Read wanga ISAYA 6 Bible Online

ISAYA 6 - wanga bible

ISAYA 6

¹Mumuyika kwomuruchi Uzia yafwilakhwo, ndalola OMWAMI Nyasaye niyekhaale khushifumbishie shioburuchi, nali hekulu khandi nachingulilwe, ne ikanzuye niyibambuulwe niyitsuule muhekalu mwosi pe.

²Hekuluwe abamalaika bali nibasinjiileho. Buli omumalaika yali netsimbaha tsisasaba. Tsimbaha tsibili tsiafunikha mumonimwe, tsibili nitsifunikha ebilenje, natsio tsibili napulushila.

³Abamalaika abo bongulilananga nibaboola bari, “Omutakatifu, Omutakatifu, Omutakatifu, niye OMWAMI Nyasaye omwene mahe. Oluyalilwe lwitsuule mushialo shiosi.”

⁴Okhulaanjilisia khwabwe okhwo khwatechesia emise chiemiliango chieihekalu, nayo niyitsulamwo omwosi.

⁵Mana nimboola endi, “Endi mushilaamo shiobubi, isie endi khushibi; amakhuwa komunwa kwanje namamayanu khandi emenyanga hakari wabandu bamakhuwa amamayanu; okhuba isie endutsi omuruchi, OMWAMI Nyasaye omwene mahe!”

⁶Mana mulala khubamalaika abo, napulukha niyetsa hasi wa ndali nachinjile elianda eliangaale omulilo, elia yali niyekhoonyeele lihana okhurusia khushimalilo shiemisango.

⁷Mana niyanziina khumunwa kwanje nelianda elo, ne naboola ari, “Lola elianda lino litsiinilwe khumunwakwo; obumayanubwo buyiniibwemwo, nabwo obwonoonibwo bulesheelwe.”

⁸Mana nimbulila OMWAMI Nyasaye nareeba ari, “Nerume wina? Niwiina oulakhutsiila ifwe?” Nasi ningalusia nimboola endi, “Endi hano, ruma isie.”

⁹Naye niyamboolela ari, “Tsia, oboolele abandu bano ori, ‘Okhuhulila mulahulila, nebutswa shimulamanyilisia tawe; Okhuhenga mulahenga, nebutswa shimulalola tawe.’ ”

¹⁰Khandi niyamboolela ari, “Siluhasia emioyo chiabandu abo, wikale amarwi kabwe, khandi obofusie tsimoni tsiabwe, kho mbu, baleshe okhulola netsimoni tsiabwe, noho okhuhulila namarwi kabwe, kata okhumanyilisia nemioyo chiabwe tawe, betsukhana nibekalukhasia mana nibahonibwa.”

¹¹Mana nireeba endi, “OMWAMI Nyasaye, kalaba kario okhuula liina?” Naye niyangalusia ari, “Okhuula olwa amatookho nakasasibwe nikatong'a amakunda, nikabula abamenyamwo, natsio tsinzu nitsitong'a tsikhaya nitsibula abamenyamwo, nashio eshialo nishitong'a butswa likunda.

¹²Okhuula olwa isie OMWAMI Nyasaye ekhola abandu boosi okhutsia ehale, nende okhukhola eshialo okhutong'a likunda.

¹³Kata abandu eshitonye shielikhumi nibaba nibatong'amwo, eshialo eshio shilasambwa, shilaba butswa shinga eshisina shiomuruba eshitong'anga olwa kuba nikuremilwe.” (Eshisina shiomuruba okwo nishio obuchaachilo obuyia bwabandu ba Nyasaye).