Read wanga ISAYA 52 Bible Online

ISAYA 52 - wanga bible

ISAYA 52

¹“Buukha, buukha, wimanule, iwe Zayuni! Wifwale ebiifwalobio bioluyali, Iwe Yerusalemu, litookho litakatifu; okhuba abasinde nende abeshifwabwi shibalenjila mwiwe khandi tawe.

²Wibungulule okhurula mulufu, obuushe, iwe Yerusalemu omubohe; wiboholole ebitiili okhurula mwikosimwo, iwe omukhaana omubohe wa Zayuni!”

³Okhuba kano niko aka isie OMWAMI Nyasaye emboola, mbu, shimwakusibwa eshindu ta, khandi mulanunulwa ahalali amapesa.

⁴Okhuba kano niko ka OMWAMI Nyasaye aboola: Khale lulia abandu banje bakholomokha Misiri okhumenyayo shinga abarende. Abasiria nibabasandia ahalali eshifune ta.

⁵Ne bulano OMWAMI Nyasaye areeba ari: Eshia ekholanga hano nishina, olwa abandu banje bayilungwa mumbohe aharali eshifune? Abasinjilili babwe babahalabila, nolwa OMWAMI Nyasaye aboola, eliira lianje nilifwoolwa eshiteere tulu.

⁶Khulweshio abandu banje bakhamanye eliira lianje; khunyanga eyo bakhamanye mbu isie nisie oulakuule amakhuwa kano.

⁷Nobulayi muno okhulola omurume oureera amakhuwa komulembe, niyetsanga khubikulu, oureera amacheni amalayi, outswania akobuhonia, oyo ouboolela Zayuni ari, “Nyasayewo arukanga.”

⁸Reche amarwi! Abalindibo bakhupanga tsingalakala, boosi halala bemba nibekhoya. Okhuba balola abeene netsimoni tsiabwe, okhukalukha khwa OMWAMI Nyasaye Zayuni.

⁹Chaache okhwimba tsinyimbo, inywe amakunda ka Yerusalemu; okhuba OMWAMI Nyasaye alemiye abandube omwoyo, anunuule Yerusalemu.

¹⁰OMWAMI Nyasaye anyiilile omukhonokwe omutakatifu imbeli wamahanga koosi; ne abokhushialo shiosi balalola obuhonia bwa Nyasaye wefwe.

¹¹Rule, rule mwinyoshe okhurula Babuloni, inywe abachinganga ebindu bia Ihekalu. Shimulatiilakhwo khushindu shiosi shiosi eshiomusilo ta; Mwilinde abeene, mulekholekhwo abomusilo tawe.

¹²Shichila shimularula matetekhana ta, khandi shimulaba nimwilukhanga tawe; okhuba OMWAMI Nyasaye alamwimilila khandi alamuterera munyuma wenywe.

¹³Lole, omukhalabani wanje alanyalilwa nakaasa; alemekhwa nachiingulwa ikulu, ne alaba ikulu muno.

¹⁴Abandu abanji bachenya olwa bamulola, obwenibwe bwali nibukalukhane, nibulalolekha shinga obwomundu tawe.

¹⁵Nebutswa bulano alahuchisia amahanga amanji, abaruchi balaholeela tsi nibalibwa ling'ang'a olwa bamulela, okhuba balalola akabalaali nibaboolelwakhwo tawe, ne kalia aka balaali nibahulilakhwo ta, balakahulila nibatiila khushisina.