Read wanga ISAYA 50 Bible Online

ISAYA 50 - wanga bible

ISAYA 50

¹OMWAMI Nyasaye areeba ari, “Nimba nindalekhana nende mamawo iwe Yerusalemu, kho yili heena ibarwa yokhulekhana ninaye? Ne nimba nindakhukusia mubuhambe, kho ali heena owandakhukusiakhwo? Iwe wakusibwa shichila obwonoonibwo omwene, mamawo yalondwa khulwa obwonooni bwenywe.

²Nishiina eshiachila nindalanyoola omundu yesi olwa ndabeetsela? Eshiachila nimulafuchilila olwa ndamulaanga nishiina? Kho omukhono kwanje kwembichitiibwe, mbu kukhaywe okhununula noho? Noho isie embula obunyali bwokhuhonokosia? Engondoshela inyanza niyikhamulukha, nengwisia emialo eshiangalamwe; tsinyeni tsiamenyamwo tsihunya obubolo khulwa okhubula amaatsi, nitsifwa khulwa obuloho.

³Ekholanga likulu okhwilima, nelifuunikha nelikunia shinga eliikhuulanga omufu.”

⁴OMWAMI Nyasaye yambelesiye olulimi lwomwibaali, mbu emanye shinga olwa endinyisia abo abachonyile nelikhuwa lierumbula. Buli mumabwibwi yasimukusinjia. Yasimukusia eshirwi shianje okhuhulilisia shinga balia abeechesibwa.

⁵OMWAMI Nyasaye yakholile eshirwi shianje okhwikukha, nasi nindaba omukhayikhanu, kata okhushiukhana okhukalukha inyuma ta.

⁶Ndabashiukhasilia omukongo kwanje abo abanywekha, nibahelesia tsiseya tsianje abo abakhwesa eshilefu shianje; shindabisa obweni bwanje khumanyeko nende okhunyilikhwakwo amare tawe.

⁷OMWAMI Nyasaye yakhoonya; niko akachila nindilafwimbwa omurwe ta; khulweshio ndumia hamoni wanje shinga lichina lieimbaale, ne emanyile mbu shindalatiilwa tsisoni ta;

⁸okhuba ye oulolosia obulunjishi bwanje ali hambi. Niwina oulafunaana ninasi? Lekha khusinjile ninaye mushiina. Abefunaana nibabo nibeena? Lekha banjoome mumuse.

⁹OMWAMI Nyasaye niye ounderereranga isie; Niwiina oukhalachila eshiina? Bosi pe balahwelelela nibakhamuukha, amatsilili kalabalia boosi pe.

¹⁰Niwina mwinywe oumuritsanga OMWAMI Nyasaye nende okhuhulila amakhuwa komukhalabaniwe? Niwiina ouchendanga mushiilima, nabula obulafu, ne kata kario yesikanga OMWAMI Nyasaye niyeleeta khu Nyasayewe?

¹¹Nebutswa inywe mwesi aberechekhanga okhusasia abashienywe, mulasasibwa nemibero chienywe abeene. Kano niko akalamunyoola okhurula mumukhono kwanje: Muleyalisia nimuli mumatinyu.