe abasiani nende abakhaana ingo.

²³Abaruchi bakhabe shinga basenywe, nabo abaruchi abakhasi bakhabe shinga banyinenywe. Bakhamwinamile, nibamuhelesia oluyali. Mana mwakamanye mbu, nisie OMWAMI Nyasaye; abo abanzisikanga shibakhafwimbwekhwo omurwe tawe.

²⁴Abandu ba Yerusalemu beyiniakana nibareeba bari, ‘Mana toto owamaani anyala okhunuulwa eshioluyiitsishie? Ne abahambe bomulwani omululu banyala okhuhonokosibwa?’

²⁵Naye OMWAMI Nyasaye abakalusiamwo ari, “Kata abahambe bomulwani omululu balalekhuulwa, nashio eshioluyiitsi shiowamarisia shilahonokosibwa; okhuba ndalalwana abo abalwana ninenywe, mana ndalahonokosia abaana benywe.

²⁶Ndakhakhole abo ababasandinjia inywe okhulia inyama yemibili chiabwe abeene, khandi bakhameele amabanga kabwe abeene shinga abameela idivai. Mana abandu boosi bakhamanye mbu, nisie OMWAMI Nyasaye, Omuhonia wenywe, Omununuli wenywe, Nyasaye Owobunyali wa Isiraeli.”