Read wanga ISAYA 53 Bible Online

ISAYA 53 - wanga bible

ISAYA 53

¹Niwiina owasuubila aka khwahulila? Ne niwiina womukhono kwa OMWAMI Nyasaye kwafwimbulilwa?

²Okhuba yakhula imbeli wa OMWAMI Nyasaye shinga omurombo, khandi shinga indombela okhurula mwiloba eliumu; Shiyalikhwo nelikondo noho oluyali ebichila khumuhenjekhwo, noho shiosi eshichamisia mukhulolekhakhwe mbu khumwikombe tawe.

³Yafwolwa nachaaywa nabandu; omundu wobusaalili, owamanya amanyakhano; ne shinga ulia wabandu batiililwa tsisoni yalekwa, nefu shikhwamubukulamwo mbu neshindu ta.

⁴Toto yetuukha eminyakhano chiefwe nachinga amalwale kefwe; habula khwalola mbu yakhupwa, nasaalisibwa nahebwa eshinyaasio okhurula khu Nyasaye.

⁵Nebutswa yafumirwa khulwa obukhayi bwefwe, yasaalisibwa khulwa obumayaanu bwefwe; yatuukhwa eshinyaasio eshiakhukhola ifwe abalamba, ne okhubirira mumakhupacheke khwahonibwa.

⁶Ifwe fwesi khuli shinga amakondi akakora; khwakotokha buli mundu natsia injilaye, naye OMWAMI Nyasaye yamuhelesia eshinyasio shia ifwe khwali nikhukhoyile okhuhebwa.

⁷ Yasandibwa, mana nasaalisibwa, halali shiyachinga omunwa ta; shinga eshimeeme shielikondi eshiyilwa ahokhwirirwa, khandi shinga likondi libekungwa obwoya niliholeelile tsi, nolwa alaachingakhwo omunwa nahatuutu ta.

⁸Yakhalachilwa eshiina eshilali shiahabwene ta, mana nayilwa okhwirwa. Owakhapaarirekhwo khukolunyumalwe niwiina? Okhuba yayinibwa hakari wa abali mwoyo, nasandibwa khulwa obukhayi bwabandu banje.

⁹Bakaasia ing'aniye mubamayaanu eshilindwashie halala nende abandu abayinda, kata olwa alaali niyakhola amahababa koosi ta, noho obukaati okhunyoolekha mumunwakwe ta.

¹⁰Nebutswa khwali okhwenya khwa OMWAMI Nyasaye okhumusandia nende okhumutsunia. Olwa akhola obulamubwe omusango kwobwonooni, alilola olwibulolwe, namenya oluhoono; aka OMWAMI yenya kalakaasa okhubirira muye.

¹¹Okhurulana mukhusaalilakhwe alalola obulafu; alinyoola okhwikusibwa mubuchesibwe. Omusumba wanje, ouli omulunjishi, alakhola abanji okhuba abalunjishi, ne aletuukha obwonooni bwabwe.

¹²Khulweshio, ndakhamukabile omukabo halala nabakhulundu. Yakhakabane ebiyaayo nende abamaani; okhuba yehaana obulamubwe okhuula khukhufwa, yakhabalilwe halala nende abakhayi; Yetuukha obwonooni bwabanji, nasabila abakhayi mbu baleshelwe.