Read wanga ISAYA 57 Bible Online

ISAYA 57 - wanga bible

ISAYA 57

¹Abandu abalunjishi bafwitsanga nibarulaho, ne abulaho oupaarakhwo ta; abariitsanga Nyasaye bayinibungwaho, ne abulaho oumanyilisia ta. Abalunjishi abo barusibungwaho khulwa okhuhonokokha amatinyu,

²nabo bahuluukha mumulembe; balia abachendanga mubulunjishi balahuluukha khubitali biabwe.

³Nebutswa inywe, yitse ahambi, inywe abaana bomufumu mukhasi, inywe olwibulo lwabayilani nende abaheyi.

⁴Niwiina owa mubalabalanga? Owa mwasamilanga omunwa nimuyinilia olulimi elwanyi? Inywe shimuli abaana abobukhayi, khandi olwibulo lwobubeeyi?

⁵Shininywe abayengukhanga nobwikombi hakari wemiruba, hasi wa buli omusaala omutendeemu; inywe abasinzanga abaana benywe okhuba emisango mumabanda, mumbangatsi tsietsinyanda?

⁶Omukabo kwenywe kuli hakari wamachina amarerere; akenako niko obulaame bwenywe; mwakamalila omusango kwokhutsushilila, nimukareerera omusango okweimele. Mana ndakhahotselesibwa khulwa ebikhole bino?

⁷Waala obulilibwo khushikulu eshirambi khandi eshichinguukhu ebweneyo niyo ewa watikulukha okhumala omusango.

⁸Inyuma webiyindi biemiliango chienywe, mwasinjisiayo ebifwanani bienywe; okhuba, mukhuurulakhwo, mwafuunula obukono bwenywe, nimubuniinakhwo, nokhububaambula; ne mwarechelesania ninabo, nimuheela obulili bwabwe, ne mwahenjile khushihechenye shiabwe.

⁹Wamutsiila Moleki niwibashile amafura, niwinjiyia amalesiko keshing'ari, noruma abarumebo ehale, abandi nobaruma kata emakombe.

¹⁰Mwechonyia abeene nokhubotokhana khwenywe, nebutswa shimwaboola muri, “Khubula inganga,” tawe. Obwikombi bwenywe bwalamusibwa, khulweshio shimwatoreerera tawe.

¹¹Niwina owa mwatechereranga nimuria nikachila nimubeeya, nimulanzitsulilakhwo kata okhumbaarakhwo mumioyo chienywe ta? Shindaholeela, nemutimbila tsimoni tsianje, nakachilanga nimulaaria ta?

¹²Ndaleyama akobulunjishi nende ebikhole bienywe, nebutswa shiketsa okhubakhoonya ta.

¹³Olwa muuhaabila khulwa obukhoonyi, muleshe abanyasaye benywe abo bamuhonie! Omuyeka kulahutsa abanyasaye abo boosi nikubarusiaho, nebutswa omundu yesi yesi ounzisikanga alamenya mushialo eshio, khandi alanzinamila muhekalu yanje.

¹⁴Mana kaliboolwa kari, “Yumbashe, yumbashe, mukaasie injila, rusieho buli eshisichirasio okhurula khunjila yabandu banje.”

¹⁵Okhuba OMWAMI Nyasaye, Omukhongo muno, khandi Owoluyali, oumenyangaho inziayo, owa eliiralie lili Omutakatifu, aboola ari, “Emenyanga habundu hachinguukhu khandi hatakatifu, nende mumwoyo okwituutuyiye nikwinyukha, okhulamusia roho tsiabetuutuyi khandi okhulamusia abo bemioyo chiinyushile.

¹⁶Shichila shindalatsiililila okhuyingana nabandu buli nyanga tawe, kata okhutiilwa oburuma buli lwosi ta; okhuba rofo yobulamu yirula khwisie, khandi nisie ouhananga obulamu.

¹⁷Ndatiilwa oburuma khulwa obwikombi bwabwe obumayaanu; Ndabahelesia eshinyasio, nebachwang'a, nebutswa batsiililila okhushiukhana okhulonda tsinjila tsiabwe abeene.

¹⁸Emalile okhulola tsinjila tsiabwe, ne butswa ndalabahonia; ndalabeemilila nembakalusilia obusoosi, nenemia omwoyo abo abekhuula.

¹⁹Omulembe, omulembe kube khu boosi abali ehale kata ahambi, nolwa OMWAMI Nyasaye aboola; khandi ndalabahonia.

²⁰Nebutswa abamayaanu bali shinga inyanza eyirundanga, eyilanyala okhuyenzeela ta; amaatsi kayo kareera amakokha nende amatoyi.

²¹Omulembe shikulikhwoho kata nahatuutu khubamayanu tawe.”