Read wanga ISAYA 54 Bible Online

ISAYA 54 - wanga bible

ISAYA 54

¹Yimba, iwe omukumba oulayeebulakhwo ta; chaaka okhwimba nende okhukhupa tsingalakala, iwe oulalumwakhwo inzibula ta! Okhuba abaana ba oyo owalekhwa nabanji okhushila abaana ba oyo ouli nomusaatsa, nolwa OMWAMI Nyasaye aboola.

²Yaanguula obwikhalo bweliheemalio, nobambula tsipasia tsiebimenyobio; olakalukha inyuma ta; rambiyia emikoyechio, noralisia ebibambobio.

³Okhuba olabambukha okhutsia omukhono mukhasi nomukhono musaatsa, ne abolwibulolwo balabukula amahanga nibamenya mumatookho akakwa amakunda.

⁴Shiolaria ta, okhuba shinofimbibwe omurwe ta; shiolafwa omwoyo ta, okhuba shiolafwoolwa khandi ta; okhuba olebilila aketsisoni kolubuukhalwo, kata okhwitsulila okhuseywa khwomukhasi omulekhwa khandi ta.

⁵Okhuba Omulonjiwo niye omusaatsawo, OMWAMI Nyasaye omwene mahe nilio eliiralie; Omutakatifu wa Isiraeli niye omununuliwo, alangwa mbu Nyasaye omuruchi weshialo shiosi.

⁶Okhuba OMWAMI Nyasaye akhulanjile shinga omukhasi owalobwa ounyakhananga omwoyo olwa alaangwa, khandi shinga omukhasi owolubuukha olwa arumbwa nomusaatsawe, nolwa Nyasayewo aboola ari;

⁷Ndakhusukuna iwe khulwa eshise eshituutu, habula ndalakhuchelesia nobuheeli obukhongo.

⁸Muburuma obunji obwasundukhanga busundukha ndabisa obweni bwanje khulwa eshise eshituutu, ne ndalakhubeela tsimbabasi nende okhukhumanyia obuheeli obulakama ta, nolwa OMWAMI Nyasaye, ouli Omununuliwo, aboola.

⁹Tsino tsili shinga tsinyanga tsiali tsia Nuhu mbu: Shinga olwa ndetsuba mbu amaatsi kali ka Nuhu shikalimaamilakhwo eshibala khandi ta, nolwa nditsubile mbu shendikhutiililwa oburuma khandi kata okhukhukondeshela tawe.

¹⁰Okhuba kata ebikulu nibiakharesibwa nibirulaho, natsio tsingulu nitsisiulwa nitsiyinibwaho, nebutswa obuheeli bwanje oburalilu shibulareesibwa nibukhurulakhwo, noho indakano yanje yomulembe okhurusibwaho ta, nolwa OMWAMI Nyasaye, oukhubeelanga tsimbabasi, aboola.

¹¹ OMWAMI Nyasaye aboola ari, “Iwe owasandibwa, owaresibwa neimbumbuyeka, obulalemibwa omwoyo ta, endi ahambi okhukhumbakha namachina kobukusi, nekhupa emisechio namachina keisapiri.

¹²Ndalombakha eminaarachio namachina amalayi ketsilulu, ebilibwabio namachina amang'inang'inu, ne lisisilio liosi namachina akobukusi.

¹³Abaanabo boosi balechesibwa nende OMWAMI Nyasaye no oburabaale bwabwe bulaba obunji muno.

¹⁴Olaralisibwa mubulunjishi; okhusandibwa khulaba ehale ninawe, okhuba shiolaria ta; khandi amariisia kalaba ehale ninawe, okhuba shikalasita ahambi ninawe ta.

¹⁵Omundu yesi niyakhayakula obusoolo, shibulaba niburulile khwisie ta; omundu yesi oukhuchaaka obusoolo alahulwa.

¹⁶Lola, isie nisie owalonga omwiraanyi oubwananga omulilo kwamanda, niyeraanya eshimanulwa eshikhoyeele omulimo kwashio; nisie khandi owalonga oushiikhoonyelanga okhwira.

¹⁷Shibulaho eshimanulwa shiosi shiosi eshirecheekhwe okhukhuasalisia eshilakaasa ta, ne olahula eshiina shia buli olulimi olukhurulilakhwo mubuyaasi. Kuno nikwo omukabo kwabasumba ba OMWAMI Nyasaye nende okhubaterera khwanje”, nolwa OMWAMI Nyasaye aboola.