Read wanga ISAYA 56 Bible Online

ISAYA 56 - wanga bible

ISAYA 56

¹Kano niko aka OMWAMI Nyasaye aboola ari: “Mukhole akahabwene nende akobulunjishi, okhuba obuhoonia bwanje buli ahambi okhuula, nabwo obununuli bwanje okhufwimbulwa.

²Noweikhabi omwana womundu oukholanga kano, ulia oukahandangakhwo, oulindanga inyanga ya Isabato, nalachibiiyia ta, niyelinda omwene obulakhola libi liosi liosi ta.

³Omurende owiyunjile khu OMWAMI Nyasaye shialaboola mbu, ‘Toto OMWAMI Nyasaye alanzahukhasia okhurula khubaandube,’ ta; kata omulate okhuboola mbu, ‘Endi butswa omusaala omuumu’ tawe.

⁴Okhuba OMWAMI Nyasaye aboola ari, “Khubalate abalindanga tsinyanga tsianje tsia Isabato, khandi abakholanga akanjamisia nibahanda khundakano yanje,

⁵ndalabahelesia munzu yanje, khandi hakari wamasisi kanje, eshiitsulilo khandi eliira ebishila abaana abasiani nabakhaana; ndalabahelesia eliira liobumeli elilakama tawe.

⁶Ne abarende abeyunga khu OMWAMI Nyasaye, okhumukhalabanila, nibaliheela eliiralie, nibekhola abasumbabe, nende boosi abalindanga Isabato, nibalachionoonia ta, ne nibatinya khundakano yanje, OMWAMI Nyasaye aboola ari khubo:

⁷‘Ndakhabareere khushikulu shianje eshitakatifu, nebakhola okhwikhoya munzu yanje yokhusayilamwo; ebihaanwa biabwe ebisambe halala nemisango chiabwe bilafuchililwa khushimalilo shianje shiemisango; okhuba inzu yanje yilalangwa mbu inzu yamasayo khulwa abandu boosi.’

⁸“OMWAMI Nyasaye, oubunjeresinjia abalobwa ba Isiraeli aboola ari, ‘Ndalabunjelesia abandi okhubameetakhwo okhushila balia abamalile okhubunjelesibwa.’ ”

⁹Inywe tsisolo nabulimo inywe tsisolo tsiomumutsuru, yitse mwesi murandule!

¹⁰Abalindi ba Isiraeli nababofu, boosi babula obumanyi, boosi ni tsimbwa tsisilu etsilanyala okhusema tawe; tsilooranga, tsilaambiile hasi, khandi tsiachama okhukona tsindoolo.

¹¹Tsimbwa tsino tsialwookha; shitsinyala okhwikura ta. Abaayi nabo babula obumanyilisi; boosi bashiukhane okhutsia injila yabwe abeene, okhukhaaba akeinganga yabwe abeene.

¹²Abameesi abo baboola bari, “Yitse, chende khunywe idivai; chende khunywe amalwa amalulu nikhwikura. Mana mukamba kulaba shinga inyanga yino, inyanga yingali muno.”