Read wanga ISAYA 55 Bible Online

ISAYA 55 - wanga bible

ISAYA 55

¹Buli mundu wobuloho bulia, yitse hamatsi; inywe ababula amapesa, yitse mukule nimunywa! Yitse, mukule idivai nende amabeele aharali amapesa kata obukusi ta.

²Eshichilanga nimumalila amapesa kenywe khubindu ebilali ebiokhulia, nende okhunyakhana khulwa shilia eshilekusia nishina? Recheresie obulayi, nimulia ebiokhulia ebilayi, nende okhutsaatsahalira bilia ebiikusia.

³Reche amarwi, mana mwitse khwisie; recheresie, mbu munyoole okhumenya. Ndalakhola nineenywe indakano eyilaakama ta, obuheeli bwanje oburalilu, obweinziayo khu Daudi.

⁴Lola, isie ndamukhola omurumbusi wobuloli khutsimbia tsiabandu, omwimilisi nomuseesia wamahe wetsimbia tsiabandu.

⁵Lola, olalanga amahanga kalakhumanyile ta, nako amahanga kalakhumanyile ta kalakhwirushira, okhubeela OMWAMI Nyasayewo, Omutakatifu wa Isiraeli, shichira akhuchiinguulile.

⁶Khaabe OMWAMI olwa ashili ounyoolekha, mumuhaabile olwa ashili ahambi.

⁷Leshe abamayaanu baleshe injila yabwe, nabo abonooni baleshe amapaaro kabwe; lekha bamukalushile OMWAMI Nyasaye, mbu ababeele tsimbabasi, nibamukalushila Nyasaye wefwe, okhuba alababeela elala.

⁸Okhuba amapaaro kanje shikali amapaaroko ta, kata tsinjila tsianje shitsili etsitsio ta, nolwa OMWAMI Nyasaye aboola.

⁹Shichila shinga likulu olwa lili ikulu ehale neshialo, nolwa tsinjila tsianje tsili ehale netsinjilatsio nako amapaaro kanje ehale nende amapaaroko.

¹⁰Okhuba shinga ifula neitsaluchi bikwa okhurula mwikulu, ne shibikalukhangayo ta okhuula olwa bisama eshialo, nibishikhola okhumesia ebimera, okhuhaana imwo khumumiitsi nende eshiokhulia khumulii,

¹¹nolwa likhuwa lianje lilaba elirula mumunwa kwanje; shililangalushila likhaya ta, nebutswa liloosia lichoomo lianje, nilikaasila elienelio lielirumile okhuusia.

¹²Okhuba mularula ebulafu nokhwikhoya, nimuchelesibwa nomulembe; ebikulu netsingulu imbeli wenywe bilarundukha mukhwimba, nachio emisaala chiosi chiomubulimo chilakhupa amakhofi.

¹³Mushilenje shieshisisia omutarakwe kulamela; mushilenje shiolusasaari omuhatasi kulamela; ne kalaba eshitsulilo khu OMWAMI Nyasaye, khulwa eshitsulilo ako kakhabe eshilolelo eshilibaho inziayo, khandi eshilolelo shiinziayo, eshilahwaho ta.