Read wanga ISAYA 51 Bible Online

ISAYA 51 - wanga bible

ISAYA 51

¹Murecheresie, inywe abalondelelanga obulunjishi, inywe abamukhabaanga OMWAMI Nyasaye. Raangaale olwanda lwa mwabatswakhwo, nende obwiina bwamachina bwa mwayabwamwo.

²Yitsulile kuuka wenywe Aburahamu nende Sara owolwibulo lwenywe lwarulakhwo; okhuba yali yenyene olwa ndamulanga, nebutswa ndamuhelesia ikhabi nimwinjiyia.

³Okhuba OMWAMI Nyasaye alalemia Zayuni omwoyo; alalemia omwoyo amakunda kalio koosi, ne alakhola eshitsiimi shialio okhuba shinga omukunda kwa Edeni, eshihangalamwe shialio shinga omukunda kwa OMWAMI Nyasaye; omwikhoyo nende obusangaali bilaba mu Zayuni, okhureera omulembe nende amayoosi ketsinyimbo.

⁴Mumbulile, inywe abandu banje, nimuurechera amarwi, inywe abelihanga lianje; okhuba amechesio kalarula khwisie, ne obuyaasi bwanje obwatoto bulaba obulafu khubandu. Ndahelesia amahanga amechesio kanje, amalako kanje kalabareerera obulafu.

⁵Obununuli bwanje bulamuulila bwangu, obuhonia bwanje burulire ebulafu, ne amakhono kanje kalaruka tsimbia tsiabandu; abamenya khunguku tsieinyanza baniindilila, beesika omukhono kwanje.

⁶Chinguule tsimoni tsienywe muhenje mwikulu, khandi muhenje hasi khushialo. Okhuba likulu lilakhamuukha shinga omwosi, eshialo shilakofula shinga eshiifwalo, nabo abamenyangakhwo nibafwa shinga tsiisi. Nebutswa obuhonia bwanje bulibaho inziayo, khandi obununuli bwanje shibuliba neshiakamo ta.

⁷Muurecheresie inywe abamanya obulunjishi, inywe ababiikha mumioyo chienywe ameebalo kanje, mularia okhuseywa nabandu bandi, kata okhuchenya olwa bamuchaaya tawe.

⁸Okhuba amatsilili kalabalia shinga akalia eshiifwalo, natsio tsinyende shinga etsilia eshiifwalo shiobwoya; nebutswa obununuli bwanje nobweinziayo, nabwo obuhonia bwanje nobwetsinzibulo tsiosi.

⁹Buukha, buukha, wifwale amaani, Iwe omukhono okwa OMWAMI Nyasaye! Buukha, shinga munyanga tsiakhale, mutsinzibulo tsiakhale! Shiali niwe owaremaka Rahabu ebitonye ebitonye, nofumira okuyokha okukhongo okwo?

¹⁰Shiali iwe owakhamia inyanza, amaatsi kolusiba olukhongo; owakhola omuhanda mutsisiba tsieinyanza mbu abali nibanunulwe bambushe?

¹¹Kho abanunule ba OMWAMI Nyasaye balachelela, nibenjila Zayuni nibemba tsinyimbo, khandi nibekhoya muno khulwa inziayo; balekhoya nibasangaala, eshibeela nende okhushenya bilahwaho.

¹²Isie nisie oukhuleminjia omwoyo; eshichila noria omundu namundu owitsa okhufwa, omwana womundu oufululukha shinga obunyasi nishina?

¹³Omwibiliile OMWAMI Nyasaye, Omulonjiwo, owabambula likulu khandi nakhupa omuse kweshialo? Ohendanga eshiteere tulu okhubela liruma elia oyo oukhusandia, ourerekhwo omwoyo okhukhumulula. Nebutswa lili heena liruma lia oyo oukhusandia?

¹⁴Balia abasandibwa balaleekhuulwa bwangu; shibalafwa nibeekha emakombe, noho okhutakha eshiokhulia tawe.

¹⁵Okhuba isie nisie OMWAMI Nyasaye wenywe, outuubulanga inyanza, nende okhukhola amarunda kayo okhuhoola. OMWAMI Nyasaye omwene mahe nilio eliira lianje!

¹⁶Ndara amakhuwa kanje mumunwakwo, nikhuterera neshiinikha shiomukhono kwanje, nibambula likulu nende okhuupa omuse kweshialo, nimboolela Yerusalemu endi, “Inywe muli abandu banje.”

¹⁷Buukha, buukha omwene! Buukha osinjile, iwe Yerusalemu, iwe ounywele eshikombe shiamanyakhano ka OMWAMI Nyasaye, khandi khushisanda shioburumabwe, ounywelele elala khulutaabo lwokhumeesia.

¹⁸Abulaho ounyala okhukhwimilila hakari wabaana ba webula abulaho ounyala okhukhutiila omukhono nakhucheesia mubaanabo ba wakhusia.

¹⁹Amatinyu kabili kano kakhukwiliile, niwiina oulekhuula ninawe? Niwina oulakhulemia omwoyo okhurula khukhumululwa nende khukhusasibwa, khushimotso nende olukanga?

²⁰Abaanabo banyira nibakwa hasi, balaambiile habumalilishili bwa buli muhanda, shinga eshitsusu mulurimba; beetsuulemwo obululu bwa OMWAMI Nyasaye, nende okhukondeshelwa okhwa Nyasayewo.

²¹Khulweshio, muhulile kano inywe abasaalisiibwe, inywe abameelile, ne nibalanywele idivai ta:

²²Kho OMWAMI Nyasaye, Nyasaye wenywe outereranga abandube aboola ari: “Lola, erusiiye mumukhono kwenywe eshisanda shiandamuhelesia mwiruma lianje, shimulanywakhwo khandi okhurula khulutaabo lwobululu bwanje tawe.

²³Ne ndalara olutaabo olwo mumukhono kwa abo abamusandinjia inywe, abamuboolela bari, ‘Buunama hasi, khukhuchendekhwo;’ nawe nokhola omukongokwo shinga injila, shinga omuhanda kwabwe okhuchendakhwo.”