Read wanga ISAYA 5 Bible Online

ISAYA 5 - wanga bible

ISAYA 5

¹Lekha ndimbile omuheelwa wanje, olwimbo lwobuheeli khumukundakwe kwemitsabibu: Omuheelwa wanje yali nomukunda kwemitsabibu khushikulu shieliloba lilayi muno.

²Mana nakulima, narusiamwo amachina koosi, ne naraakamwo emitsabibu emilayi muno. Niyombakha omunaara kwobulindi hakari womukunda okwo, khandi nayaba obwina bwokhutiinyilamwo emitsabibu; napaaranga mbu emitsabibu echio chilaama tsinzabibu tsindayi. Nebutswa emitsabibu echio chiaama tsinzabibu tsindulu.

³Bulano omuheelwa wanje aboola ari, “Inywe abandu abamenya Yerusalemu, nende aba Yuda, enzenya mukhalache eshiina hakari wanje nende omukunda kwanje kwemitsabibu.

⁴Nishiina eshia ndachweya okhukholela omukunda kwanje kwemitsabibu okwo? Kho eshiachila nikwaama tsinzabibu tsindulu mushilenje shiokhwama tsinzabibu tsindayi nishiina?

⁵Bulano ndalamuboolela aka enzia okhukholela omukunda kwanje okwo: Ndalarusiaho olukaka lwakwo, nende okhulusamba nomulilo. Ndalalibulula olukoba lwakwo, nalwo lulasenachilwa hasi.

⁶Ndalalekha obulimo okhuyumbamwo, ne emitsabibu echio shichilakhalilwa kata okhwachilwa tawe. Amarakalu nende ebisisia bilamelamwo. Khandi ndalalaka amaleesi mbu kalakukwisiliakhwo ifula tawe.”

⁷Omukunda kwemitsabibu okwa OMWAMI Nyasaye, omwene mahe, nibo abandu ba Isiraeli, nachio emitsabibu emilayi chiayaraakamwo, nibo abandu ba Yuda. Yeekomba mbu, bakhole akahabwene, nebutswa baratsia eshitsayi. Yeekomba mbu, bakhole akobulunjishi, nebutswa yahulila abandu nibakhupanga tsimbungu!

⁸Muli mushilaamo shiobubi inywe abakulanga tsinzu, nimumeeta khutsia muli ninatsio, inywe abameetanga emikunda khuchia muli ninachio, okhuula olwa emikunda chiosi chiikhola echienywe, ne abandu bandi nibabula ahokhumenya.

⁹Embuliile OMWAMI Nyasaye, omwene mahe niyetsuba naboola ari, “Toto mwene tsinzu tsinyinji tsilakwa amakunda, tsinzu tsikhongo khandi tsindayi tsilatong'a nitsibula oumenyamwo.

¹⁰Okhuba omukunda kwemitsabibu okuhela tsiheka ekhumi, kularulamwo butswa tsilita munaane tsionyene etsieidivai. Natsio tsindubi ekhumi tsieimwo, tsilacheswamwo butswa imele omukopo mulala.”

¹¹Muli mushilaamo shiobubi inywe abahuuna okhubuukha mumabwibwi, nimwilushila okhunywa idivai, inywe abatsiililila okhunywa okhuula mushilo hakari, okhuula olwa mumeela idivai.

¹²Mumasabo kenywe shimuchweyanga okhuba nende amatungu, amalele, tsisukuti nende idivai tawe, nebutswa shimuteebanga ebikhole bia OMWAMI Nyasaye, kata okhumanyilisia aka yamukholela tawe.

¹³Khulweshio, abandu banje balayilwa mubuhambe shichila babula obumanyi, nabo abemilisi babwe balafwa inzala, abandu abanji balafwa khulwa obuloho.

¹⁴Khulweshio emakombe yibalidiliile muno, yasaame omunwa kwayo kwosi. Abemilisi ba Yerusalemu halala nende emikanda chiabandu bahwelamwo boosi, lituuli liabandu nende boosi abekhoyelangamwo.

¹⁵Buli mundu alafimbibwa omurwe, ne boosi balatuutuyibwa, kata abechinjimisia balatuutuyibwa.

¹⁶Nebutswa OMWAMI Nyasaye, omwene mahe alachinguulwa obukhongobwe mukhukhola akahabwene. Nyasaye omutakatifu alalolesia obutakatifubwe mubikholebie biobulunjishi.

¹⁷Nilwo olwa ebimeeme bia amakondi biliaya mubwayilo bwabio, nabio ebimoosi nende ebimeme bietsimbusi biliaya mumatookho akamala okhulikulukha.

¹⁸Bali mushilaamo shiobubi abeehandinjia khubwonooni bwobubeeyi, abakhwesanga obwonooni shinga abakhwesa emikoye chielikaari.

¹⁹Ababoolanga bari, “Lekha OMWAMI Nyasaye akhole bwangu, lekha yanguyilisie emilimochie, mbu khuchilole. Lekha aka Omutakatifu wa Isiraeli yenya okhukhola ketse bwangu, khandi lekha ketse, mbu kho khukalole.”

²⁰Bali mushilaamo shiobubi abalolanga amabi okhuba amalayi, nako amalayi okhuba amabi, abalolanga eshiilima okhuba obulafu, nabwo obulafu okhuba eshiilima, abalolanga eshindu eshilulu okhuba eshimilamilu, nashio eshimilamilu okhuba eshilulu!

²¹Bali mushilaamo shiobubi abekholanga mbu nabachesi, khandi abelolanga mbu bali nobumanyi!

²²Bali mushilaamo shiobubi abeyitsialilanga okhunywa idivai, nende abayenji abasitsa bamalwa amalulu.

²³Abo abalekhuulanga omumayanu khulwa okhubukula eshiomufusi, ne nibamwima oubula eshikha akahabwene!

²⁴Khulweshio, shinga olumemu lwomulilo lumululanga nilusamba tsimuli nende amakata amoomu, khandi shinga olwa obunyasi obuumu bukhamulushilanga mulumemu lwomulilo, nolwa emisi chienywe chilabola chirio, nakhwo okhumulikha khwenywe khulatumuukha hekulu shinga olufu. Okhuba mwaloba okhuhulila amalako ka OMWAMI Nyasaye omwene mahe, ne nimuchaaya likhuwa lia Omutakatifu wa Isiraeli.

²⁵Khulweshio OMWAMI Nyasaye yasinyishila abandube, mana nanyiila omukhonokwe okhubahelesia eshinyasio. Nabio ebikulu nibitechela; ne emilambo chiabafu, nichilekhwa khumihanda hakari shinga amakokha. Ne kata kario, liruma lia OMWAMI lishili okhuhwa ta, khandi alatsiililila okhunyiila omukhonokwe khulwa okhubahelesie eshinyasio.

²⁶OMWAMI Nyasaye alaraho eshilolelo shiokhulanga lihanga liehale, alakhupa eshifwetete okhulanga abandu okhurula khutsindulo tsieshialo, ne lola, betsanga bwangu!

²⁷Abulaho kata mulala khubo oulachoonya, kata okhwisichirala tawe. Abulaho kata mulala khubo oularenjetsa kata okhukona tsindoolo tawe. Lubulaho olukhoba kata lulala olulatendeyibwa mushishienje, kata emikoye chiebilaaro shichilakhalikhakhwo tawe.

²⁸Ebisele biabwe nebimemu, obuyingo bwabwe bwosi bukhwesilwe okhulasa. Tsimbakayu tsietsifarasi tsiabwe netsinyumu shinga lichina lieimbaale, nako amakaari kabwe kelukhana bwangu shinga eshimbalakusi.

²⁹Abelihe babwe bahoola shinga italanyi, bahoola shinga tsitalanyi tsimbuukha, etsihoola nitsikhwesa isolo ya tsirire, tsichinga nitsitsia ninayo, ne abulaho ounyala okhutsireesia tawe.

³⁰Khunyanga eyo, abandu bakhahoolele khu Isiraeli, shinga okhuhoola okhweinyanza. Ne omundu yesi yesi ouhenga khushialo eshio, alilola butswa eshilima nende amasila; obulafu bulifunikhwa nende amaleesi.