Read wanga ISAYA 58 Bible Online

ISAYA 58 - wanga bible

ISAYA 58

¹Lanjilisia, nolaholeela ta! Lanjilisia nomwoyo omukhongo shinga okweitarumbeta! Boolela abandu banje akeinduli yabwe, abeinzu ya Yakobo akobwonooni bwabwe.

²Nebutswa banzinamilanga buli lwosi, nibasangaalila okhumanya tsinjila tsianje, shinga lihanga elikholanga akobulunjishi, elilaashiukhana okhurula khumalako ka Nyasaye walio ta; basabanga obukhalachi bwobulunjishi, batsaatsahalila okhusita ahambi nende Nyasaye wabwe.

³“Eshichilanga nikhwihonjia inzala, nawe Nyasaye nolakhulola nishina? Eshichilanga nikhwituutuyia, nawe nolabukulamwo eshindu nishina?” Lole, mwikhaabilanga aka mwenya abeene olwa mwihoonjia inzala, nimusandia abakholi benywe.

⁴Lole, okhwihoonjia inzala khwenywe khubareerira obusoolo nobukhupani nokhusaamulana ebifusi mubumayaanu. Okhwihoonjia inzala khwenywe khuno, shikhwakhachila omwoyo kwenywe kwahulilikha mwikulu tawe.

⁵Okhwo toto nokhwihonjia inzala okhwa ndaahula mbu, khube inyanga yokhwituutuyia abeene? Okhwo nikhwo okhubunamia omurwe hasi shinga olusi, nokhwikalakaasia mwikoshe nimwifwalile amakunia? Nikhwo okhwamulanganga okhwihonjia inzala, inyanga eyifuchililwa nende OMWAMI Nyasaye noho?

⁶“Okhwihonjia inzala okhwa enzenya ngwokhuno mbu, okhuboholola emikoye echiokhubula obulunjishi, okhuboholola ebitiili ebielikokolo, okhuleekhuula abamiinungwa batsie, nokhufunaka buli likokolo.

⁷Nikhwo okhukabulana ebiokhulia nende abo abali inzala, nokhwinjisia ababisandu ababula aha benjila. Olwa olola abali eshiechenye, obafwale ebiifwalo, ne olefisa khu abomuwenyu tawe.

⁸“Mana obulafubwo bulaakha shinga isenya yomumabwibwi, nokhuhona khwomubilikwo okhukhwitsila lwangu; oukhuterera alakhwimilila, oluyali lwa OMWAMI Nyasaye lulamaliilikha munyumawo.

⁹Mana nolwa olalanjisia, naye OMWAMI Nyasaye alakalusia; olahaaba niwenya obukhoonyi, naye alaboola ari, ‘Nisie uno.’ “Nimuba nimuyiniaho likokolo hakari wenywe, okhusiomesania olwala, okhuboola obumayaanu,

¹⁰nimwakhahelesia abali inzala eshiokhulia mana nimwikusia abo abasandibwa, kho obulafu bwenywe bulaakha mushiilima, nashio shilakalukhana okhuba shinga obulafu bweshiteere.

¹¹OMWAMI Nyasaye alamwimililanga buli lwosi, namwikusia mushiangalamwe, natinyisia amakumba kenywe; ne mulaba shinga omukunda okusamwa amaatsi mubunji, shinga isebele eyamatsi, eya amaatsi kayo kalakhamanga ta.

¹²Amasiisi kenywe akakwisibwa khale kakhombakhwe khandi; Mwakhabuusie obuchaachilo bwetsinzibulo tsinyinji; mwakhalangwe mbu, omusiri weshibanga, omukalusi wetsinjila etsiokhumenyakhwo.

¹³“Nimuba nimwikalila ebilenje bienywe obulabiyia Isabato ta, obulalonda obwikombi bwenye abeene khunyanga yanje indakatifu tawe; Nimuba nimulanga Isabato mbu eyokhusangaalila, inyanga indakatifu eya OMWAMI Nyasaye, khandi eyoluyali. Nimuba nimuchihelesia oluyali, oburalonda tsinjila tsienywe abeene ta, nokhukhola akamuchamisia inywe abeene noho okhukhaaba kabeene mwenya ta;

¹⁴nolwa mwakhasangalile mu OMWAMI Nyasaye, ne ndakhamukhole muchendele khubutenje bweshialo; ndalabeekusia nobulaame bwa kuuka wenywe Yakobo, okhuba isie OMWAMI Nyasaye, nisie ouboolile.”