Read wanga ISAYA 59 Bible Online

ISAYA 59 - wanga bible

ISAYA 59

¹Shimulapaare mbu, OMWAMI Nyasaye nomuteshele oulanyala okhumuhonia ta, kata mbu yekala amarwi oulanyala okhuhulila okhuhaba khwenywe tawe!

²Habula obumayaanu bwenywe nibwo obuchilanga nalamurecheresia ta, nibwo obumwahukhasinjia nende Nyasaye wenywe. Obwonooni bwenywe bufisile obwenibwe mbu muleshe okhumulola, naye aleshe okhuhulila okhuhaba khwenywe.

³Okhuba amakhono kenywe kabiyiibwe namabanga, natsio tsinzala tsienywe nobumayaanu; eminwa chienywe chiboolanga akobubeeyi, olulimi lwenywe lurumbulanga butswa obumayaanu.

⁴Abulaho oufunaana mushiina habwene, abulaho outsia khwilako mubwatoto; besikanga akabutswa, nibaboola obubatsa, bayililisinjia obushiamu nibebula obumayaanu.

⁵Baalulanga amabuyu kebilikoma, nibalukha olububi lwelibubi; buli oulia khumabuyu kabwe afwitsanga, ne olwa libuyu tsana elo liarakwa lirulangamwo eliini.

⁶Tsimbubi tsiabwe etsio shitsinyala okhukhola eshifwalo ta; shibanyala okhwifwimba eshiabalukhanga eshio ta. Ebikhole biabwe nebikhole bioumayaanu, khandi ebikhole biamayukuba bili mumakhono kabwe.

⁷Ebilenje biabwe bilushila amabi, bayuyukhana okhuratsia eshitsayi shibula eshikha; amayililisio kabwe nakobumayaanu, obumululwi nende obusasishi buli khumihanda chiabwe.

⁸Injila yomulembe shibachimanyile ta, khandi obulunjishi shibulikhwo munjenda yabwe tawe. Bakhola emihanda chiabwe okhushiama, abulaho ouchichendangakhwo ouli nomulembe tawe.

⁹Khulweshio abandu baboola bari, “Niko akachila obuyaasi bwatoto nibuli ehale ninefwe, nabwo obulunjishi shibukhuulangakhwo ta; khulindililanga obulafu, ne lola, eshilima nishio eshiitsanga; khulindilila omubasu, nebutswa khuchendanga mwifumbi.

¹⁰Khuhabasinjia khwisisi shinga ababofu, nikhuhabaasia shinga balia abalalolanga ta; khwisichiralanga mushiteere shinga abali mushilo, hakari wabalamu ifwe khuli shinga abafu.

¹¹Fwesi khubululanga shinga amafunyisi; nikhubinda shinga amakuuku. Khulindililanga obuyaasi bwatoto, nebutswa shibuliho ta; obuhonia, halali buli ehale ninefwe.

¹²Okhuba obukhayi bwefwe imbeliwo bwinjiye, nabwo obwonooni bwefwe burumbula akobuloli khwifwe. Toto obukhayi bwefwe buli ninefwe, nefu khumanyile obumayaanu bwefwe mbu;

¹³Okhwonoona nende okhumwikana OMWAMI Nyasaye, nende okhushiukhana okhurula khu khumulonda Nyasaye wefwe. Okhuboola khukokhusandia nende akeinduli, okhuyililisia nende okhurumbula akobubeeyi okhurula mumioyo chiefwe.

¹⁴Obukhalachi bwa habwene buureerwe elubeka, nabwo obulunjishi businjiliile ehale; okhuba obwatoto bwisichiralanga mulwanyi, nako aka habwene shikanyala okhwinjila tawe.

¹⁵Obwatoto butakhana, ne buli oushiukhana okhulekha obubi, omwene yekhola eshioluyiitsi.” OMWAMI Nyasaye yalola, ne nasinyikha, shichila obukhalachi bwa habwene shibwaliho tawe.

¹⁶Yalola mbu abulaho omundu yesi yesi, shiyaliho owokhuterera ousandibungwa ta; Kho omukhonokwe omwene nikumureerera obuhuli, nabwo obulunjishibwe nibumuleetelela.

¹⁷Yeefwala obulunjishi shinga eshitsengwa, nende ikutwa yobuhonia khumurwekwe; yefwala tsingubo tsieshikwoli shinga eshifwaloshie, niyeefubila obululu shinga ingubo ifuubila.

¹⁸Okhulondokhana nende ebikhole biabwe, nolwa alabarunga; mbu oburuma khu abo abamulwana, nako akakhoyeele khubasukube; tsinguku tsieinyanza alatsikalusilia akatsikhoyeele.

¹⁹Kho abali mumbo balaria eliira lia OMWAMI Nyasaye, nabo abali ebukwe balaria oluyalilwe; okhuba alakholomokha shinga omwalo okubira bwangu okuhutswa nomuyeka kwa OMWAMI Nyasaye.

²⁰Mana aleetsa mu Zayuni shinga Omununuli wabwe, khu bali mu Yerusalemu abalashiukhana okhulekha obukhayi bwabwe, nolwa OMWAMI Nyasaye aboola.

²¹Nasi ekhola indakano yanje ninabo mbu, Roho wanje ouli mwinywe, nende amakhuwa kanje akereere muminwa chienywe, shikalirula muminwa chienywe, kata mu chiabaana benywe, noho chiabetsukhulu benywe okhuula inziayo tawe. Nolwa isie OMWAMI Nyasaye emboola.